ဝၼ်းတီႈ 23/07/2025 ယၢမ်းၵၢင်ဝၼ်း 11 မူင်းၶိုင်ႈ ၾႆးမႆႈ ႁၢၼ်ႉၶၢႆၼမ်ႉမၼ်းၸၢၵ်ႈ ပၢမ်ႉၼမ်ႉမၼ်းႁူဝ်ဝဵင်း (မြို့ဦးဆီဆိုင်) ဢၼ်မီးၾၢႆႇတူၵ်းတၢင်း ႁိမ်းၼွင်မူဝ် တၢင်းၶဝ်ႈဝဵင်းသႅၼ်ဝီ ၼိူဝ်သဵၼ်ႈတၢင်းလူင်ၵၢၼ်ၵႃႉၶၢႆ လႃႈသဵဝ်ႈ-မူႇၸေႊ-ၶျိၼ်ႊသူၺ်ႇႁေႃႇ ၸိုင်ႈတႆးပွတ်းႁွင်ႇ။ ၸဝ်ႈၶွင်ႁၢၼ်ႉ လူႉသုမ်းငိုၼ်း ၼပ်ႉႁူဝ်မိုၼ်ႇသႅၼ်ပျႃး၊ လုၵ်ႈၸၢႆးၸဝ်ႈႁၢၼ်ႉၶၢႆၼမ်ႉမၼ်း မၢတ်ႇၸဵပ်းႁၢဝ်ႈႁႅင်း ဝႃႈၼႆ။

လွင်ႈတၢင်းဢၼ်ၾႆးမႆႈ ႁၢၼ်ႉၶၢႆၼမ်ႉမၼ်းၸၢၵ်ႈ ထၢတ်ႈသီႇ၊ တီႇၸႄႇ တီႈႁူဝ်ဝဵင်းသႅၼ်ဝီၼႆႉ ယွၼ်ႉၶႆႇၾႆး ဢၼ်ၵူၼ်းႁဵတ်းၵၢၼ် ၶဝ်သေႃႇဝရိင်ႇ ၼႂ်းဝၢင်းႁၢၼ်ႉၶၢႆၼမ်ႉမၼ်းၸၢၵ်ႈၼၼ်ႉ ၵႂႃႇတူၵ်းတိူဝ်ႉသႂ်ႇၺႃး ၼမ်ႉမၼ်းၸၢၵ်ႈသေ ဢဝ်ၾႆးၽုပ်ႉၵႂႃႇၼႆ ၼၢင်းယိင်း ဢႃႇယု 30 ပၢႆ ယူႇဝႆႉၼႂ်းဝဵင်းသႅၼ်ဝီ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“ၶဝ်မဝ်မၢင်ႁင်းၵွႆးၵေႃႈပႃးၽွင်ႈဢိူဝ်ႈ။ ၼႂ်းဝၢင်းၼၼ်ႉ ၶဝ်တေႁဵတ်းဢွင်ႈတီႈဝႆႉၼမ်ႉမၼ်းထႅင်ႈၼႆႁႄ သေႃႇလဵၵ်းတင်းဝၼ်းတင်း ဝၼ်းယဝ်ႉ။ ၵၢင်ၼႂ်ၼႆႉ ၵတ်ႉၵႃႈ ၾူၼ်လူမ်းဢမ်ႇမႃးဢိူဝ်ႈ။ သင်ဢမ်ႇၼၼ်တႄႉ ၾႆးတေလၢမ်းႁႅင်း။ ႁိူၼ်းၶဝ်တင်း သႅင်ႇ (ႁၢၼ်ႉၶၢႆ) ၶဝ်ၸပ်းၵၼ်ဝႆႉၼႃႇ။ ၾႆးမႆႈၵႂႃႇတင်းသွင်လင်ယဝ်ႉ။ ၼၢႆးၸဝ်ႈၶွင်လၢၼ်ႉၼၼ်ႉ တၼ်းလႆႈတိူၵ်ႈငိုၼ်းၶဝ်ဢွၵ်ႇမႃး တိူၵ်ႈၼိုင်ႈၵွႆး။ လုၵ်ႈၸၢႆးမၼ်းၵေႃႈ ၺႃးၾႆးၽုပ်ႉႁႄ မိူဝ်ႈလဵဝ် ၵႂႃႇၽႃႇတတ်းဝႆႉ မီးတီႈႁူင်းယႃၼႂ်းဝဵင်းသႅၼ်ဝီၼႆႉယူႇ။”

ယွၼ်ႉႁၢၼ်ႉၶၢႆၼမ်ႉမၼ်းၸၢၵ်ႈ မီးႁိမ်းၶၢင်ႈ သဵၼ်ႈတၢင်းလူင် ၵၢၼ်ၵႃႉၶၢႆ လႃႈသဵဝ်ႈ-မူႇၸေႊ-ၶျိၼ်ႊသူၺ်ႇႁေႃႇ လႄႈ ၾၢႆႇၸဝ်ႈ ၼႃႈတီႈ သိုၵ်းၵဝ်ႈၵၢင်ႉၶဝ် လႆႈဢိုတ်းသဵၼ်ႈတၢင်းဝႆႉ တင်ႈတႄႇယၢမ်းၾႆးမႆႈ တေႃႇထိုင် ယၢမ်းလဵဝ် ဝၢႆးဝၼ်း 4 မူင်းၼႆႉ ဢမ်ႇပၼ်ရူတ်ႉၵႃး လတ်းၵႂႃႇမႃး ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈ ဝဵင်းသႅၼ်ဝီလၢတ်ႈၼႄတီႈၽူႈတွႆႇႁွၵ်ႈဝႃႈ “ၾႆးၽုပ်ႉႁႅင်းၼႃႇဢႃးလႃးလႄႈ ရူတ်ႉၵႃးပေႃးလႆႈ ၵိုတ်းပႅတ်ႈ သဵင်ႈ။ ဢမ်ႇၸၢင်ႈၵႂႃႇမႃး။ သိုၵ်းၵဝ်ႈၵၢင်ႉၶဝ်ၵေႃႈ ႁေႉတၢင်းဝႆႉ။ တေႃႇထိုင်ယၢမ်းလဵဝ် ( 4 မူင်းပၢႆ) ၼႆႉ ၾႆးတိုၵ်ႉၵႂၼ်းတုၺ်းတုၺ်းႁႄ ၽုပ်ႉၶိုၼ်းထႅင်ႈလႄႈ သိုၵ်းလွႆ ႁႄႈ သိုၵ်းၵဝ်ႈၵၢင်ႉမႃးၸွႆႈၶႄၾႆးယူႇ။ ပီႈႁၼ် ၵႃးၶႄၾႆး ဢၼ်ပႃးတသိၵ်ႈ (မိၵ်ႈမၢႆ) သိုၵ်းလွႆ မႃးၸွႆႈၶႄယူႇ 3 လမ်းၼႆႉဢိူဝ်ႈ။ ၵႃးၶႄၾႆးတီႈႁဝ်းတႄႉ ႁၼ်မီးၼိုင်ႈလမ်းၵွႆး။ ထႅင်ႈလမ်းၼိုင်ႈတႄႉ ၶဝ်ၵႂႃႇဢဝ်တီႈလႂ်မႃးဢမ်ႇ တၼ်းႁူႉ။ တင်းမူတ်းလႆႈၸႂ်ႉၵႃးၶႄၾႆး 5 လမ်းၼႃႇ။ ၶဝ်ၵႂႃႇလုတ်ႇဢဝ်ၼမ်ႉၼႂ်းၼွင်ၼၼ်ႉ မႃးႁူတ်းႁႄ ၸင်ႇမွတ်ႇၵႂႃႇ။ ၾႆးၼႆႉ မႆႈႁိုင်တေႉႁိုင်ဝႃႈၼင်ႇၵဝ်ႇ” ဝႃႈၼႆ။

တေႃႇထိုင်ယၢမ်းၵၢင်ၶမ်ႈၼႆႉ ၾၢႆႇၸဝ်ႈၼႃႈတီႈ သိုၵ်းၵဝ်ႈၵၢင်ႉ တိုၵ်ႉပိုတ်ႇပၼ်သဵၼ်ႈတၢင်းရူတ်ႉၵႃးၵႂႃႇမႃး ဢိတ်းဢီႈၵွႆးသေ ယွၼ်ႉရူတ်ႉၵႃးၸိူဝ်းတေ ၶိုၼ်ႈ တေလူင်း ၶမ်ၵၼ်ဝႆႉ ၼိုင်ႈၾၢႆႇၼပ်ႉႁူဝ်ပၢၵ်ႇလမ်းမၼ်းလႄႈ ယၢမ်းလဵဝ် တိုၵ်ႉၶတ်းၸႂ်ပွႆႇပၼ်ၼိုင်ႈၾၢႆႇလႂ် ၵမ်းဢိတ်းဢိတ်း ယူႇ ၼႆယဝ်ႉ။

တႅမ်ႈ-ၽူၺ်းၼုမ်ႇ