ၼႂ်းႁၢင်လိူၼ်ၵျူႊလၢႆႊၼႆႉ သိုၵ်းမၢၼ်ႈယိုတ်းမိူင်း တင်း ပလိၵ်ႈၾၢႆႇၵူတ်ႇထတ်းရူတ်ႉၵႃး ႁူမ်ႈၵၼ် တေပႂ်ႉတီႉၺွပ်းဢဝ် ရူတ်ႉၵႃးၸိူဝ်း ဢမ်ႇမီးဝႂ်လၢႆႊသိၼ်ႊ ၸွမ်းၵၢင် ဝဵင်းလူင်လႃႈသဵဝ်ႈ လႄႈ ၸွမ်းသဵၼ်ႈတၢင်းလူင် ၼႂ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ဝႃႈၼႆ။

ၾၢႆႇၸဝ်ႈၼႃႈတီႈၶဝ် ပၼ်ၾၢင်ႉ ၵူၼ်းၼႂ်းပိုၼ်ႉတီႈၸိူဝ်းၸမ်ၸႂ်ၵၼ်တင်းၶဝ်ၼၼ်ႉဝႆႉဝႃႈ တႄႇဝၼ်းတီႈ 23 လိူၼ်ၵျူႊလၢႆႊ 9 မူင်းတေႃႇ တၢမ်းၶမ်ႈ 5 မူင်း တေပႂ်ႉၵူတ်ႇထတ်းတီႉၺွပ်းၸွမ်း ႁိမ်းႁူင်းႁေႃမဵဝ်ႉတေႃႇၶၢၼ်းမ ၵၢင်ဝဵင်း လႄႈ ၸွမ်းသဵၼ်ႈတၢင်း မၢၼ်းတလေးလၢၼ်းၼႆ ၸၢႆးဢူး ဢႃႇယု 40 ပၢႆ ယူႇဝႆႉ ၼႂ်းဝဵင်းလႃႈသဵဝ်ႈ လၢတ်ႈၼႄၼင်ႇၼႆ။

“ငိၼ်းဝႃႈၶဝ်တေႁဵတ်း သပလၢႆးၶျႅၵ်ႉ (Supply check) ႁႄၺွပ်း။ ၼိုင်ႈဝၼ်းၼႆႉ ၶဝ်တေၺွပ်းတႃႇ 10 လမ်း။ ၸိူဝ်းၼႆႉ ၶဝ်တေဢမ်ႇမီးသုၼ်ႇ ထုတ်ႇဢဝ်လႆႈၶိုၼ်း။ ၼွၵ်ႈလိူဝ်ၼၼ်ႉတႄႉ ပေႃးၺႃးၺွပ်း တေလႆႈၸၢႆႇပၼ်ငိုၼ်းၶဝ် ပေႃးၼၼ် ၶဝ်တေပွႆႇပၼ်ၶိုၼ်း။ ၵမ်ႈၼမ်ၼႆႉ ၶဝ်တေယိူင်းၸူး လႅင်းၵႃး ဢမ်ႇၼၼ်ၵေႃႈ ၵႃးၸိူဝ်းမီးၶႅင်းလဵၵ်းဝႆႉၼိူဝ်လင်ၶႃး တႃႇတၢင်ႇၶူဝ်းၸိူဝ်းၼႆႉ။ ပေႃးပဵၼ် ၵႃးဢွၼ်ႇၶီႇၸွမ်းႁိူၼ်းယူဝ်းယူဝ်းတႄႉ ၶဝ်တေဢမ်ႇပေႃးထတ်းၵႃႈႁိုဝ်။”

ရူတ်ႉၵႃးတေႃႉတၢင်ႇၵုၼ်ႇၸိူဝ်းၺႃးသိုၵ်းမၢၼ်ႈ တင်း ပလိၵ်ႈၾၢႆႇၵုမ်းရူတ်ႉၵႃးၶဝ် တီႉၺွပ်းဝႆႉ ၼႂ်းဝဵင်းလႃႈသဵဝ်ႈၼၼ်ႉ ၸဝ်ႈၼႃႈတီႈၶဝ် ၸႂ်ႉၵႂႃႇထုတ်ႇဢဝ်ၶိုၼ်း ၼိုင်ႈလမ်းလႂ် ၼိုင်ႈႁဵင်သႅၼ်ပျႃး။ ရူတ်ႉၵႃးၸိူဝ်းၼၼ်ႉ ၺႃးတီႉၺွပ်းႁေႃႈၵႂႃႇၵိုတ်းဝႆႉတီႈ ၼႂ်းဝၢင်း ပၢင်ႇပိတ်ႉမၢၵ်ႇၼင် (မိုးလုံလေလုံကွင်း)။ ယၢမ်းလဵဝ် တႃႇၵႂႃႇထုတ်ႇဢဝ်ၶိုၼ်းၼၼ်ႉ ၸဝ်ႈၶွင်ရူတ်ႉၵႃး ႁူပ်ႉတၢင်းယၢပ်ႇဝႆႉ ဝႃႈၼႆ။

လႆႈႁူႉဝႃႈ ရူတ်ႉၵႃးၸိူဝ်းၺႃးတီႉၺွပ်းဝႆႉၼၼ်ႉ ပဵၼ်ရူတ်ႉၵႃးလူင် တၢင်ႇဝူဝ်း၊ ၵႂၢႆး တႃႇသူင်ႇၵႂႃႇတၢင်းမိူင်းၶႄႇ။ ၾၢႆႇၸဝ်ႈၼႃႈတီႈၶဝ် တင်ႈၵဵၵ်ႉလၢၼ်ႇ ပႂ်ႉၵူတ်ႇထတ်းၸွမ်းတၢင်းၶဝ်ႈတၢင်းဢွၵ်ႇဝဵင်းလႃႈသဵဝ်ႈၵူႈၾၢႆႇသေ တီႉၺွပ်း ။

ၼၢင်းယိင်း ဢႃႇယု 40 ပၢႆ ၵူၼ်းမိူင်း ၵေႃႉယူႇဝႆႉ ၼႂ်းဝဵင်းလႃႈသဵဝ်ႈသေ ႁဵတ်းၵၢၼ်ၵႃႉၶၢႆ ၼႂ်းၵၢတ်ႇလူင် ဝဵင်းလႃႈသဵဝ်ႈ လၢတ်ႈၼႄတီႈၽူႈတွႆႇႁွၵ်ႈဝႃႈ “ၸုမ်းယိပ်းၵွင်ႈၵၢင်ႇၸုမ်းလႂ်ၵေႃႈဢမ်ႇလီႁႄၸုမ်း ၸုမ်းလႂ်မႃးၵေႃႈ မႃးတဵၵ်းတဵင် ပေႉၵိၼ်ၵူၼ်းမိူင်းႁႄဢွၵ်ႇၵႂႃႇ။ ပၢႆသေလိူဝ် ၵူၼ်းမိူင်းႁႃၵိၼ်ယၢပ်ႇယူႇၼႆႉ ၵမ်းၵမ်းဝႃႈ တေႁဵတ်းၼၼ် ႁဵတ်းၼႆဢိူဝ်ႈဝႃႇ။ တေၺွပ်းၵႃးဝိတ်ႉတွၵ်ႉ (ဢမ်ႇမီးဝႂ်ၶွၼ်ႇ) ဝႃႇ၊ လူဝ်ႇလႆႈသႂၢင်းၶွၼ်ႇဝႃႇ၊ တေႁဵတ်းႁိုဝ်ႁႃၵိၼ်လဵင်ႉတွင်ႉၵေႃႈဢမ်ႇႁူႉ။ ဝူၼ်ႉပေႃးဢမ်ႇၶႂ်ႈပွင်ႇယဝ်ႉ။ ၶၢႆတၢင်းၶၢႆၵေႃႈဢမ်ႇၶၢႆလီ မိူၼ်ဢွၼ်တၢင်း” ဝႃႈၼႆ။

ဝၢႆးလင်ပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 ႁွပ်ႈသွင်မႃး ဝဵင်းလႃႈသဵဝ်ႈၼႆႉ တပ်ႉသိုၵ်းၵဝ်ႈၵၢင်ႉ (MNDAA) ၶဝ် ၵုမ်းၵမ်ဝႆႉ။ ယွၼ်ႉလူင်ပွင်ၸိုင်ႈမိူင်းၶႄႇမိပ်ႇငႅၼ်း လႄႈ တႄႇဝၼ်းတီႈ 21/04/2025 မႃး လႆႈထွႆဢွၵ်ႇဝဵင်းလႃႈသဵဝ်ႈသေ ပၼ် သိုၵ်းမၢၼ်ႈယိုတ်းမိူင်း ၶဝ်ႈမႃးၵုမ်းၶိုၼ်း ၼႂ်းဝဵင်း 12 ပွၵ်ႉ။ ဝၢၼ်ႈဢိူင်ႇၾၢႆႇၼွၵ်ႈဝဵင်းလႃႈသဵဝ်ႈတႄႉ တိုၵ်ႉပဵၼ် သိုၵ်းၵဝ်ႈၵၢင်ႉ သိုပ်ႇၵုမ်းၵမ်ဝႆႉ ႁၢၼ်ႉတေႃႇထိုင် ယၢမ်းလဵဝ်။

တႅမ်ႈ – ၽူၺ်းၼုမ်ႇ