ၼႂ်းႁၢင်လိူၼ်ၵျူႊလၢႆႊ ဝၼ်းတီႈ 29 ထိုင် 30 ၶၢဝ်းတၢင်းသွင်ဝၼ်းၼႆႉၵူၺ်း သိုၵ်းမၢၼ်ႈၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇၼႂ်းဝဵင်းမိူင်းၵုတ်ႈ၊ ဝဵင်းမိူင်းငေႃႉ၊ ဝဵင်းၵူတ်ႉၶၢႆ ၸိူဝ်းပဵၼ်ၼႃႈတီႈသိုၵ်းတဢၢင်းၵုမ်းၵမ်ဝႆႉ ၸူဝ်ႈၶၢဝ်းၼၼ်ႉ ထပ်းၵၼ်ႁၢဝ်ႈႁႅင်း တိူဝ်ႉၺႃးႁိူၼ်းယေးၵူၼ်းမိူင်း လူႉၵွႆၵႂႃႇတင်းၼမ်လႄႈ ႁဵတ်းႁႂ်ႈၵူၼ်းမိူင်းမၢတ်ႇၸဵပ်းလူႉတၢႆၵႂႃႇၸွမ်း 30 ပၢႆ ၼႆယဝ်ႉ။
မိူဝ်ႈၼႆႉ ဝၼ်းတီႈ 30/07/2025 ယၢမ်းၵၢင်ၼႂ်ၸဝ်ႉၸမ် 1 မူင်းၼၼ်ႉ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇလူင် ႁႅင်း 250 ပွင်ႊ 2 လုၵ်ႈ တူၵ်းသႂ်ႇႁူင်းႁႅမ်း ယႃႇၸူႉတိတ်ႉ (2) ၼႂ်းပွၵ်ႉ 2 ဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ ၵူၼ်းမိူင်းလူႉတၢႆၵႂႃႇ 6 ၵေႃႉ မၢတ်ႇၸဵပ်းၵႂႃႇ 8 ၵေႃႉ ၼႆယဝ်ႉ။
ၼႂ်းၵူၼ်းမိူင်းၸိူဝ်းလူႉတၢႆလႄႈ မၢတ်ႇၸဵပ်းၵႂႃႇၼၼ်ႉ ပႃးလုၵ်ႈဢွၼ်ႇ ဢႃယုမွၵ်ႈ 10 ၶူပ်ႇ၊ ၵူၼ်းထဝ်ႈ ဢႃယု 70 ပၢႆလႄႈ ၵူၼ်းပၢႆႈၽေးသိုၵ်း ၸိူဝ်းလုၵ်ႉတၢင်းမိူင်းၶၢင် မႃးလိုဝ်ႈဝႆႉၸူဝ်ႈၶၢဝ်း ဢိၵ်ႇပႃး ၵူၼ်းႁေႃႈၵႃးတၢင်ႇၵုၼ်ႇ ၸဵမ်ၸိူဝ်းၼႆႉ – ၵူၼ်းမိူင်းဝဵင်းၵူတ်ႉၶၢႆ ၵေႃႉယူႇၼႂ်းပိုၼ်ႉတီႈ လၢတ်ႈၼႄၼင်ႇၼႆ။
“ဢမ်ႇထၢင်ႇဝႃႈ ၶဝ်တေမႃးပွႆႇမၢၵ်ႇသႂ်ႇတီႈႁဝ်းၸိူင်ႉၼႆ။ ၽိူဝ်ႇဝႃႈၵိုင်ႉၵၢင်ႉငိၼ်းသဵင်ႁိူဝ်းမိၼ်ၼႆၵေႃႈ သဵင်မၢၵ်ႇတႅၵ်ႇၵေႃႈမႃးၸွမ်း ၵမ်းလဵဝ်ယဝ်ႉ။ ဝၢႆးၶဝ်မႃးပွႆႇယဝ်ႉ တင်းၶိုၼ်းဢမ်ႇႁတ်းၼွၼ်းလပ်း။ ႁိူၼ်းဢၼ် ၸပ်းၵၼ်တင်းၾၢႆႇႁွင်ႇ ႁူင်းႁႅမ်းၼၼ်ႉၵေႃႈၵွႆ။ တူၵ်းၺႃးသႂ်ႇႁူင်းႁႅမ်းလီလီၼႃႇ ၸၼ်ႉတၢင်းၼိူဝ်သွင်ၸၼ်ႉၼၼ်ႉ ၵွႆႁႄ တိူဝ်ႉၺႃးၵူၼ်းထဝ်ႈ၊ လုၵ်ႈဢွၼ်ႇ ၸိူဝ်းမႃးလိုဝ်ႈဝႆႉၼၼ်ႉ။ ၸဝ်ႈၵႃးၵမ်ႈၽွင်ႈၵေႃႈ မၢတ်ႇၸဵပ်းၵႂႃႇၸွမ်း လၢႆလၢႆၵေႃႉ။”
မိူဝ်ႈဝၼ်းတီႈ 29 ယၢမ်းႁူဝ်ၶမ်ႈ 5 မူင်းၶိုင်ႈၼၼ်ႉ ႁိူဝ်းမိၼ်တိုၵ်း သိုၵ်းမၢၼ်ႈယိုတ်းမိူင်း ပွႆႇမၢၵ်ႇလူင် ႁႅင်း 250 ပွင်ႊ 1 လုၵ်ႈ တူၵ်းသႂ်ႇ ၼႂ်းပွၵ်ႉၶၼ်ႇၼီႇ ဝဵင်းမိူင်းလူင် တိူဝ်ႉၺႃး ႁိူၼ်းယေးၵူၼ်းမိူင်းလူႉၵွႆၵႂႃႇ 7 လင် ၵူၼ်းမိူင်း (ၸၢႆး) လူႉတၢႆၵႂႃႇ 1 ၵေႃႉ။ ယၢမ်းၵၢင်ၼႂ်မွၵ်ႈ 9 မူင်းၶိုင်ႈၼၼ်ႉၵေႃႈ ႁိူဝ်းမိၼ်တိုၵ်းသိုၵ်းမၢၼ်ႈ ပွႆႇမၢၵ်ႇသႂ်ႇၼႂ်းဝဵင်းမိူင်းၵုတ်ႈ တိူဝ်ႉ ၺႃးႁိူၼ်းၵူၼ်းမိူင်း လူႉၵွႆၵႂႃႇ 14 လင်၊ ၵူၼ်းတၢႆၵႂႃႇ 4 ၵေႃႉ၊ မၢတ်ႇၸဵပ်းၵႂႃႇ 18 ၵေႃႉ ၼႆယဝ်ႉ။
ဝၢႆးလင် သိုၵ်းမၢၼ်ႈယိုတ်းမိူင်း ၶဝ်ႈၵုမ်းၵမ်လႆႈၶိုၼ်း ဝဵင်းၼွင်ၶဵဝ်ယဝ်ႉလီငၢမ်း ၼႂ်းလိူၼ်ၵျူႊလၢႆႊၼႆႉ ၵူၺ်း သိုၵ်းမၢၼ်ႈၸီႉသင်ႇႁႂ်ႈ ႁိူဝ်းမိၼ်တိုၵ်း ၵႂႃႇပွႆႇမၢၵ်ႇသႂ်ႇၼႂ်းၸႄႈဝဵင်းၵျွၵ်ႉမႄး၊ ဝဵင်းမိူင်းငေႃႉ၊ ဝဵင်းမိူင်းလူင်၊ ဝဵင်းၼွင်ၶဵဝ်၊ ဝဵင်းသီႇပေႃႉလႄႈ ဝဵင်းမိူင်းၵုတ်ႈ ၸိူဝ်းပဵၼ်ၼႃႈတီႈသိုၵ်းတဢၢင်းၵုမ်းၵမ် ၸူဝ်ႈၶၢဝ်းၼၼ်ႉ ၶၢဝ်းတၢင်းၼိုင်ႈလိူၼ်ၵူၺ်း ၵူၼ်းမိူင်းလူႉတၢႆၵႂႃႇ 18 ၵေႃႉ၊ မၢတ်ႇၸဵပ်းၵႂႃႇ 38 ၵေႃႉ ႁူမ်ႈတင်းမူတ်း ၵူၼ်းမၢတ်ႇၸဵပ်းလူႉတၢႆ မီး 56 ၵေႃႉ ႁူင်းႁႅမ်းလႄႈ ႁိူၼ်းယေးၵူၼ်းမိူင်းမွၵ်ႈ 80 လင်ပၢႆ၊ ႁူင်းႁဵၼ်း 2 လင်၊ ဝတ်ႉဝႃးၽႃသိူဝ်ႇ 2 တီႈ လူႉၵွႆၵႂႃႇၸွမ်းႁၢဝ်ႈႁႅင်း။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ