ဢဝ်ၶေႃႈဢၢင်ႈဝႃႈ တႃႇၽဵဝ်ႈမူၺ်ႉၸုမ်းၵျႃႊၽျႅၼ်ႉၼႆသေ သိုၵ်းမၢၼ်ႈတင်းတပ်ႉပႂ်ႉလႅၼ်လိၼ် ထႅမ်ႁႅင်းယႃႉၵူၼ်ႇပင်းပႅတ်ႈ တိုၵ်းယႂ်ႇလူင်ၼႂ်းမျႃႉဝတီႇၼပ်ႉႁူဝ်ပၢၵ်ႇလင် ။

ၽူႈထတ်းသၢင်ငဝ်းလၢႆးလုမ်ႈၾႃႉၶဝ်တႄႉ ထတ်းသၢင်ဝႆႉဝႃႈ ဢၼ်ယႃႉၵူၼ်ႇပင်းပႅတ်ႈၸိူင်ႉၼႆ ၸိုဝ်ႈၸႂ်ႈမႅၼ်ႈၸွမ်းပိူင်တင်းမူတ်းၼႆႉ ဢမ်ႇလၢတ်ႈလႆႈ ။ ယွၼ်ႉဝႃႈ ငဝ်ႈႁၢၵ်ႈလၵ်းထၢၼ်ႇဢၼ်ၸုမ်းၵျႃႊၽျႅၼ်ႉႁဵတ်းဝႆႉၸိူဝ်းၼၼ်ႉ မၼ်းၸၢင်ႈယူႇၼႂ်းဢွင်ႈတီႈၸိူဝ်းၼႆႉ။

သိုၵ်းမၢၼ်ႈသမ်ႉၵိုင်ႉၵၢင်ႉယႃႉလူႉလႅဝ်ၸိူင်ႉၼႆ မိူၼ်တင်းႁူမ်ႇပိၵ်ႉ ၶေႃႈမုလ်းလမ်ႇလွင်ႈ ၼင်ႇႁိုဝ် လုမ်ႈၾႃႉတေဢမ်ႇၸၢင်ႈဢဝ်လိူင်ႈပၼ်တူတ်ႈတၢမ်ႇၸုမ်းၵျႃႊၽျႅၼ်ႉၵူၺ်း ။ မိူၼ်တင်းပေႃႉၽၵ်းတီမဵတ်ႉႁႂ်ႈၸိူဝ်ႉၽၼ်းတႅၵ်ႇၽူင်ႉလၢမ်းၽႄႈပဵၼ်တူၼ်ႈပဵၼ်ပႃႇၵူၺ်းႁိုဝ်ၼႆ ၸုမ်းပၵ်းတႃလွင်ႈၽဵဝ်ႈမူၺ်ႉၵျႃႊၽျႅၼ်ႉလၢႆလၢႆၸဝ်ႈၵေႃႈလၢတ်ႈဝႆႉၼင်ႇၼႆ။

ယၢမ်းလဵဝ် ၾၢႆႇဢမေႊရိၵၼ်ႊၵေႃႈ သမ်ႉၽွတ်ႈၸုမ်း Strike Force သေ ၶဝ်ႈၵႅဝ်မႃးလႄႈ လွင်ႈၽဵဝ်ႈမူၺ်ႉၸုမ်းၵျႃႊၽႅၼ်ႉ တေတိူဝ်းၵႂၢင်ႈၶႂၢင်ၵႂႃႇထႅင်ႈ ၸိူင်ႉႁိုဝ် တေၸၢင်ႈဢဝ်လိူင်ႈမွၵ်ႈလႂ်- ၸွင်ႇတေၸၢင်ႈၽဵဝ်ႈမူၺ်ႉလႆႈထိုင်တီႈဢွင်ႇမၢၼ်ႁိုဝ် ။

ၶိူင်ႈၶူဝ်းၸႂ်ႉသွႆ ဢၼ်ၸုမ်းၵျႃႊၽျႅၼ်ႉၸႂ်ႉတိုဝ်း တီႈသူၺ်ႇၵူၵ်ႉၵူဝ်ႇ ၊ KK park ၸိူဝ်းၼၼ်ႉ သိုၵ်းမၢၼ်ႈတင်းတပ်ႉပႂ်ႉလႅၼ်လိၼ် BGF ၶဝ် ဢွၼ်ၵၼ် ႁိပ်ႈယႃႉၵူၼ်ႇပင်းယူႇၶမ်ႈၶမ်ႈၼႂ်ၼႂ် ။ လွင်ႈၼႆႉ ၸိူဝ်းတူၺ်းပိူၵ်ႇၼွၵ်ႈမၼ်းၵူၺ်းတႄႉဝႃႈ သိုၵ်းမၢၼ်ႈၽဵဝ်ႈမူၺ်ႉၸုမ်းၵျႃႊၽျႅၼ်ႉလႆႈလီ ။

ၵူၺ်းၵႃႈ ၵျေႊသိၼ်ႊတႃႊဝႃႊ ၽူႈလူင်ႉလႅၼ်ႇၾၢႆႇၵၢၼ်ပၵ်းပိူင်ၵူႈၸိုင်ႈမိူင်း GI-TOC (Global Initiative – Against Transnational Organized Crime) တႄႉ လၢတ်ႈဝႆႉ တီႈ BBC ဝႃႈ –

လွင်ႈၼႅတ်ႈယႃႉၵူၼ်ႇပင်းတီႈယူႇၵျႃႊၽျႅၼ်ႉတီႈမျႃႉဝတီႇၼၼ်ႉ ဢမ်ႇၸၢင်ႈမၵ်းမၼ်ႈဝႃႈ ၽဵဝ်ႈလၢင်ႉပႅတ်ႈၸုမ်းလႅၼ်ၵိၼ်ငိုၼ်းတင်းမူတ်း ။ ယင်းပဵၼ်တၢင်းႁဵတ်းသၢင်ႈ ဢၼ်ၸွႆႈလပ်ႉ ၸွႆႈမွတ်ႇပၼ်လၵ်းထၢၼ်တၢင်းၽိတ်းၸုမ်းၵျႃႊၽျႅၼ်ႉၶဝ်ၵူၺ်းလူးၵွၼ်ႇ ။ တီႈတႄႉမၼ်း ငဝ်းႁၢၵ်ႈလၵ်းထၢၼ်ၸုမ်းၵျႃႊၽျႅၼ်ႉလႄႈ ၶေႃႈမုလ်းဢၼ်တၢင်ႇမူႇတၢင်ႇၸုမ်းၵွင်ႉၼွင်ႇၵၼ်တင်းၵျႃႊၽျႅၼ်ႉၸိူဝ်းၼႆႉ ၸၢင်ႈမီးတီႈၼၼ်ႈတင်းၼမ်တင်းလၢႆ။ မၼ်းၵဵဝ်ႇၵၼ်တၢင်းလုမ်ႈၾႃႉလူးၵွၼ်ႇ ” – ဝႃႈၼႆ။

ဢွင်ႈတီႈ ဢၼ်ၸုမ်းၵျႃႊၽျႅၼ်ႉမႃးၽႄႈယူႇ ၼႂ်းမိူင်းမျႃႉဝတီႇၼႆႉ ပိူင်လူင်မၼ်း တပ်ႉပႂ်ႉလႅၼ်လိၼ် BGF တႂ်ႈသိုၵ်းမၢၼ်ႈလႄႈ ၸုမ်းမႃႇၾီးယႃး(ၸိူဝ်းႁဵတ်းၵၢၼ်ၽိတ်းပၵ်းပိူင်) မိူင်းၶႄႇၵမ်ႈၼမ် မႃးတူၵ်းလူင်းလႆႈၸႂ်ၵၼ်လၢႆၶၵ်ႉလၢႆတွၼ်ႈသေ ၸင်ႇမီးမႃး ဢွင်ႈတီႈၸိူဝ်းၼႆႉ ၸဵမ်မိူဝ်ႈ 2017 ” – ဝႃႈၼႆ။

ဢွင်ႈတီႈၸိူဝ်းၼႆႉ ယဵၼ်းပဵၼ်လႅင်ႇဢၼ်သၢင်ႈပၼ်ႁႃႁႂ်ႈၵူႈၸိုင်ႈမိူင်းယုင်ႈယၢင်ႈမႃးလႄႈ မိူၼ်ၼင်ႇ ဢမေႊရိၵၼ် ၊ UK ၊ ၶႄႇ ၊ ၶူဝ်ႊရီႊယိူဝ်ႊ ၊ၵျပၼ်ႊ ၸိူဝ်းၼႆႉၵေႃႈ ၸင်ႇသႂ်ႇၸႂ်ၼိူဝ်လွင်ႈၼႆႉမႃး။

ၼႂ်းတွၼ်ႈၼႆႉ သိုၵ်းမၢၼ်ႈၵေႃႈ ၸင်ႇၶႂ်ႈလႆႈၸိုဝ်ႈလီသေ ႁဵတ်းၼႄလွင်ႈယႃႉတီႈယူႇၵျႃႊၽျႅၼ်ႉၸိူဝ်းၼႆႉ။ ၾၢႆႇၼိုင်ႈၵေႃႈယွၼ်ႉၸမ်ထိုင်ၶၢဝ်းလိူၵ်ႈတင်ႈမႃးလႄႈ ၶဝ်ၶႂ်ႈႁဵတ်းၼႄၵေႃႈပဵၼ်လႆႈ ။ ပိူင်လူင် ၶႂ်ႈၼႄဝႃႈ ၶဝ်ဢမ်ႇၵဵဝ်ႇသင်ၸွမ်းၵျႃႊၽျႅၼ်ႉ ၊ ၶႂ်ႈၼႄဝႃႈ ၶဝ် ဢမ်ႇႁပ်ႉလႆႈ ၸုမ်းၵျႃႊၽျႅၼ်ႉၸိူဝ်းၼႆႉဝႆႉ ၼႆၸိူဝ်းၼႆႉ။

လွင်ႈဝႃႈ ၶဝ်တေၽဵဝ်ႈမူၺ်ႉၸိူင်ႉႁိုဝ် မီးၶၵ်ႉတွၼ်ႈၸိူင်ႉႁိုဝ် ၼႆ ဢမ်ႇႁၼ်ပိုၼ်ၽၢဝ်ႇဢွၵ်ႇၸႅင်ႈလႅင်း လႄႈ တႃႇတေတမ်းၸႂ်လႆႈတႄႉတႄႉ ပႆႇမီး။

ၽွင်းမိူဝ်ႈသိုၵ်းမၢၼ်ႈ ၶဝ်ႈသွၵ်ႈ KK park ၸိူဝ်းၼႆႉ ၵူၼ်းၸိူဝ်းႁဵတ်းၵၢၼ်ၵျႃႊၽျႅၼ်ႉၵမ်ႈၼမ် သမ်ႉပေႃးဢွၼ်ၵၼ် ၶၢႆႉဢွၵ်ႇထႃႈ ။ ၶဝ်သမ်ႉပေႃး ႁႃတီႈယူႇတီႈသဝ်းဝႆႉယဝ်ႉ ၸိူဝ်းၵပ်းသိုပ်ႇၵပ်းသၢၼ်ၸူး ႁူင်းႁႅမ်းၼႂ်းမျႃႉဝတီႇၸိူဝ်းၼႆႉသေ ယူႇဝႆႉၵေႃႈ မီးဢမ်ႇယွမ်း 20 တီႈလူးၵွၼ်ႇၼႆ ၵျေႊသိၼ်ႊတႃႊဝႃႊ လၢတ်ႈၼင်ႇၼႆ။

မၢင်ၸိူဝ်းပၢႆႈထိုင်မိူင်းတႆးပွတ်းႁွင်ႇပွတ်းၸၢၼ်း မိူၼ်ၼင်ႇ တၢင်ႉယၢၼ်း ၊ ဝၢၼ်ႈႁႆး ၸိူဝ်းၼႆႉၵေႃႈ ပၢႆႈထိုင် ။ ပွတ်းတၢင်းၽႃဢၢင်ႇၸိူဝ်းၼႆႉၵေႃႈမီး ။ မိူဝ်ႈၵွၼ်ႇၸိူဝ်းယၢမ်ႈပၵ်းသဝ်းတႃႈၶီႈလဵၵ်းမႃးၵေႃႈ ယၢမ်းလဵဝ်ၶိုၼ်းဢွၼ်ၵၼ်ပွၵ်ႈႁဵတ်းၵၢၼ်ၶိုၼ်း တႃႈၶီႈလဵၵ်းၵေႃႈမီး ။ ၸိူဝ်းပၢႆႈထိုင် လၢဝ်း ထႆး လႄႈ ၵမ်ႊပူႊၶျႃႊၸိူဝ်းၼႆႉၵေႃႈမီးၼမ် ၼႆ ၵျေႊသိၼ်ႊတႃႊဝႃႊ သိုပ်ႇလၢတ်ႈ။

ၸဵမ်လႂ်မႃးလႂ် ၸဵမ်မိူဝ်ႈၸုမ်းၵျႃႊၽျႅၼ်ႉပႆႇၶွၼ်ႈတုမ်ၵၼ်ၼမ်ၼႆႉ ႁဵတ်းသင်လႄႈ တပ်ႉပႂ်ႉလႅၼ်လိၼ် BGF ၶဝ် ပႆႇၶဝ်ႈၽဵဝ်ႈၵမ်းလဵဝ်ၼႆၼၼ်ႉ ၽူႈၶၢၼ်ပၢၵ်ႇ BGF ၼၢႆႇမွင်ႇၸေႃႇ တႄႉလၢတ်ႈဝႆႉၼင်ႇၼႆ –

တီႈတႄႉမၼ်း ဢမ်ႇမီးၼမ်ၵႃႈႁိုဝ် ၊ မၼ်းမီးၵႂႃႇ တီႈၼၼ်ႈဢိတ်းဢိတ်း တီႈၼႆႈဢိတ်းဢိတ်း ႁဵတ်းၼၼ်ၵူၺ်း။ မိူဝ်ႈလဵဝ်တႄႉ တေၽဵဝ်ႈသဵင်ႈမူတ်း ။ တေႁဵတ်းၵႂႃႇပဵၼ်တွၼ်ႈပဵၼ်တွၼ်ႈ ။ မၼ်းမိူၼ်ပိူၼ်ႈပတ်းၽဵဝ်ႈႁိူၼ်းၼၼ်ႉၼႃႇ ၽဵဝ်ႈၵမ်းလွႆးလွႆးၵေႃႈ ပေႃးထိုင်ၶိင်ႇၶၢဝ်းမၼ်းမႃး မၼ်းၵေႃႈ လိူမ်ႈၵဵင်ႈမူတ်းမိူၼ်ၵၼ် ” – ဝႃႈၼႆ။

ဢၼ်လႆႈယႃႉလူႉၵူၼ်ႇပင်း KK Park သေ သူၺ်ႇၵူၵ်ႉၵူဝ်ႇသမ်ႉ ဢမ်ႇယႃႉၼႆၼၼ်ႉ ၵွပ်ႈဝႃႈ တီႈသူၺ်ႇၵူၵ်ႉၵူဝ်ႇၼႆႉ မၼ်းလေႃးလႄးၵၼ်ဝႆႉတင်းၵူၼ်းဝၢၼ်ႈၵူၼ်းမိူင်း ။ မၼ်းဢမ်ႇၸႂ်ႈတီႈၵျႃႊၽျႅၼ်ႉယူႇဝႆႉၶေႃၶေႃ ၼႆ ၽူႈၶၢၼ်ပၢၵ်ႇ BGF လၢတ်ႈ။

တီႈမျႃႉဝတီႇၼႆႉ မၼ်းမီးၸုမ်းၵျႃႊၽျႅၼ်ႉ ဢၼ်ၵႅၼ်ႇၶႅင်ၼႅၼ်ႈၼႃတႄႉတႄႉဝႃႈဝႃႈလႄႈ ယူႇတီႈဢမေႊရိၵၼ်ႊသေ ၸင်ႇၽွတ်ႈဢွၵ်ႇမႃး ၸုမ်းဢၼ်မီးၸိုဝ်ႈဝႃႈ Strike Force ၊ လၢတ်ႈဝႃႈ တႃႇၽဵဝ်ႈမူၺ်ႉၵႂၢတ်ႇလၢင်ႉ ၸုမ်းၵျႃႊၽျႅၼ်ႉ ။ ၼႂ်းၼၼ်ႉ သမ်ႉ ၸႅၵ်ႇဢွၵ်ႇၸုမ်းၼိုင်ႈ ဢၼ်မီးၸိုဝ်ႈဝႃႈ The Strike Force Burmese Team ပဵၼ်တႃႇမိူင်းႁူမ်ႈတုမ်မၢၼ်ႈၶေႃၶေႃ ၼႆယူႇ။

ၽူႈထတ်းထၢင် မၢင်ၸိူဝ်းၵေႃႈ လၢတ်ႈဝႃႈ ဢမေႊရိၵၼ်ႊၶဝ်ႈမႃးၸိမ်ၸွမ်းယဝ်ႉလႄႈ သိုၵ်းမၢၼ်ႈလႄႈဢမေႊရိၵၼ်ႊ ၸၢင်ႈၸမ်ၸႂ်ၵၼ်မႃးလိူဝ်ၵဝ်ႇသေ ၸၢင်ႈမီးပၼ်ႁႃၵၼ်တင်းမိူင်းၶႄႇႁိုဝ်ၼႆၸိူဝ်းၼႆႉ။

ယိူင်းဢၢၼ်း ၸုမ်း Strike Force တႄႉၵေႃႈ ၶႂ်ႈၵိုတ်းပႅတ်ႈလွင်ႈလူႉလွင်ႈသုမ်းၼႂ်းမိူင်းဢမေႊရိၵၼ်ႊ ယွၼ်ႉဝႃႈ ၵူၼ်းမိူင်းဢမေႊရိၵၼ်ႊ ၺႃးလွၵ်ႇလႅၼ်မႃးၼမ်။ လႄႈ ၶႂ်ႈလႆႈၶိုၼ်းငိုၼ်းတွင်း ဢၼ်လႆႈလူႉသုမ်းၵႂႃႇၸွမ်းၵျႃႊၽျႅၼ်ႉၸိူဝ်းၼၼ်ႉ ။ ထႅင်ႈဢၼ်ၼိုင်ႈၵေႃႈ ဢမေႊရိၵၼ်ႊ ၶႂ်ႈပဵၼ်ပႃး ၸုမ်းဢၼ်ၼမ်းၵႂၢတ်ႇလၢင်ႉပႅတ်ႈၸုမ်းလႅၼ်ငိုၼ်းဢွၼ်ႊလၢႆႊၸိူဝ်းၼႆႉၵေႃႈပႃး ” – ဝႃႈၼႆ။

ပေႃးမႃးတူၺ်း ၵူၼ်းဢၼ်ပႃးၼႂ်းၸုမ်းၵျႃႊၽျႅၼ်ႉၼႆႉ ပဵၼ်ၵူၼ်းပတ်းပိုၼ်ႉလုမ်ႈၾႃႉ ၼႂ်းၼၼ်ႉ ဢၼ်ၼမ်သုတ်း ပဵၼ်ၵူၼ်းၼႂ်း 77 ၸိုင်ႈမိူင်း ပႃးမိူင်းႁူမ်ႈတုမ်မၢၼ်ႈ ။ ယွၼ်ႉၼၼ် လႄႈ မၼ်းပဵၼ်ပၼ်ႁႃၸၼ်ႉၸိုင်ႈမိူင်း သင်ဝႃႈ ၵူႈၸိုင်ႈမိူင်းဢမ်ႇႁူမ်ႈၵၼ်ၵႄႈလိတ်ႈဢမ်ႇပဵၼ်ၵၢၼ်- ၼႆ ၵျေႊသိၼ်ႊတႃႊဝႃႊ သိုပ်ႇလၢတ်ႈ ။

မိူဝ်ႈပၢင်ယၼ်ႇသိုၵ်း 1027 ပႆႇတႄႇ တီႈဝဵင်းလၢဝ်ႇၵၢႆး မိူင်းတႆးပွတ်းႁွင်ႇ ၼႆႉ ပဵၼ်လႅင်ႇဢၼ်ၸုမ်းၵျႃႊၽျႅၼ်ႉ သွၼ်ႈယူႇၼမ် ။ ၽွင်းၼၼ်ႉ ၵျႃႊၽျႅၼ်ႉၶဝ် ဢဝ်မိူင်းၶႄႇႁဵတ်းပဝ်ႉမၢႆၵၢၼ်လွၵ်ႇလႅၼ် ။ မိူင်းၶႄႇၸင်ႇပၼ်ၾႆးၶဵဝ် ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼႂ်းမိူင်းတႆးသေ တိုၵ်းတေႃးၽဵဝ်ႈမူၺ်ႉ။

ဝၢႆးၼၼ်ႉသမ်ႉ ၸုမ်းၵျႃႊၽျႅၼ်ႉၸိူဝ်းၼႆႉ ၽူင်ႉပၢႆႈ ၵႂႃႇၶွၼ်ႈၵၼ်ပဵၼ်လၢႆတီႈ ၊ ပဝ်ႉမၢႆၵၢၼ်လွၵ်ႇလႅၼ်ၶဝ်ၵေႃႈ ၸင်ႇ ၶၢႆႉလၢႆႈၸွမ်း ။ ယိူင်းၸူးမိူင်းဝၼ်းတူၵ်း ၸိူဝ်းၼႆႉ ႁဵတ်းႁႂ်ႈၵူၼ်းမိူင်းဢမေႊရိၵၼ်ႊလူႉသုမ်းတင်းၼမ်တင်းလၢႆ ။ ၸင်ႇၼၼ်လႄႈ မိူဝ်ႈလဵဝ် မိူင်းၶႄႇ လႄႈ ဢမေႊရိၵၼ်ႊ ၸင်ႇၵႅဝ်ၸွမ်း ၵၢၼ်ၽဵဝ်ႈလၢင်ႉၵျႃႊၽျႅၼ်ႉမႃး။

ၾၢႆႇၼိုင်ႈၵေႃႈ သိုၵ်းမၢၼ်ႈ ၸွင်ႇတေၸွမ်းပိူင်ဢၼ်တဵင်ႈထမ်းၽဵင်ႇပဵင်းတႄႉႁိုဝ်ၼႆ ပဵၼ်လွင်ႈဢၼ်ၽူႈလူင်ႉလႅၼ်ႇၵၢၼ်မိူင်းၶဝ်ပၵ်းတႃတူၺ်းဝႆႉ။ မိူဝ်ႈလဵဝ်တႄႉ သိုၵ်းမၢၼ်ႈ ပၵ်းၸႂ်တီႈမျႃႉဝတီႇသေ လိုပ်ႈလမ်းပႅတ်ႈၸုမ်းၵျႃႊၽျႅၼ်ႉသေတႃႉ မၼ်းဢမ်ႇႁူမ်ႇငမ်းလႆႈတၢင်းၽိတ်းဢၼ်ယၢမ်ႈႁဵတ်းႁၢႆႉၸႃႉ ဢဝ်မၢၵ်ႇလူင်ပွႆႇသႂ်ၵူၼ်းမိူင်းမႃးၸိူဝ်းၼၼ်ႉလႄႈ ဢမေႊရိၵၼ်ႊ တေဢမ်ႇၸၢင်ႈၸုၵ်းၾၢႆႇသိုၵ်းမၢၼ်ႈၵမ်းသိုဝ်ႈ။ တႃႇၵႂၢတ်ႇလၢင်ႉပႅတ်ႈ ၵျႃႊၽျႅၼ်ႉၸိူဝ်းၼႆႉ ၾၢႆႇမိူင်းထႆးၵေႃႈ တၵ်းတေလႆႈၶဝ်ႈႁူမ်ႈၵႅဝ်ၸွမ်း ၸင်ႇလႆႈ ၼႆ ၵျေႊသိၼ်ႊတႃႊဝႃႊ လၢတ်ႈၼင်ႇၼႆ။