တပ်ႉပႂ်ႉလႅၼ်လိၼ်ယၢင်းၽိူၵ်ႇ BGF ဢၼ်ယူႇတႂ်ႈ သိုၵ်းမၢၼ်ႈယိုတ်းမိူင်းၼၼ်ႉ တေလၢႆႈပဵၼ် တပ်ႉသိုၵ်းၸိူဝ်ႉၸၢတ်ႈယၢင်းၽိူၵ်ႇ KNA ဝႃႈၼႆ။

လွင်ႈၼႆႉ ႁူဝ်ၼႃႈသိုၵ်း BGF လၢတ်ႈၵႂႃႇ ၽွင်းမိူဝ်ႈႁူပ်ႉထူပ်းၵၼ်တင်း ပေႃႈမႄႈၵူၼ်းမိူင်း မွၵ်ႈ 400 ၵေႃႉ ၼႂ်းပိုၼ်ႉတီႈ မျၢႆႇၵျီးငူႇ ၸႄႈဝဵင်းလၢႆးပွႆႉ ၸႄႈမိူင်းယၢင်းၽိူၵ်ႇ။

ပူၼ်ႉမႃး ဝၼ်းတီႈ 20/07/2025 ၼႆႉ ႁူဝ်ၼႃႈသိုၵ်း BGF ဢဝ်ႁူဝ်ၶေႃႈ ၵၢၼ်ငမ်းယဵၼ်၊ ၵၢၼ်ၼိမ်သဝ်းတင်း ၵၢၼ်ၽွမ်ႉႁူမ်ႈမိူင်းယၢင်းၽိူၵ်ႇသေ ၸတ်းႁဵတ်းပၢင်ႁူပ်ႉထူပ်းၵၼ်တင်း ပေႃႈမႄႈၵူၼ်းမိူင်း ၼႂ်းပိုၼ်ႉတီႈ မျၢႆႇၵျီးငူႇ။

ၵႅမ်ၸွမ်ႁၢၼ် သေႃးၵျႃႇဢိၼ်း ၸွမ်ၾၢႆႇၵၢၼ်သိုၵ်း တပ်ႉပႂ်ႉလႅၼ်လိၼ်ယၢင်းၽိူၵ်ႇ BGF လၢတ်ႈဝႃႈ – ဢဵၼ်ႁႅင်း BGF ၼႆႉ မီးၼမ်မႃးလိူဝ်ၵဝ်ႇယဝ်ႉ၊ ယူႇတီႈၸုမ်း BGF တေလၢႆႈပဵၼ် တပ်ႉသိုၵ်းၸိူဝ်ႉၸၢတ်ႈယၢင်းၽိူၵ်ႇ KNA ၸွမ်းၼင်ႇပိူင်တိုဝ်းၵမ် 7 ၶေႃႈသေ တေတူင်ႉၼိုင်ၵႂႃႇ ၼႂ်းၼႃႈတီႈသိုၵ်း 4 တီႈ၊ ၶွတ်ႇၽွတ်ႈဝႆႉ တပ်ႉၵွင် 60 ပၢႆ။ ဢိင်ၼိူဝ်လွင်ႈ ၼႆႉသေ တိုၵ်းသူၼ်းပႃး ပေႃႈမႄႈၵူၼ်းမိူင်း ႁႂ်ႈႁူမ်ႈႁွမ်းၸွႆႈထႅမ်ပၼ်ၵႂႃႇ ဝႃႈၼႆ။

တပ်ႉပႂ်ႉလႅၼ်လိၼ်ယၢင်းၽိူၵ်ႇ BGF ၼႆႉ တႄႇလိူၼ်ၵျႅၼ်ႊၼိဝ်ႊရီႊ ပီ 2024 ၼၼ်ႉမႃး ဢမ်ႇႁပ်ႉငိုၼ်းလိူၼ် တၢင်းၵမ်ႉၸွႆႈတီႈသိုၵ်းမၢၼ်ႈယဝ်ႉ ယႅၵ်ႈၸုမ်းဢွၵ်ႇ ယူႇသဝ်းမႃးႁင်းၶေႃ တေႃႇထိုင်ယၢမ်းလဵဝ် – သိုဝ်ႇၶၢဝ်ႇ Than Lwin Times ဢွၵ်ႇဝႆႉၼင်ႇၼႆ။