ဝၢႆးသိုၵ်းမၢၼ်ႈ ၶဝ်ႈၵုမ်းဝဵင်းလႃႈသဵဝ်ႈၼႆႉမႃး ယိင်ႈၶႅၼ်းႁဵတ်းႁႂ်ႈၽူႈလၵ်ႉၸၵ်ႉၶုတ်ႈ လိူင်ႇၼမ်မႃး မၢင်ၸိူဝ်း တတ်းဢဝ်သၢႆၾႆးၾႃႉ ၵႂႃႇၶၢႆၵေႃႈမီးလႄႈ ႁဵတ်းႁႂ်ႈၵူၼ်းမိူင်း ဢွၼ်ၵၼ်မႆႈၸႂ်လွင်ႈႁူမ်ႇလူမ်ႈ ၼႆယဝ်ႉ။
ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၽူႈလၵ်ႉၼႆႉ ၵမ်ႈၼမ် ၶဝ်တေလၵ်ႉသၢႆၾႆးဢေႃႈ။ ၶဝ်တေဢဝ် သၢႆတွင်းၼႂ်းမၼ်းၵႂႃႇၶၢႆ။ ၽူႈလၵ်းၸိူဝ်းၼၼ်ႉၵေႃႈ ပဵၼ်ၶီႈယႃႈ ၶဝ်ဢမ်ႇမီးၵႃႈယႃႈလႄႈ ၸင်ႇမႃးလၵ်ႉသၢႆၾႆးၵႂႃႇၶၢႆ။ ၸွမ်းႁိူၼ်းယေး ၸိူဝ်းၼႆႉ မၢင်ႁိူၼ်း ဢမ်ႇမီးၵူၼ်းယူႇ ၶဝ်ၶဝ်ႈၼႂ်းႁိူၼ်းသေ ယႃႉတိုမ်းႁိူၼ်း သၢႆၾႆး ၸိူဝ်းၼၼ်ႉယဝ်ႉ ဢဝ်ၵႂႃႇ။ တီႈႁိူၼ်းႁဝ်းၵေႃႈ ၺႃးလၵ်ႉဢေႃႈ။ ၶဝ်ၵႂႃႇ တတ်းတီႈလၵ်းသဝ်ၾႆးသေ သၢႆၾႆးၼၼ်ႉ တူၵ်းမႃးၵႃႈႁိုဝ်ၵေႃႈ ၶဝ်ဢဝ်ၵႂႃႇမူတ်း”- ဝႃႈၼႆ။
ယၢမ်းလဵဝ် တီႈဝဵင်းလႃႈသဵဝ်ႈၼႆႉ ၵူၼ်းပၢႆႈၽေးသိုၵ်းၶဝ် ဢွၼ်ၵၼ်ပွၵ်ႈမႃးယူႇၶိုၼ်းၼမ်ယဝ်ႉလႄႈ ယွၼ်ႉၼၼ် ၽူႈလၵ်ႉၶဝ်တေဢမ်ႇၸၢင်ႈၶဝ်ႈလၵ်ႉ မိူၼ်မိူဝ်ႈဢွၼ်တၢင်းၼၼ်ႉယဝ်ႉ။ ၵွပ်ႈၼႆလႄႈ ၶဝ်ၸင်ႇလၵ်ႉသၢႆၾႆးၵႂႃၶၢႆ ၼႆယဝ်ႉ။
“ၵူၼ်းႁိူၼ်း မၢင်ၸိူဝ်းၼႆႉ ဢမ်ႇမီးငိုၼ်းတႃႇတေမႄးၶိုၼ်းယဝ်ႉလႄႈ ၾႆးမႃးၵေႃႈ ဢမ်ႇၸၢင်ႈႁဵတ်းႁိုဝ် ဢမ်ႇလႆႈတႆႈ ယွၼ်ႉၽူႈလၵ်ႉၶဝ် ဢဝ်သၢႆၾႆးၶၢတ်ႇပႅတ်ႈယဝ်ႉ။ ဢၼ်ၶဝ်ႁဵတ်းၵႂႃႇတႄႉ ငၢႆႈငၢႆႈၵူၺ်း ၸဝ်ႈႁိူၼ်းဢိူဝ်ႈ လႆႈၶၢမ်ႇၼႆႉ”- ၵူၼ်းပိုၼ်ႉတီႈ ဝဵင်းလႃႈသဵဝ်ႈ သိုပ်ႇလၢတ်ႈၼင်ႇၼႆ။
မၢင်ဝၼ်း ပၢႆမီးၵူၼ်းႁၢႆႉ ပႂ်ႉၸူၼ်ၸွမ်းတႃႈၸွမ်းတၢင်းၵေႃႈမီးလႄႈ ႁဵတ်းႁႂ်ႈၵူၼ်းမိူင်း လႆႈမႆႈၸႂ်ပႃး လွင်ႈႁူမ်ႇလူမ်ႈသၢႆၸႂ် ၽွင်းတေဢွၵ်ႇၵၢင်ၶမ်ႈၵၢင်ၶိုၼ်းလႄႈ ၽွင်းတေၵႂႃႇသူၼ် ႁႆႈၼႃး ၸိူဝ်းၼၼ်ႉ။
“ပေႃးၵႂႃႇၵေႃႉလဵဝ်တႄႉ ၵူဝ်ဢေႃႈ။ ပေႃးဢမ်ႇၵႂႃႇၸွမ်းၵၼ် 2-3 ၵေႃႉတႄႉ။ လွင်ႈၸၵ်ႉၶုတ်ႈၼႆႉ မိူဝ်ႈဝူင်ႈပူၼ်ႉမႃးၼၼ်ႉ ပိူၼ်ႈၵႂႃႇႁပ်ႉလုၵ်ႈဢွၼ်ႇၵျွင်းသေ ၵူၼ်းႁၢႆႉၼၼ်ႉ ႁိမ်ဢဝ်ရူတ်ႉၶိူင်ႈပိူၼ်ႈ။ ယွၼ်ႉၼၼ် ၵႂႃႇၵေႃႉလဵဝ်တႄႉ ဢမ်ႇၶႂ်ႈႁတ်းၵႂႃႇ ပေႃးဢမ်ႇပႃးၵေႃႉပႃးသေႈၵႂႃႇၸွမ်းၵၼ်။ လွင်ႈႁူမ်ႇလူမ်ႈတႄႉ လႆႈမႆႈၸႂ်ဢေႃႈ ၵၢင်ၶမ်ႈ 7-8 မူင်းတႄႉ ႁဝ်းၶႃႈ ဢမ်ႇႁတ်းဢွၵ်ႇႁိူၼ်းယဝ်ႉ”- ၵူၼ်းပိုၼ်ႉတီႈ ဝဵင်းလႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။
ယၢမ်းလဵဝ် ၼႂ်းဝဵင်းလႃႈသဵဝ်ႈၼႆႉ ၾၢႆႇသိုၵ်းမၢၼ်ႈ ၶဝ်ႈၵုမ်းၵမ်ဝႆႉၶိုၼ်းယဝ်ႉသေတႃႉ ၵဵဝ်ႇလူၺ်ႈလွင်ႈ ၽူႈလၵ်ႉၸၵ်ႉၶုတ်ႈၸိူဝ်ႈၼႆႉ ၶဝ်ပႆႇၸတ်းၵၢၼ်ပၼ်သင်လႆႈတႄႉတႄႉ။ သင်တီႉၺွပ်းလႆႈၵေႃႈ ၶဝ်တေၶင်ဝႆႉၸူဝ်ႈၶၢဝ်းသေ ပွႆႇပၼ်ၶိုၼ်းၵူၺ်း။
“ၶဝ်ဢမ်ႇဢဝ်ပၼ် ဢယေးသင်ၶႃႈ၊ ပေႃးမီးၵူၼ်းဢဝ်ငိုၼ်းၵႂႃႇမွၼ်ပၼ်တႄႉ တေလႆႈယူႇယူဝ်ႉ ၶဝ်ၵေႃႈ တေႁဵတ်းၵႅင်ႈမႃးတူၺ်းပၼ်ယူႇ။ ထႃႈႁႂ်ႈၺွပ်းပၼ်တႄႉ ၶဝ်တေဢမ်ႇၺွပ်း၊ မိူၼ်ၼင်ႇ ႁဝ်းၺွပ်းလႆႈသေ ၵႂႃႇသူင်ႇပၼ်ၶဝ် ပေႃးထႅင်ႈ 3-4 ဝၼ်းမႃး ၶဝ်ပေႃးပွႆႇမႃးၶိုၼ်းယဝ်ႉ။ ၸင်ႇဝႃႈ လူဝ်ႇဢႃးၵူဝ်းတူဝ်ၸႂ်ၽႂ် မၼ်းၵူၺ်းယဝ်ႉ”- ၵူၼ်းပိုၼ်ႉတီႈ ဝဵင်းလႃႈသဵဝ်ႈ သိုပ်ႇလၢတ်ႈၼႄၼင်ႇၼႆထႅင်ႈ။
ပူၼ်ႉမႃး မိူဝ်ႈႁၢင်လိူၼ်ဢေႊပရိူဝ်ႊ ပီ 2025 ၼၼ်ႉၵေႃႈ ၼၢင်းယိင်းၵေႃႉၼိုင်ႈ ၺႃးၸူၼ်ၾူၼ် ၸွမ်းတၢင်းလႄႈ ၺႃးၽႃႉၽၼ်းတီႈမိုဝ်းသေ လႆႈမၢတ်ႇၸဵပ်းယဝ်ႉပွၵ်ႈၼိုင်ႈ။ ၼၼ်ႉၵေႃႈ တေႃႇထိုင်ဝၼ်းမိူဝ်ႈၼႆႉ ဢမ်ႇတီႉၺွပ်းလႆႈ ၵူၼ်းၸိူဝ်းၼၼ်ႉ။ ယွၼ်ႉၼၼ် ၵူၼ်းမိူင်းတႄႉ လႆႈၾၢင်ႉၵိၼ်ယူႇသဝ်းဝႆႉ ႁင်းၽႂ်မၼ်းၵူၺ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ