မိူဝ်ႈၼႆႉ ဝၼ်းတီႈ 24/07/2025 ယၢမ်းဝၢႆးဝၼ်း မွၵ်ႈ 3 မူင်း ၵူၼ်းၸၢႆးမွၵ်ႈႁႃႈၵေႃႉ ယိုဝ်းၼၢင်းယိင်းသွင်ၵေႃႉတၢႆ ႁိမ်းလုမ်းၸွပ်ႇၶၢဝ်ႇသိုၵ်းမၢၼ်ႈ ၾၢႆႇၼႃႈႁၢၼ်ႉၶၢႆ ၼမ်ႉၼဵင်ႈဝၢၼ် “ပီႇတိ” ၼႂ်းပွၵ်ႉၼိူဝ် ဝဵင်းမူႇၸေႊ ၸိုင်ႈတႆးပွတ်းႁွင်ႇ။
ၵူၼ်းၸၢႆး ဢႃႇယု 40 ပၢႆ ယူႇဝဵင်းမူႇၸေႊ ဢၼ်ႁူႉႁၼ်ၸွမ်းလွင်ႈၼႆႉ လၢတ်ႈၼႄတီႈၽူႈတွႆႇႁွၵ်ႈဝႃႈ “ ဢၼ်တၢႆၼႆႉ ပဵၼ်ၼၢင်းယိင်း 2 ၵေႃႉ။ တႃႇၵေႃႉၼိုင်ႈၼႆႉ ပၢႆပႃးတွင်ႉဝႆႉၵွၼ်ႇ။ တူၺ်းၶဝ် လႅပ်ႈပဵၼ်ၶႄႇ။ ၵူၼ်းၸၢႆးၸိူဝ်းမႃးယိုဝ်းၼၼ်ႉၵေႃႈ ၶီႇၵႃးမႃးၼင်ႇၵဝ်ႇ။ ၶဝ်ၵိုတ်းၵႃးယဝ်ႉ လူင်းၵႃးမႃး ယိုဝ်းသႂ်ႇၸမ်ၸမ်ၵမ်းလဵဝ် မၢၵ်ႇၵွင်ႈပေႃးမူတ်းမူၵ်ႇ။ ၽွင်းၼၼ်ႉ ႁဝ်းတိုၵ်ႉ ၼင်ႈၵိၼ်ၼမ်ႉၼဵင်ႈ ၼႂ်းႁၢၼ်ႉယူႇ” ဝႃႈၼႆ။
လႆႈႁူႉဝႃႈ ၼၢင်းယိင်းသွင်ၵေႃႉၼၼ်ႉ ဢႃႇယုတေမီးမွၵ်ႈ 40 ပီ ၶီႇၵႃး Crown သီၶၢဝ် လုၵ်ႉတၢင်းႁူင်းပလိၵ်ႈမႃးတၢင်း ႁၢၼ်ႉၼမ်ႉၼဵင်ႈသေ ၺႃးယိုဝ်းတၢႆထင်တီႈ ၸပ်းသႂ်ႇလုမ်း ၸယၽ (ၾၢႆႇၸွပ်ႇသွၵ်ႈ)ၼၼ်ႉၵမ်းလဵဝ် ။ ယၢမ်းလဵဝ် ၾၢႆႇပလိၵ်ႈ တိုၵ်ႉၸွမ်းၵူတ်ႇထတ်းသေ သွၵ်ႈႁႃ ၵူၼ်းၸိူဝ်းမႃးယိုဝ်းၸိူဝ်းၼၼ်ႉယူႇ ဝႃႈၼႆ။
ၼႂ်းဝဵင်းမူႇၸေႊၼႆႉ သိုၵ်းမၢၼ်ႈယိုတ်းမိူင်း ၵုမ်းၵမ်ဝႆႉၵမ်းသိုဝ်ႈ။ မီးပႃးၸုမ်းပျီႇတူႉၸိတ်ႉ၊ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း လၢႆလၢႆၸုမ်း။ ၸုမ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်းတၢင်းဢွၼ်ႊလၢႆး (ၸုမ်းၵျႃးၽႅၼ်ႉ) ၵေႃႈ လိူင်ႇၼမ်ႁႅင်း။ ၵမ်းၵမ်း မီးလွင်ႈၶႃႈႁႅမ်၊ လၵ်ႉၸူၼ်၊ ယိုဝ်းၵၼ်တၢႆ ။
တႅမ်ႈ-ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ