ၶွင်ႇသီႇႁွင်ႈၵၢၼ်ၾၢႆႇသိုဝ်ႇၶၢဝ်ႇ မိူင်းႁူမ်ႈတုမ် (MPC) ဢၼ်ယူႇတႂ်ႈ ဢႃႇၼႃႇသိုၵ်းမၢၼ်ႈ ယိုတ်းမိူင်း မိၼ်းဢွင်ႇလၢႆႇလႄႈ ၶွင်ႇသီႇႁွင်ႈၵၢၼ်ၾၢႆႇသိုဝ်ႇၶၢဝ်ႇ မိူင်းထႆး (NPCT) ႁူမ်ႈ ၵၼ်လူင်းလၢႆးမိုဝ်း MOU တႃႇႁဵတ်းၵၢၼ်ငၢၼ်း ၵဵဝ်ႇလူၺ်ႈၵၢၼ်သိုဝ်ႇၶၢဝ်ႇၸိုင်ႈမိူင်း ၼႆယဝ်ႉ။

ဝၼ်းတီႈ 01/08/2025 ၼႆႉ ႁူဝ်ပဝ်ႈ ၶွင်ႇသီႇႁွင်ႈၵၢၼ်ၾၢႆႇသိုဝ်ႇၶၢဝ်ႇ မိူင်းႁူမ်ႈတုမ် (MPC) တွၵ်ႊတိူဝ်ႊ တိၼ်ႇထုၼ်းဢူး၊ ၽူႈၼမ်းၼႂ်း ဢူးဢေးၶျၢၼ်း (ဦးအေးချမ်း) လုၵ်ႈၸၢႆး ဢူးၸူဝ်းတဵင်း ၽွင်းလူင်ၵဝ်ႇလႄႈ ၸွမ်သိုၵ်းၾၢႆႇတပ်ႉၼမ်ႉ ၵႅမ်ၽူႈၼမ်းၼႂ်း မၢႆ (2) ဢူးယေးမိၼ်းၸူဝ်းလႄႈ ႁူဝ်ပဝ်ႈ ၾၢႆႇၶွင်ႇသီႇ သိုဝ်ႇၶၢဝ်ႇမိူင်းထႆး (NPCT) Mr. Chavarong Limpattamapanee ဢွၼ်ႁူဝ်ၼမ်းၼႃႈသေ ႁူပ်ႉထူပ်းလူင်းလၢႆးမိုဝ်း MOU ၵၼ်ၵႂႃႇတီႈမိူင်းၵွၵ်ႇ ၸိုင်ႈထႆး။

ၵေႃႉပဵၼ်လုၵ်ႈၸၢႆး ဢူးၸူဝ်းတဵင်း ၽွင်းလူင်ၵဝ်ႇလႄႈ ၸွမ်သိုၵ်းၾၢႆႇတပ်ႉၼမ်ႉ ဢူးဢေးၶျၢၼ်းၼႆႉ ပဵၼ် ၵူၼ်းၵေႃႉၵမ်ႉထႅမ် ႁၼ်လီၸွမ်းလွင်ႈသိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်း မိူဝ်ႈပီ 2021 ၼၼ်ႉသေ ပဵၼ်ၵူၼ်းၵေႃႉၵႆႉလၢတ်ႈ သႄႉသွမ်းလွင်ႈဢမ်ႇလီတီႈၸုမ်းသိုဝ်ႇၶၢဝ်ႇ ၸိူဝ်းဢမ်ႇယူႇတႂ်ႈဢႃႇၼႃႇသိုၵ်းလႄႈ ႁဵတ်းၵၢၼ်လွတ်ႈလႅဝ်း မီးယိူင်းဢၢၼ်းႁဵတ်းသၢင်ႈတႃႇႁႂ်ႈပဵၼ်တၢင်းၵမ်ႉၸွႆႈ ၵၢၼ်တူင်ႉၼိုင် ၶၵ်ႉတွၼ်ႈတီႊမူဝ်ႊၶရေႊသီႊ ၼႂ်းမိူင်းႁူမ်ႈတုမ်ယူႇ။

လိူဝ်ၼၼ်ႉ ၵေႃႉပဵၼ်ႁူဝ်ပဝ်ႈ ၸုမ်းၶွင်ႇသီႇသိုၵ်းမၢၼ်ႈ MPC တွၵ်ႊတိူဝ်ႊ တိၼ်ႇထုၼ်းဢူးၵေႃႈ မိူဝ်ႈပၢင်လိူၵ်ႈတင်ႈ ပီ 2020 ၼၼ်ႉ ႁပ်ႉပုၼ်ႈၽွၼ်းပဵၼ် ၽူႈတႅၼ်း ပႃႇတီႇသၢင်ႇသီႈ (USDP) တႂ်ႈဢႃႇၼႃႇသိုၵ်းမၢၼ်ႈသေ ၶဝ်ႈလိူၵ်ႈတင်ႈမႃး။

လႆႈႁူႉဝႃႈ ၼႂ်းဝၼ်းတီႈ 31/07/2025 တေႃႇထိုင် ဝၼ်းတီႈ 02/08/2025 ၼႆႉ ၸုမ်းၶွင်ႇသီႇ ႁွင်ႈၵၢၼ် ၾၢႆႇသိုဝ်ႇၶၢဝ်ႇ မိူင်းႁူမ်ႈတုမ် (မိူင်းမၢၼ်ႈ) MPC ၼႆႉ ဢွၵ်ႇၶၢဝ်းတၢင်းၵႂႃႇလဵပ်ႈ ႁဵၼ်း ၼႂ်းၶွင်ႇသီႇ ႁွင်ႈၵၢၼ် ၾၢႆႇသိုဝ်ႇၶၢဝ်ႇမိူင်းထႆး တီႈႁူင်းဢိတ်ႇဢွၵ်ႇလိၵ်ႈၽိုၼ်ၶၢဝ်ႇ Bangkok Post ၊ ႁွင်ႈၵၢၼ် ၾၢႆႇႁဵတ်းဢွၵ်ႇ ငဝ်းႁၢင်ႈသဵင် ၸိူဝ်ႉၸၢတ်ႈမိူင်းထႆး (NBT) လႄႈ ႁွင်ႈၵၢၼ် ၾၢႆႇႁဵတ်းဢွၵ်ႇငဝ်းႁၢင်ႈသဵင် မႁႃႇၶျႆးၶေႉပိူၼ်ႉထီႊဝီႊ (มหาชัยเคเบิลทีวี) Mahachai Cable TV ၸဵမ်ၸိူဝ်းၼႆႉ။

တႅမ်ႈ – ၽူၺ်းၼုမ်ႇ