ယၢမ်းလဵဝ် တီႈႁူင်းႁဵၼ်းပရႁိတ လွႆလွမ်ႉ ဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇၼႆႉ မီးလုၵ်ႈႁဵၼ်းၼမ် ၶိုၼ်ႈမႃးလိူဝ်ၵူႈပီလႄႈ ၶူဝ်းၵုၼ်ႇၶွင်ၵိၼ်ယႅမ်ႉၸိူဝ်းၼႆႉၵေႃႈ ၵႃႈၶိုၼ်ႈ ႁဵတ်းႁႂ်ႈမေႃသွၼ်တင်း လုၵ်ႈႁဵၼ်းထူပ်းတၢင်းယၢပ်ႇၽိုတ်ႇ ၸဵမ်ၶဝ်ႈသၢၼ်လႄႈ တႃႇၵၢၼ်ၵိၼ်ယႅမ်ႉ ၸိူဝ်းၼႆႉ။

ၸဝ်ႈတူၼ်ၶူး ပၺ်ႇၺႃႇသႃမိ ၽူႈၵွၼ်းႁူင်းႁဵၼ်း လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈယၢပ်ႇတႄႉ တီႈႁူင်း ႁဵၼ်းႁဝ်းပီၼႆႉ လုၵ်ႈဢွၼ်ႇတိူဝ်းၼမ်မႃးလိူဝ်ၵူႈပီဢိူဝ်ႈ။ လုၵ်ႈႁဵၼ်းတင်းမေႃသွၼ်ၼႆႉ တေႃႈလဵဝ်မီးယူႇ 200 ၵေႃႉ။ လွင်ႈၵိၼ်လွင်ႈယႅမ်ႉၼႆႉ ၼိုင်ႈဝၼ်းလႂ်သဵင်ႈသွင်ပွတ်းၼၼ်ႉၼႃႇ။ ၵွပ်ႈၼႆ တင်းဢၼ်မီးဝႆႉသေ မၼ်းၵေႃႈဢမ်ႇၵုမ်ႇၵိၼ်ၼၼ်ႉၼႃႇ။ ယွၼ်ႉပိူဝ်ႈ ၶဝ်ႈသၢၼ်ၵႃႈၵေႃႈႁင်းမၼ်း၊ ၵုၼ်ႇၵႃႉတၢင်းၶၢႆၵႃႈၵေႃႈ ႁင်းမၼ်းဢိူဝ်ႈ။ လွင်ႈၶဝ်ႈလွင်ႈၽၵ်းၼႆႉ ပေႃးၶၢဝ်းႁိုင်မႃး မၼ်းတေဢမ်ႇငၢႆႈယဝ်ႉ”- ဝႃႈၼႆ။

ယၢမ်းလဵဝ် တီႈႁူင်းႁဵၼ်းပရႁိတ လွႆလွမ်ၼႆႉ လုၵ်ႈႁဵၼ်းၶဝ် လႆႈၵိၼ်ၶဝ်ႈ ၼိုင်ႈတႃႇလႂ် ၽၵ်းၼိုင်ႈမီႇၵူၺ်း ဝႃႈၼႆ။

မေႃသွၼ် ၸၢႆးၸၢမ်ႇၺုၼ်ႉ လၢတ်ႈတီႈၽူႈတွႆႇႁွၵ်ႈဝႃႈ -“လွင်ႈယၢပ်ႇၽိုတ်ႇ တီႈႁူင်းႁဵၼ်းႁဝ်းၶႃႈတႄႉ ဢိင်ၼိူဝ်ငဝ်းလၢႆးဝၢၼ်ႈမိူင်းၼႆႉသေ တီႈႁူင်းႁဵၼ်းႁဝ်းၶႃႈ မီးလွင်ႈယၢပ်ႇၽိုတ်ႇ လွင်ႈၵိၼ်ယႅမ်ႉ ၶဝ်ႈသၢၼ်ၸိူဝ်းၼႆႉ။ မိူဝ်ႈလဵဝ် ငဝ်းလၢႆးၵေႃႈဢမ်ႇပေႃးၶႅမ်ႉ သမ်ႉပဵၼ်မႃးလွင်ႈယၢပ်ႇၽိုတ်ႇၵူႈလွင်ႈလွင်ႈၸိူင်ႉၼႆ ၶဝ်ႈၽၵ်းၼႆႉ ႁဝ်းလႆႈလဵင်ႉလုၵ်ႈဢွၼ်ႇ ၼိုင်ႈတႃႇၼႆႉ ၽၵ်းၼိုင်ႈမီႇၵူၺ်းယဝ်ႉၶႃႈဢေႃႈ”- ဝႃႈၼႆ။

လုၵ်ႈႁဵၼ်း ဢၼ်မႃးၶိုၼ်ႈတီႈႁူင်းႁဵၼ်းပရႁိတၼႆႉ မီးဝႆႉလၢႆသႅၼ်း ၵမ်ႈၽွင်ႈ ပဵၼ်လုၵ်ႈဢွၼ်ႇၽၢၼ် ပေႃႈမႄႈ၊ ၵမ်ႈၽွင်ႈ ပဵၼ်လုၵ်ႈဢွၼ်ႇ ဢၼ်လႆႈပၢႆႈၽေးသိုၵ်းသေ ၶၢတ်ႇတိုဝ်ႉတၢင်းၵၢၼ်ႁဵၼ်းဝႆႉ ၸိူဝ်းၼႆႉ။

“လုၵ်ႈဢွၼ်ႇႁဵၼ်းၸိူဝ်းၼႆႉ မၼ်းၵေႃႈမီးယူႇ 4 သႅၼ်း။ သႅၼ်းၼိုင်ႈၵေႃႈ ပဵၼ်လုၵ်ႈဢွၼ်ႇ ၽၢၼ်ပေႃႈမႄႈ။ ထႅင်ႈသႅၼ်းၼိုင်ႈသမ်ႉ ၼႃႈႁိူၼ်းၸိူဝ်းဢၼ်မီးလုၵ်ႈဢွၼ်ႇၼမ် သၢမ်သီႇၵေႃႉသေ ဢမ်ႇပၼ်ၶိုၼ်ႈ ႁူင်းႁဵၼ်းလႆႈ။ သမ်ႉထႅင်ႈလုၵ်ႈဢွၼ်ႇတၢင်းဝၢၼ်ႈၼွၵ်ႈၼႆႉ လႆႈၶိုၼ်ႈႁူင်းႁဵၼ်းထိုင်ၸၼ်ႉသီႇသေ ၶၢတ်ႇႁဵၼ်းၵႂႃႇ လႆႈႁႃတိုဝ်ႉတၢင်းပၼ်ၸိူဝ်းၶဝ် ႁႂ်ႈမႃးသိုပ်ႇၶိုၼ်ႈတီႈႁူင်းႁဵၼ်းၼႆႉ။ ထႅင်ႈသႅၼ်းၼိုင်ႈသမ်ႉ ၵူၼ်းဢၼ်ၸမ်ပဵၼ် မိူၼ်ၼင်ႇ လုၵ်ႈဢွၼ်ႇဢၼ်လႆႈပၢႆႈၽေးသိုၵ်း ၸိူဝ်းၼႆႉထႅင်ႈ”- ၸဝ်ႈတူၼ်ၶူး ပၺ်ႇၺႃႇသႃမိ သိုပ်ႇလၢတ်ႈၼႄၼင်ႇၼႆ။

ႁူင်းႁဵၼ်းပရႁိတ လွႆလွမ်ႉၼႆႉ တေမီးၸၼ်ႉႁဵၼ်း ၸၼ်ႉဢွၼ် (KG) ထိုင် ၸၼ်ႉသီႇ (G4) ၵူၺ်း။ လုၵ်ႈႁဵၼ်း ၸိူဝ်းလူဝ်ႇၶိုၼ်ႈၸၼ်ႉၵၢင်လႄႈ ၸၼ်ႉသုင်တႄႉ လႆႈသူင်ႇၵႂႃႇႁဵၼ်းတီႈႁူင်းႁဵၼ်းၸၼ်ႉသုင် မၢႆ (1) ဝဵင်းတၢင်ႉယၢၼ်း။

“ၵၢၼ်သွၼ်ႁဵၼ်းႁဝ်းၶႃႈတႄႉ လုၵ်ႈႁဵၼ်းႁဝ်းၶႃႈ မွၵ်ႈ 200 ၵေႃႉၼႆႉ တေမီးယူႇၸၼ်ႉ KG တေႃႇထိုင် G 10 ။ ပေႃးဝႃႈ ၸၼ်ႉ KG  တေႃႇထိုင် ၸၼ်ႉ G4 တႄႉ ၶႃႈၶဝ်တေသွၼ် ၼႂ်းႁူင်းႁဵၼ်းၼႆႉၵူၺ်း။ ၵူၺ်းၵႃႈ ပေႃးပူၼ်ႉ G4 လူဝ်ႇၶိုၼ်ႈ G5 တေႃႇထိုင် G10 တႄႉ ၶႃႈၶဝ်တေလႆႈႁပ်ႉသူင်ႇပၼ် တီႈဢထၵ (1) ၼႂ်းဝဵင်းၼၼ်ႉဢေႃႈ။ ဢၼ်လႆႈၵႂႃႇၶိုၼ်ႈၼႂ်းဝဵင်းတႄႉ တေမီးယူႇ 60 ပၢႆ”- မေႃသွၼ် ၸၢႆးၸၢမ်ႇၺုၼ်ႉ သိုပ်ႇလၢတ်ႈၼႄၼင်ႇၼႆ။

တီႈႁူင်းႁဵၼ်းၼႆႉ ၼွၵ်ႈလိူဝ် လွင်ႈၵိၼ်ယႅမ်ႉ တီႈယူႇတီႈၼွၼ်းယဝ်ႉ တႃႇငိုၼ်းလိူၼ်မေႃသွၼ်ၵေႃႈ ယင်းတိုၵ်ႉမီးလွင်ႈယၢပ်ႇထႅင်ႈမိူၼ်ၵၼ်။

ၸဝ်ႈတူၼ်ၶူး ပၺ်ႇၺႃႇသႃမိ သိုပ်ႇလၢတ်ႈဝႃႈ -“ပေႃးလုၵ်ႈဢွၼ်ႇၼမ်မႃးၵေႃႈ လွင်ႈၵိၼ်လွင်ႈယႅမ်ႉၼႆႉ မၼ်းမီးလွင်ႈယၢပ်ႇမႃးယဝ်ႉ။ တီႈယူႇတီႈၼွၼ်းၵေႃႈ တိုၵ်ႉမီးလွင်ႈယၢပ်ႇၸႂ်ထႅင်ႈဢၼ်ၼိုင်ႈ။ ယွၼ်ႉဝႃႈ ပဵၼ်မႆႉပူၵ်ႇမႆႉမွင် ဢၼ်ႁဵတ်းဝႆႉလႆႈၶၢဝ်းတၢင်း 6 ပီၼႆႉ တိုၵ်ႉမီးယူႇထႅင်ႈ 2 လင်ၵူၺ်း။ ၸိူဝ်းၼႆႉယဝ်ႉ ပဵၼ်လွင်ႈယၢပ်ႇပိူင်လူင်မၼ်း။ ၼွၵ်ႈလိူဝ်ၸိူဝ်း ၼၼ်ႉယဝ်ႉ တႃႇငိုၼ်းလိူၼ်မေႃသွၼ်ၵေႃႈ ပေႃးပၼ်မိူၼ်ၼင်ႇ ၵူႈပီတႄႉ မၼ်းဢေႇႁႅင်းၽႅဝ် ၼႆႉၵေႃႈယၢပ်ႇၽိုတ်ႇဝႆႉ။ ဢၼ်ယၢပ်ႇၽိုတ်ႇဝႆႉတႄႉ မီး 3 ႁူဝ်ၶေႃႈၼႆႉဢိူဝ်ႈ ”- ဝႃႈ ၼႆ။

ႁူင်းႁဵၼ်းပရႁိတ လွႆလွမ်ႉ ဝဵင်းတၢင်ႉယၢၼ်းၼႆႉ ယူႇတီႈသင်ၶၸဝ်ႈ၊ ၸုမ်းဝူင်းမႅတ်ႉတႃႇလႄႈ ၵူၼ်းမိူင်း ပိုၼ်ႉတီႈဝဵင်းတၢင်ႉယၢၼ်း ႁူမ်ႈၵၼ်သေ ပိုတ်ႇသွၼ်ႁဵၼ်းမႃး တင်ႈတႄႇပီ 2018 တေႃႇထိုင်ယၢမ်းလဵဝ် မီးမႃးၶၢဝ်းတၢင်း 7 ပီယဝ်ႉ။ ၽွင်းတႄႇပိုတ်ႇႁူင်းႁဵၼ်းၼၼ်ႉ လုၵ်ႈဢွၼ်ႇဢၼ်မႃးၶိုၼ်ႈႁဵၼ်း မီးဢမ်ႇတဵမ်ပၢၵ်ႇၵေႃႉသေတႃႉ ၵူၺ်းၵႃႈ ဝၢႆးသိုၵ်းမၢၼ်ႈ ယိုတ်းမိူင်း၊ ၵူၼ်းမိူင်းႁႃၵိၼ်လဵင်ႉတွင်ႉယၢပ်ႇ ပၢင်တိုၵ်းလိူင်ႇၼမ်မႃးၶိူဝ်းယႂ်းလႄႈ ယၢမ်းလဵဝ် လုၵ်ႈႁဵၼ်းမီးဢမ်ႇယွမ်း 2 ပၢၵ်ႇၵေႃႉယဝ်ႉ။