ဝၼ်းတီႈ 31 /07/2025 ႁူဝ်ၼႃႈသိုၵ်းမၢၼ်ႈယိုတ်းမိူင်း မိၼ်းဢွင်ႇလၢႆႇ ၶွတ်ႇၽွတ်ႈၸုမ်းလူင်ပွင်ၸိုင်ႈမႂ်ႇ ယုၵ်ႉယွင်ႈတူဝ်ၵဝ်ႇ ၶိုၼ်ႈပဵၼ် ၸွမ်ၸိုင်ႈၸူဝ်ႈၶၢဝ်း သိုပ်ႇႁပ်ႉပဵၼ်ႁူဝ်ပဝ်ႈ ၸွမ်ပွင်ၵၢၼ်သိုၵ်းသေ ပိုၼ်ၽၢဝ်ႇ ငဝ်းလၢႆးၶိုၵ်ႉၶၵ်ႉ 63 ဝဵင်း တႃႇသိုပ်ႇၸတ်းၽႅၼ်ၵၢၼ်သိုၵ်း ၼႂ်းၼႃႈတီႈၸုမ်းသိုၵ်းၸၢဝ်းၶိူဝ်းၵုမ်းၵမ်ဝႆႉ ၼႂ်းၶၢဝ်းတၢင်းသၢမ်လိူၼ် ဝႃႈၼႆ။

63 ဝဵင်းဢၼ် သိုၵ်းမၢၼ်ႈ တေသိုပ်ႇၸတ်းၽႅၼ်ၵၢၼ်သိုၵ်းၵႂႃႇ ၼႂ်းၶၢဝ်းတၢင်းသၢမ်လိူၼ်ၼႆႉ ၼႂ်းမိူင်းတႆးပႃး 15 ဝဵင်း၊ မိူင်းၶၢင် 5 ဝဵင်း၊ မိူင်းယၢင်းလႅင် 3 ဝဵင်း၊ မိူင်းယၢင်းၽိူၵ်ႇ 2 ဝဵင်း၊ မိူင်းၶျၢင်း 7 ဝဵင်း၊ မိူင်းရၶႅင်ႇ 14 ဝဵင်း လႄႈ တိူင်းမၢၼ်းတလေး 3 ဝဵင်း၊ တိူင်းမၵူၺ်း 5 ဝဵင်း၊ တိူင်းၸႄႈၵႅင်း 9 ဝဵင်း။

မိူင်းတႆး 15 ဝဵင်းၼႆႉပဵၼ်ဝဵင်း ၼမ်ႉတူႈ၊ မၢၼ်ႈပဵင်း (မဘိမ်းမြို့နယ်) ၊ ၵူတ်ႉၶၢႆ၊ ၼမ်ႉၶမ်း၊ သႅၼ်ဝီ၊ ၵုၼ်လူင်၊ ၼမ်ႉသၼ်ႇ၊ မၢၼ်ႈတူင်ႈ၊ ႁူဝ်ပၢင်ႇ၊ လၢဝ်ႇၵၢႆး(ၵၢတ်ႇၵဝ်ႇ)၊ ၵွင်းၸၢင်ႉ(ၵူင်းၵျၢၼ်း)၊ မိူင်းမိတ်ႈ၊ ၵျွၵ်ႉမႄး၊ သီႇပေႃႉ၊ မိူင်းလႃး ၸဵမ်ၸိူဝ်းၼႆႉ။

63 ဝဵင်းၸိူဝ်းဢၼ်သိုၵ်းမၢၼ်ႈပိုၼ်ၽၢဝ်ႇ ငဝ်းလၢႆးၶိုၵ်ႉၶၵ်ႉ (အရေးပေါ်အခြေအနေ) တွၼ်ႈတႃႇၸတ်းၽႅၼ် ၵၢၼ်သိုၵ်းၼႆႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၸိူဝ်းပဵၼ် သိုၵ်းၵဝ်ႈၵၢင်ႉ၊ သိုၵ်းတဢၢင်း၊ သိုၵ်းၶၢင်၊ သိုၵ်းယၢင်းလႅင်၊ သိုၵ်းရၶႅင်ႇ လႄႈ ၸုမ်းသိုၵ်းၵူၼ်းၼုမ်ႇမၢၼ်ႈ/ သိုၵ်းၵႅတ်ႇၶႄၵူၼ်းမိူင်း PDF ၶဝ်ယိုတ်းလႆႈသေၵုမ်းၵမ်ဝႆႉ။

ၼႂ်းလိၵ်ႈပိုၼ်ၽၢဝ်ႇသိုၵ်းမၢၼ်ႈဢွၵ်ႇဝႆႉၼၼ်ႉ ပိူင်းၸႅင်ႈၼႄပႃးဝႆႉဝႃႈ တင်ႈတႄႇဝၼ်းတီႈ 31 လိူၼ်ၵျူႊလၢႆႊၵႂႃႇ ၼႂ်းၶၢဝ်း တၢင်း 90 ဝၼ်း (တႃႇသၢမ်လိူၼ်)ၼႆႉ သိုၵ်းမၢၼ်ႈ တေသိုပ်ႇၸတ်းၵၢၼ်သိုၵ်းၵႂႃႇ လႄႈ မီးသုၼ်ႇလႆႈၸႂ်ႉတိုဝ်း ဢႃႇၼႃႇ ၵၢၼ်သိုၵ်းသေ ၽွင်းငမ်းၵႂႃႇ ဝႃႈၼႆ။

ၸွမ်းၼင်ႇၶေႃႈပိုၼ်ၽၢဝ်ႇၼႆႉသေ ၽႂ်ပူၼ်ႉပႅၼ်ၵေႃႈ တေထုၵ်ႇတီႉၺွပ်းပၼ်တူတ်ႈတၢမ်ႇၸွမ်းၼင်ႇပၵ်းပိူင်ဢၼ်လုမ်းတြႃးၾၢႆႇသိုၵ်းႁဵတ်းဢွၵ်ႇဝႆႉ ၊ တူတ်ႈတၢမ်ႇၼၵ်းမိူၼ်ၼင်ႇ တူတ်ႈၶွၵ်ႈပီယၢဝ်းၶၢဝ်းႁိုင်ဢမ်ႇၼၼ် တေႃႇၸူဝ်ႈ၊ တိုၼ်းတေဢမ်ႇပၼ်ၽႂ်မႃးထုတ်ႇဢွၵ်ႇလႃးလႃးဝႃႈၼႆ။

တႅမ်ႈ- ၽူၺ်းၼုမ်ႇ