တႄႇၵၢင်လိူၼ်ၵျူႊလၢႆႊမႃး ႁၢၼ်ႉတေႃႇထိုင်ဝၼ်းမိူဝ်ႈၼႆႉ 23 /07/2025 လူမ်းလႅင်ႉ “ဝိၽႃႊ” တႄႇလုၵ်ႉတၢင်းၾၢႆႇဢွၵ်ႇမိူင်းၾီႉလိပ်ႊ ပိၼ်ႊ ၶဝ်ႈမႃးတၢင်းပၢင်ႇလၢႆႇၸၢၼ်းမိူင်းၶႄႇ ၽတ်ႉပဝ်ႇၵုၼ်ႁွင်ႊၵွင်ႊ ႁႆလမ်သေ လတ်းၶၢမ်ႈပႃး မိူင်းဝႅတ်ႊၼၢမ်ႊတွၼ်ႈၼိူဝ်၊ ပႃးၸဵမ် မိူင်းလၢဝ်း၊  မိူင်းထႆးတွၼ်ႈၼိူဝ် ၊ၶဝ်ႈပႃး မိူင်းတႆးပွတ်းဢွၵ်ႇ၊ ပွတ်းၸၢၼ်း၊ ပွတ်းႁွင်ႇပတ်း ပိုၼ်ႉ တေႃႇပေႃးထိုင် မိူင်းမၢၼ်ႈတွၼ်ႈၵၢင်။

ၾၢႆႇႁႄႉၵင်ႈၽေးသၽႃႇဝ မိူင်းထႆး ပိုၼ်ၽၢဝ်ႇပၼ်ၾၢင်ႉဢွၵ်ႇဝႆႉဝႃႈ ၼႂ်းဝၼ်းတီႈ 22 ထိုင် 24 လိူၼ်ၵျူႊလၢႆႊၼႆႉ ၸၢင်ႈပဵၼ် ၾူၼ် ယႂ်ႇလူမ်းႁႅင်း မၢၵ်ႇႁဵပ်းတူၵ်း ၼမ်ႉႁူၺ်ႈၼမ်ႉလွႆၼွင်း ယွၼ်ႉလူမ်းလႅင်ႉ “ဝိၽႃႊ” ၼႆယူႇ။

ယွၼ်ႉၾူၼ်တူၵ်းႁၢဝ်ႈႁႅင်းလႄႈ ႁဵတ်းႁႂ်ႈၼမ်ႉၼွင်းထူမ်ႈၶဝ်ႈထိုင် ၼႂ်းဝဵင်းမိူင်းပွၵ်ႉ ၸႄႈတွၼ်ႈမိူင်းယၢင်း ။ ၸဝ်ႈၼႃႈတီႈပလိၵ်ႈ ၾၢႆႇၸွႆႈထႅမ်ၵူၼ်းထူပ်းၽေးၼမ်ႉထူမ်ႈ လႄႈ ၵူၼ်းမိူင်း လွင်ႈၸွမ်း ၼမ်ႉ  လူႉတၢႆၵႂႃႇ  4  ၵေႃႉ  ဝႃႈၼႆ။

ၼႂ်းၵူၼ်းၸိူဝ်းလွင်ႈၸွမ်းၼမ်ႉၼွင်းသေ လူႉတၢႆၵႂႃႇၼၼ်ႉ ပဵၼ်ၼၢင်းယိင်း 1 ၵေႃႉ လႄႈ ၵူၼ်းၸၢႆး 3 ၵေႃႉ။ တႃႇသွင်ၵေႃႉတႄႉ ထူပ်း ႁၼ်တူဝ်တၢႆယဝ်ႉသေတႃႉ ထႅင်ႈသွင်ၵေႃႉတႄႉ ယင်းပႆႇထူပ်းႁၼ်တူဝ်တၢႆၼႆ ႁွင်ႈၵၢၼ်ၾၢႆႇတတ်းသိၼ် တပ်ႉသိုၵ်းဝႃႉ ပိုၼ်ၽၢဝ်ႇ ဢွၵ်ႇဝႆႉၼင်ႇၼႆ။

ပလိၵ်ႈသိုၵ်းဝႃႉ ၸိုဝ်ႈႁွင်ႉ Qin Hua ဢႃႇယု 27 ပီ လွင်ႈၸွမ်းၼမ်ႉလူႉတၢႆ  ၽွင်းၵႂႃႇၸွႆႈထႅမ် ၵူၼ်းထူပ်းၽေးၼမ်ႉထူမ်ႈ တီႈမိူင်းပွၵ်ႉ    မိူဝ်ႈဝၼ်းတီႈ 22/07/2025 ။ ၼမ်ႉႁူၺ်ႈၼမ်ႉလွႆ ၵိုင်ႉၵၢင်ႉလေႃႇလူင်းမႃးလုပ်ႇၼွင်းႁႅင်းလႄႈ ၾၢႆႇၸဝ်ႈၼႃႈတီႈ ပလိၵ်ႈၶဝ် ဢမ်ႇသင်ႉလႆႈႁႅင်းၼမ်ႉသေ ၸင်ႇလႆႈ လွင်ႈလႆၵႂႃႇၸွမ်းၼမ်ႉ ဝႃႈၼႆ။

မိူင်းပွၵ်ႉၼႆႉ မီးႁိမ်းလႅၼ်လိၼ်ၶႄႇ ယၢၼ်ၵႆၵၼ်တင်းလႅၼ်လိၼ်မွၵ်ႈ 10 ၵီႊလူဝ်ႊမီႊတႃႊၵူၺ်း။

မိူဝ်ႈပီပူၼ်ႉမႃး 2024 လိူၼ်ဢေႃးၵၢတ်ႉသ်  လႄႈ သႅပ်ႊထႅမ်ႊပိူဝ်ႊၼၼ်ႉၵေႃႈ ဝဵင်းပၢင်သၢင်း၊ မိူင်းပွၵ်ႉၸိူဝ်းၼႆႉ ၺႃးၽေးၼမ်ႉ ထူမ်ႈၼမ်ႉၼွင်း၊ လွႆၵူၼ်ႇ၊ လိၼ်ပင်းၸိူဝ်းၼႆႉႁၢဝ်ႈႁႅင်းသေ ႁူင်းၵေႃႇၵၢႆႇ၊ သဵၼ်ႈတၢင်း လႄႈ ႁိူၼ်းယေးၵူၼ်းမိူင်းလူႉၵွႆၵႂႃႇၸွမ်း တင်းၼမ်  ။

လႆႈႁူႉဝႃႈ တႄႇဝၼ်းတီႈ 15 ၵၢင်လိူၼ်ၼႆႉမႃး ႁၢၼ်ႉတေႃႇထိုင်ဝၼ်းမိူဝ်ႈၼႆႉ 23 ဝၼ်း လိူၼ်ၵျူႊလၢႆႊ ၾူၼ်တူၵ်းဢမ်ႇထၢတ်ႇ ၼႂ်းဝဵင်းမိူင်းပွၵ်ႉသေ ၾၢႆႇၸဝ်ႈၼႃႈတီႈပလိၵ်ႈတပ်ႉသိုၵ်းဝႃႉၶဝ်ၵေႃႈ ႁဵတ်းၵၢၼ်ၸွႆႈထႅမ် ၵူၼ်းထူပ်းၽေးၼမ်ႉထူမ်ႈယူႇ ၼႆယဝ်ႉ။

တႅမ်ႈ-ၽူၺ်းၼုမ်ႇ