ၽွင်းၸမ်ပၢင်လိူၵ်ႈတင်ႈမႃးၼႆႉ သိုၵ်းမၢၼ်ႈလႄႈ တပ်ႉပႂ်ႉလႅၼ်လိၼ်ပိုၼ်ၽၢဝ်ႇဝႃႈ ၶဝ်ႈဝဵင်းမႂ်ႇသူၺ်ႇၵူၵ်ႉၵူဝ်ႇ (တီႈယူႇၸုမ်းလွၵ်ႇလႅၼ်ၵိၼ်ငိုၼ်းတၢင်းဢွၼ်ႊလၢႆႊ ၵျႃႊၽျႅၼ်ႉ) ဝဵင်းမျႃႉဝတီႇ ၸုမ်းၵျႃႊၽျႅၼ်ႉပၢႆႈ ဝဵင်းပေႃးယဵၼ်။

သိုၵ်းမၢၼ်ႈပိုၼ်ၽၢဝ်ႇဝႃႈ ၼႂ်းၶၢဝ်းတၢင်း 3 ဝၼ်း ၼႆႉ တီႈဝဵင်းၵျႃႊၽျႅၼ်ႉသူၺ်ႇၵူၵ်ႉၵူဝ်ႇၼၼ်ႉ တီႉလႆႈၵူၼ်းၼွၵ်ႈမိူင်း 900 ၵေႃႉလႄႈ ၾူၼ်ႊမိုဝ်းထိုဝ် 20000 ၶိူင်ႈ ၶွမ်ႊၽိဝ်ႊတိူဝ်ႊ 3000 လုၵ်ႈၼႆ ၽူႈၶၢၼ်ပၢၵ်ႇတပ်ႉပႂ်ႉလႅၼ်လိၼ် လၢတ်ႈတီႈသိုဝ်ႇၶၢဝ်ႇထႆး The Reporter ၼင်ႇၼႆ။

တင်ႈတႄႇဝၼ်းတီႈ 18/11/2025 မႃး တပ်ႉပႂ်ႉလႅၼ်လိၼ်ၶဝ်ႈၵူတ်ႇထတ်းႁူင်းၵေႃႇၵၢႆႇၼႂ်းဝဵင်းမႂ်ႇသူၺ်ႇၵူၵ်ႉၵူဝ်ႇ။ ၵူၼ်းႁဵတ်းၵၢၼ်ၵျႃႊၽျႅၼ်ႉတီႈဝဵင်းမႂ်ႇသူၺ်ႇၵူၵ်ႉၵူဝ်ႇဢွၼ်ၵၼ်ပၢႆႈဢွၵ်ႇဝဵင်းတၢင်းၶမ်ႈတၢင်းၶိုၼ်း။

ဢိင်ၼိူဝ်လွင်ႈၼႆႉသေ ၵူၼ်းၸမ်ၸႂ်ၵၼ်တင်းသိုၵ်းယၢင်းၽိူၵ်ႇ လၢတ်ႈဝႃႈ – တပ်ႉပႂ်ႉလႅၼ်လိၼ် တေႁွင်ႉတပ်ႉသိုၵ်းမၢၼ်ႈသေ ၵႂၢတ်ႇလၢင်ႉၵႂႃႇၸုမ်းၵျႃႊၽျႅၼ်ႉ ၼႂ်းဝဵင်းမႂ်ႇသူၺ်ႇၵူၵ်ႉၵူဝ်ႇ။ ၵွၼ်ႇသိုၵ်းမၢၼ်ႈ ပႆႇၶဝ်ႈၼၼ်ႉ ပွင်ႇၶၢဝ်ႇဝႆႉၸၢဝ်းၶႄႇၸုမ်းၵျႃးၽျႅၼ်ႉ ႁႂ်ႈလႆႈငိူင်ႉပၢႆႈ၊ ႁႂ်ႈၵႂႃႇယူႇသဝ်းဝႆႉတၢင်ႇတီႈ။ ၽွင်းမိူဝ်ႈသိုၵ်းမၢၼ်ႈၶဝ်ႈၵႂၢတ်ႇလၢင်ႉၼၼ်ႉ တေၺႃးတီႉၺွပ်းလိုပ်ႈဢွၵ်ႇပိုၼ်ႉတီႈ ဝႃႈၼႆ။

ထိုင်မႃးဝၼ်းတီႈ 20/11/2025 ၵၢတ်ႇ ႁၢၼ်ႉၶၢႆႉၶူဝ်းၵုၼ်ႇ ယႃႈယႃ ယေးငိုၼ်း ႁၢၼ်ႉၶၢႆမိုဝ်းထိုဝ် ၸိူဝ်းၼႆႉၵေႃႈပိၵ်ႉၽၵ်းတူဝႆႉမူတ်း။ၵူၼ်းၵေႃႈဢမ်ႇမီး ဝဵင်းၵေႃႈယဵၼ်ငႅဝ်။ ၸၢဝ်းမၢၼ်ႈဢၼ်ၵႂႃႇႁဵတ်းၵၢၼ်လုမ်းလႃးႁိူၼ်းယေး ၊ ႁဵတ်းလွင်ႈမူတ်းသႂ်၊ ၸွႆႈၼႂ်းသုမ်ႉတၢင်းၵိၼ်ၸိူဝ်းၼႆႉၵေႃႈႁႅၼ်းၶူဝ်းပၢႆႈပွၵ်ႈၶိုၼ်းႁိူၼ်းယေး ၼႆ သိုဝ်ႇၶၢဝ်ႇထႆး The Reporter ပိုၼ်ၽၢဝ်ႇၼင်ႇၼႆ။

မိူဝ်ႈလိူၼ် ၾႅပ်ႉပိဝ်ႊရီႊပူၼ်ႉမႃးၼႆႉ တပ်ႉပႂ်ႉလႅၼ်လိၼ်ယၢင်းၽိူၵ်ႇ BGF ဢဵၼ်ႁႅင်းၼပ်ႉႁူဝ်ပၢၵ်ႇ ၶဝ်ႈၵႂၢတ်ႇလၢင်ႉ ၸုမ်းၵျႃးၽျႅၼ်ႉ ၼႂ်းဝဵင်းမႂ်ႇသူၺ်ႇၵူၵ်ႉၵူဝ်ႇ၊ ၽွင်းၼၼ်ႉ တီႉၺွပ်းၵူၼ်းၼွၵ်ႈမိူင်း 4000 ပၢႆသေ လိုပ်ႈဢွၵ်ႇသူင်ႇမိူဝ်းၶိုၼ်း မိူင်းၽႂ်မိူင်းမၼ်း။

ယၢမ်းလဵဝ်ၵေႃႈ မိူင်းၶႄႇ တင်း မိူင်းဢမေႊရိၵၼ်ႊ ပၼ်ႁႅင်းဢီးမႃးလၢႆလၢႆၾၢႆႇလႄႈ သိုၵ်းမၢၼ်ႈတင်း BGF ၶိုင်တေတီႉၺွပ်းၸုမ်းၵျႃႊၽျႅၼ်ႉထႅင်ႈ။

ဝဵင်းမႂ်ႇသူၺ်ႇၵူၵ်ႉၵူဝ်ႇၼႆႉ မီးဝႆႉတီႈၾၢႆႇႁွင်ႇဝဵင်းမျႃႉဝတီႇ မိူင်းယၢင်းၽိူၵ်ႇ လႅၼ်လိၼ် ထႆး – မၢၼ်ႈ။

ပူၼ်ႉမႃးပႆႇပေႃးႁိုင်ၼႆႉၵေႃႈ သိုၵ်းမၢၼ်ႈ တင်း BGF ပွင်ႇၶၢဝ်ႇလူင်ႈၼႃႈ ႁႂ်ႈၵူၼ်းႁဵတ်းၵၢၼ်ၵျႃႊၽျႅၼ်ႉ ပၢႆႈဢွၵ်ႇပိုၼ်ႉတီႈဝႆးဝႆးသေ ၶဝ်ႈၵႂၢတ်ႇလၢင်ႉ KK Park ဢၼ်မီးတီႈလႅၼ်လိၼ်။ မိူဝ်ႈၼၼ်ႉ ၵူၼ်းႁဵတ်းၵၢၼ်ၵျႃႊၽျႅၼ်ႉ ၼပ်ႉႁူဝ်ႁဵင်ၵေႃႉ ငိူင်ႉပၢႆႈဢွၵ်ႇတင်းၶမ်ႈတင်းၶိုၼ်း၊ ၵမ်ႈၽွင်ႈ ပၢႆႈၶဝ်ႈထိုင်ၾင်ႇထႆး၊ ၾၢႆႇၸဝ်ႈၼႃႈတီႈထႆး လႆႈၸတ်းသူင်ႇပၼ်ၶိုၼ်း မိူင်းၽႂ်မၼ်း ဝႃႈၼႆ။