မိူဝ်ႈဝၼ်းတီႈ 28 လိူၼ်ၵျူႊလၢႆႊ သိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဢွၵ်ႇ ပၵ်းပိူင်ၾိင်ႈမိူင်းတႃႇၵႅတ်ႇၶႄႇ ႁေႉၵင်ႈ ၶေႃႈမုလ်းလပ်ႉ ၾၢႆႇၵၢၼ်သိုၵ်း၊ ဢွၵ်ႇၶေႃႈပူင် ႁၢမ်ႈႁႂ်ႈၶႃႈႁၢပ်ႇၵၢၼ်ၶုၼ် ၵူၼ်းၵဝ်ႇ ၵူၼ်းမႂ်ႇတင်းသဵင်ႈ ဢမ်ႇပၼ်တိတ်းတေႃႇၵပ်းသိုပ်ႇ လႄႈ ၵမ်ႉၸွႆႈ ၸုမ်းယိပ်းၵွင်ႈၵၢင်ႇၸိူဝ်းလုၵ်ႉၽိုၼ်ႉ ဝႃႈၼႆ ။

ပၵ်းပိူင်တႃႇၵႅတ်ႇၶႄႁေႉၵင်ႈ ၶေႃႈမုလ်းလပ်ႉၼႂ်းၵၢၼ်သိုၵ်း ဢၼ်သိုၵ်းမၢၼ်ႈယိုတ်းမိူင်း မိၼ်းဢွင်ႇလၢႆႇ ႁဵတ်း ဢွၵ်ႇ တမ်းဝၢင်းဝႆႉ လူၺ်ႈမတ်ႉတႃ 44/2025 ၼႆႉ ပဵၼ်ၶေႃႈႁၢမ်ႈတွၼ်ႈတႃႇ ၵူၼ်းၸိူဝ်းပဵၼ်ၶႃႈႁၢပ်ႇၵၢၼ်ၶုၼ် ၼႂ်းႁွင်ႈၵၢၼ်ၽွင်းလူင်ၾၢႆႇၵႅတ်ႇၶႄ ၸိုင်ႈမိူင်းတင်းသဵင်ႈ လႄႈၸုမ်းပလိၵ်ႈမိူင်းမၢၼ်ႈ၊ ၸုမ်းသိုၵ်းပျီႇတူႉၸိတ်ႉၵူၼ်းၵဝ်ႇ ၵူၼ်းမႂ်ႇ တင်းသဵင်ႈ တိုၼ်းတေဢမ်ႇလႆႈ ဢဝ် လၢႆးၸတ်းၽႅၼ် ပိဝ်ႇႁႃႇ ၾၢႆႇၵၢၼ် သိုၵ်း လႄႈ ၶေႃႈမုၼ်း ၶိူင်ႈၸႂ်ႉတိုဝ်းၼႂ်းၶၵ်ႉၵၢၼ်သိုၵ်းတင်းသဵင်ႈ ၵႂႃႇၵမ်ႉၸွႆႈမွၵ်ႇလၢတ်ႈၼႄတီႈ ၸုမ်းယိပ်းၵွင်ႈၵၢင်ႇ ၸိူဝ်းထုၵ်ႇမၵ်း မၼ်ႈပဵၼ် ၸုမ်းလုၵ်ႉၽိုၼ်ႉသၢၼ်ၶတ်း လႄႈ ၵူၼ်းၸိူဝ်းႁဵတ်းၵၢၼ်ၾၢႆႇၸွႆႈထႅမ်လွင်ႈႁူမ်ႇလူမ်ႈ ၵူၼ်းမိူင်း ဢၼ်ဢမ်ႇထုၵ်ႇမႅၼ်ႈၸွမ်း ပၵ်းပိူင်ၸုမ်းသိုၵ်းမၢၼ်ႈယိုတ်းမိူင်းၶဝ်ႁဵတ်းဢွၵ်ႇဝႆႉၼၼ်ႉ ဝႃႈၼႆ။

ၼႂ်းၶေႃႈပိုၼ်ၽၢဝ်ႇ ပၵ်းပိူင်ၾိင်ႈမိူင်း ဢၼ်မိၼ်းဢွင်ႇလၢႆႇ ပိုၼ်ၽၢဝ်ႇဢွၵ်ႇဝႆႉၼၼ်ႉ ပိူင်းၸႅင်ႈၼႄဝႆႉဝႃႈ “ၶႃႈႁၢပ်ႇၵၢၼ်ၶုၼ် ၸူဝ်ႈၶၢဝ်းႁိုဝ် ၶၢဝ်းယၢဝ်းၵေႃႈယဝ်ႉ၊ ၸိူဝ်းပဵၼ်ၵူၼ်းၵဝ်ႇ ၵူၼ်းမႂ်ႇ တင်းသဵင်ႈ တိုၼ်းတေဢမ်ႇလႆႈၵမ်ႉၸွႆႈ ၸုမ်းယိပ်းၵွင်ႈၵၢင်ႇလုၵ်ႉ ၽိုၼ်ႉၸိူဝ်းဢမ်ႇၶဝ်ႈတၢင်းၵၢၼ် ၸိူဝ်းၵေႃႇတင်ႈမႃးၼႂ်းမိူင်း လူၺ်ႈဢမ်ႇထုၵ်ႇမႅၼ်ႈၸွမ်း ပၵ်းပိူင်ၸိုင်ႈမိူင်း၊ ၵၢၼ်ၾၢႆႇၸွႆႈထႅမ်လွင်ႈႁူမ်ႇလူမ်ႈၵူၼ်းမိူင်း ဢၼ်ဢမ်ႇတၢင်ႇမၢႆၾၢင်ဝႆႉၼၼ်ႉလႃးလႃး” ဝႃႈၼႆ။

လႆႈႁူႉဝႃႈ ၽူႈလႂ်ၽႂ်သေဢမ်ႇဝႃႈ ၸိူဝ်းပဵၼ်ၶႃႈႁၢပ်ႇၵၢၼ်ၶုၼ်တင်းသဵင်ႈၼႆႉ သင်ပူၼ်ႉပႅၼ်မႅၼ်ႈၶေႃႈၸိူဝ်းမၵ်းမၼ်ႈဝႆႉတင်းသဵင်ႈ ၼႆႉၸိုင် ၾၢႆႇသိုၵ်းမၢၼ်ႈ တေဢဝ်လိူင်ႈ ပၼ်တၢမ်ႇတူၵ်းထွင်ႇ လႄႈ တၢမ်ႇတၢႆၵႂႃႇလႆႈ ႁႂ်ႈထိုင်တီႈသုတ်း ၼႆယဝ်ႉ။

ၼႂ်းဝူင်ႈပူၼ်ႉၼႃးၼႆႉ မီးၸုမ်းဢမ်ႇႁူႉၾၢႆႇၶဝ်ႈလၵ်ႉၶေႃႈမုလ်းလပ်ႉၶႃႈႁၢပ်ႇၵၢၼ်သိုၵ်းမၢၼ်ႈသေ ပိုၼ်ၽၢဝ်ႇဝႃႈ – တေသူင်ႇပၼ်ၼႂ်းမိုဝ်းၸုမ်းယိပ်းၵွင်ႈၵၢင်ႇၵႂႃႇၼႆဢွၵ်ႇမႃး။ ဝၢႆးၼၼ်ႉဢမ်ႇႁိုင် ၼိုင်ႈဝူင်ႈၵေႃႈသိုၵ်းမၢၼ်ႈႁဵတ်းဢွၵ်ႇမၢႆမီႈႁႄႉၵင်ႈၶေႃႈမုလ်းမႃးၸိူင်ႉၼႆ။

တႅမ်ႈ-ၽူၺ်းၼုမ်ႇ