မိူဝ်ႈၼႆႉ ဝၼ်းတီႈ 31 လိူၼ်ၵျူႊလၢႆႊ သိုၵ်းမၢၼ်ႈယိုတ်းမိူင်း ႁွင်ႉဢဝ်ၶႃႈႁၢပ်ႇၵၢၼ်ၶုၼ် ၼႂ်းၸုမ်းလူင်ပွင်ၸိုင်ႈ ၸိူဝ်းယူႇတႂ်ႈဢၢမ်းၼၢတ်ႈၶဝ်သေ ၸတ်းပၢင်ၵုမ်တီႈၼေႇပျီႇတေႃႇ တႅပ်းတတ်းယုၵ်ႉလိူၵ်ႈၶေႃႈပိုၼ်ၽၢဝ်ႇ ငဝ်းလၢႆးၶိုၵ်ႉၶၵ်ႉ ၸိုင်ႈမိူင်း သေ ၸွမ်ၸိၵ်းသိုၵ်းမၢၼ်ႈ ၸီႉသင်ႇပုတ်ႈၶၢႆႉတၼ်းႁဵၼ်းတူဝ်ၵဝ်ႇၶိုၼ်း။

ပၢင်ၵုမ်ဝၼ်းမိူဝ်ႈၼႆႉ သိုၵ်းမၢၼ်ႈပိုၼ်ၽၢဝ်ႇဝႃႈ – “ ယူႇတီႈၸွမ်ပွင်ၵၢၼ်သိုၵ်း ဢၼ်လႆႈႁပ်ႉပုၼ်ႈၽွၼ်း ယိပ်းဢႃႇၼႃႇၸိုင်ႈမိူင်းမႃး တင်ႈတႄႇဝၼ်းတီႈ 1 လိူၼ်ၾႅပ်ႊပိဝ်ႊရီႊ 2021 မႃးၼၼ်ႉ ၵၢၼ်ငၢၼ်းယဝ်ႉတူဝ်ႈလီငၢမ်းယဝ်ႉလႄႈ တႄႇဢဝ်မိူဝ်ႈၼႆႉၵႂႃႇ ယုၵ်ႉလိူၵ်ႈၶေႃႈပူင်လွင်ႈဢၼ် လႆႈႁပ်ႉပုၼ်ႈၽွၼ်း ၸတ်းပွင်ဢႃႇၼႃႇၸိုင်ႈမိူင်း ဝႆႉၸိူဝ်းၼၼ်ႉယဝ်ႉ ” ၼႆသေ ၶိုၼ်းပိုၼ်ၽၢဝ်ႇ ၶွတ်ႇၽွတ်ႈ “ၸုမ်းလူင်ပွင်ၸိုင်ႈမိူင်းႁူမ်ႈတုမ် ၸုမ်းမႂ်ႇ” လႄႈ “ၶွမ်ႊမသျိၼ်ႊလွင်ႈၵတ်းယဵၼ်သႃႇယႃႇလႄႈ ႁူမ်ႇလူမ်ႈၸိုင်ႈမိူင်း” ။

ၼႂ်းၶွမ်ႊမသျိၼ်ႊမႂ်ႇၼႆႉ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ၶိုၼ်းမႃး ႁပ်ႉပုၼ်ႈၽွၼ်းပဵၼ် ၵႅမ်ၸွမ်ၸိုင်ႈမိူင်းႁူမ်ႈတုမ် လႄႈ ႁပ်ႉၼႃႈတီႈပုၼ်ႈၽွၼ်းဝႆႉထႅင်ႈ ပဵၼ်ႁူဝ်ပဝ်ႈ ၸွမ်ပွင်ၵၢၼ်သိုၵ်း။

ၵႅမ်ၸွမ်ၸိၵ်းသိုၵ်း ၸူဝ်းဝိၼ်းသမ်ႉ ၶိုၼ်ႈႁပ်ႉပဵၼ် ၵႅမ်ႁူဝ်ပဝ်ႈ ႁွင်ႈၵၢၼ်ၽူႈပွင်ၵၢၼ်သိုၵ်း ။ ၽူႈၶဝ်ႈၶွမ်ႊမသျိၼ်ႊမႂ်ႇၼႆႉမီး 10 ၵေႃႉ ။ ပႃး ဢူးၺူဝ်ႇၸေႃး ၽွင်းလူင်ၶူင်းၵၢၼ်ၸိူဝ်ႉၸၢတ်ႈလႄႈ ၸွမ်ၽွင်းလူင်ၸိုင်ႈမိူင်း ၊ ဢူးဢွင်ႇလိၼ်းၻူၺ်း ၸွမ်ပွင်ၵၢၼ် တီႈလုမ်းၶွင်ႇသီႇႁူမ်ႇလူမ်ႈလႄႈၵႅတ်ႇၶႄၸိူဝ်ႉၸၢတ်ႈ၊ ၸွမ်သိုၵ်းလူင်မွင်ႇမွင်ႇဢေး ႁွင်ႈၵၢၼ်ၽွင်းလူင်ၾၢႆႇၵႅတ်ႇၶႄ ၊ ၵႅမ်ၸွမ်သိုၵ်း ထုၼ်းထုၼ်းၼွင်ႇ ႁွင်ႈၵၢၼ်ၽွင်းလူင်ၾၢႆႇၼႂ်းမိူင်း ၊ ဢူးတၢၼ်းသူၺ်ႇ ႁွင်ႈၵၢၼ်ၽွင်းလူင်ၾၢႆႇၼွၵ်ႈမိူင်း ၊ ၵႅမ်ၸွမ်သိုၵ်း ယႃႇပျေႉ ႁွင်ႈၵၢၼ်ၽွင်းလူင်ၾၢႆႇလႅၼ်လိၼ်၊ ၸွမ်သိုၵ်းလူင် ၵျေႃႇၸႂႃႇလိၼ်း ၾၢႆႇၵုမ်းလႄႈငူပ်ႉငိ တပ်ႉလိၼ်- ၼမ်ႉ-လူမ်း ၊ ၸွမ်သိုၵ်းလူင် ယႄးဝိၼ်းဢူး ၵႅမ်ၸွမ်ပွင်ၵၢၼ် လုမ်းႁူမ်ႇလူမ်ႈလႄႈ ၵႅတ်ႇၶႄၸိူဝ်ႉၸၢတ်ႈ ၸိူဝ်းၼႆႉ။ တႂ်ႈၶွမ်ႊမသျိၼ်ႊမႂ်ႇၼႆႉ မီး 29 ႁွင်ႈၵၢၼ် ။

ဝၢႆးလင်ပၢင်လိူၵ်ႈတင်ႈ 2020 ယဝ်ႉ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ၼႄၶေႃႈဢၢင်ႈဝႃႈ ပၢင်လိူၵ်ႈတင်ႈဢမ်ႇမီးလွင်ႈၽဵင်ႇပဵင်းၼႆသေ ယိုတ်းဢႃႇၼႃႇၸိုင်ႈမိူင်း မိူဝ်ႈဝၼ်းတီႈ 1/2/2021။ ပိုၼ်ၽၢဝ်ႇဝၢၼ်ႈမိူင်းပဵၼ်ငဝ်းလၢႆးၶိုၵ်ႉၶၵ်ႉ ၸွမ်းၼင်ႇ လၵ်းမိူင်း 2008 တွၼ်ႈၵၼ် 417/418 ။ ဝၢႆးၼၼ်ႉ တႃႇႁူမ်ႇလူမ်ႈၸိုင်ႈမိူင်းၼႆသေ မႃးၶွတ်ႇၽွတ်ႈ ၶွင်ႇသီႇႁူမ်ႇလူမ်ႈလႄႈၵႅတ်ႇၶႄၸိူဝ်ႉၸၢတ်ႈ ၸၵၸ ယဝ်ႉ တူဝ်မိၼ်းဢွင်ႇလၢႆႇ ၶိုၼ်ႈပဵၼ်ႁူဝ်ပဝ်ႈဝႆႉ။

ထိုင်မႃး သိုၵ်းယိုတ်းမိူင်းၶၢဝ်းတၢင်း 3 ပီ ၽွင်းပီ 2023-24 ၽိူဝ်ႇမၼ်းၸၢႆးမႃးၶိုင်တႃႇပၢင်လိူၵ်ႈတင်ႈ မၼ်းၸၢႆးယူႇတီႈႁူဝ်ပဝ်ႈ ၸၵၸ သေ ၶိုၼ်းမွပ်ႈတၼ်းႁဵင်းပၼ်တူဝ်ၵဝ်ႇပဵၼ် ၵႅမ်ၸွမ်ၸိုင်ႈ ၽွင်းသိုၵ်းယိုတ်းမိူင်းႁပ်ႉပဵၼ်လူင်ပွင်ၸိုင်ႈၸူဝ်ႈၶၢဝ်း။

တႅမ်ႈ- ၽူၺ်းၼုမ်ႇ