ဝၼ်းတီႈ 21/07/2025 ယၢမ်းၵၢင်ၶမ်ႈ 7 မူင်း လူမ်းလႅင်ႉ ၽတ်ႉၶဝ်ႈၼႂ်းဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း လႅၼ်လိၼ်တႆး – ထႆး တီႈပွၵ်ႉပႃႇလႅင် ႁဵတ်းႁႂ်ႈတူၼ်ႈမႆႉႁၵ်းလူမ်ႉ တဵင်သႂ်ႇသၢႆၾႆးၶၢတ်ႇသေ သျွတ်ႉၺႃးၼုမ်ႇၸၢႆး 2 ၵေႃႉ လႆႈမၢတ်ႇၸဵပ်း။

ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ -“ၾူၼ်တူၵ်းလူမ်းႁႅင်းသေ တူၼ်ႈမႆႉၼႆႉႁၵ်းလူမ်ႉသႂ်ႇသၢႆၾႆးၾႃႉ။ ဢဝ်သၢႆၾႆးၼၼ်ႉ တိူဝ်ႉၺႃးၵူၼ်းသေ သျွတ်ႉသႂ်ႇၵူၼ်းမိူင်း လႆႈမၢတ်ႇၸဵပ်း 2 ၵေႃႉ ပဵၼ်ၵူၼ်းၸၢႆးၶႃႈဢေႃႈ”- ဝႃႈၼႆ။

ဢိင်ၼိူဝ် လွင်ႈလူမ်းလႅင်ႉ ၽတ်ႉၶဝ်ႈမႃး ၼႂ်းဝဵင်းတႃႈၶီႈလဵၵ်းၼႆႉသေ ႁဵတ်းႁႂ်ႈတူၼ်ႈမႆႉယႂ်ႇလူင် ႁၵ်းလူမ်ႉတဵင်သႂ်ႇသၢႆၾႆးၶၢတ်ႇ ႁဵတ်းႁႂ်ႈၾႆးၾႃႉသျွတ်ႉမွတ်ႇၵႂႃႇၵမ်းၼိုင်ႈ ၼႆယဝ်ႉ။

“မိူဝ်ႈဝႃးၼႆႉ ၾူၼ်လူင်လူမ်းလူင်မႃးႁႅင်းသေ ႁဵတ်းႁႂ်ႈတူၼ်ႈမႆႉႁၵ်း၊ သၢႆၾႆးၶၢတ်ႇ။ တေႃႇထိုင်မိူဝ်ႈၼႆႉ ယၢမ်းၵၢင်ဝၼ်းၵေႃႈ ၾူၼ်တိုၵ်ႉတူၵ်းယူႇ။ လႅပ်ႈလူမ်းလႅင်ႉၼႆႉ တေၽတ်ႉၶဝ်ႈမႃးထႅင်ႈယူႇ”- ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း သိုပ်ႇလၢတ်ႈၼႄၼင်ႇၼႆ။

လူမ်းလႅင်ႉၼႆႉ တေၽတ်ႉၶဝ်ႈမႃးထႅင်ႈတၢင်းၵဵင်းႁၢႆး၊ မႄႈသၢႆသေ ၶဝ်ႈမႃးထိုင်တၢင်း တႃႈၶီႈလဵၵ်း၊ တႃႈလိူဝ်ႇ၊ မိူင်းၽျၢၵ်ႈ၊ မိူင်းသၢတ်ႇ၊ မိူင်းတူၼ်လႄႈ တၢင်းမိူင်းပၼ်ႇ၊ လၢင်းၶိူဝ်း၊ ၵဵင်းတွင်း ၸိူဝ်းၼၼ်ႉၵေႃႈ ၼမ်ႉတေၸၢင်ႈလုပ်ႇထူမ်ႈႁႅင်း ၼႆယဝ်ႉ။

သင်ပဵၼ်လႆႈ ၵူၼ်းမိူင်း ၸိူဝ်းယူႇဝႆႉ ၸွမ်းတီႈၶူင်ႈယၢၼ်းတီႈတႅမ်ႇ ၸိူဝ်းၼၼ်ႉ ႁႂ်ႈဢွၼ်ၵၼ်ၶၢႆႉယူႇဝႆႉ တီႈလွတ်ႈၽေးၼႆ – ယူႇတီႈ ၾၢႆႇၾိင်ႈၾႃႉရႃႇသီႇ ပၼ်ၾၢင်ႉဝႆႉၼင်ႇၼႆ။

လူမ်းလႅင်ႉ ဝီႊၽႃႊဢၼ်ဝႃႈၼၼ်ႉ တႄႇလတ်းၽၢၼ်ႇမႃးတၢင်းၾၢႆႇႁွင်ႇ ၾင်ႇပၢင်ႇလၢႆႇမိူင်းဝႅတ်ႉၼၢမ်းၼၼ်ႉမႃး။ မိူဝ်ႈဝၼ်းတီႈ 23 ပူၼ်ႉမႃးၼႆႉ လူမ်းလႅင်ႉၽတ်ႉၶဝ်ႈမႃးၼႂ်းမိူင်းလၢဝ်း ၼၼ်ႉတႄႉ ဢမ်ႇပေႃးႁႅင်း။

ထိုင်မႃး ဝၼ်းတီႈ 24 ၼႆႉသမ်ႉ လူမ်းလႅင်ႉ ၽတ်ႉၶဝ်ႈထိုင် တၢင်းၼေႇပျီႇတေႃႇ၊ တႃႈၵုင်ႈ၊ ဝဵင်းလိူဝ်ႇ၊ ပႃႇၵိူဝ်၊ မၵူၺ်း၊ ဢေႇရႃႇဝတီႇ၊ တၼၢဝ်းသီ၊ မိူင်းယၢင်းလႅင်၊ မိူင်းယၢင်းၽိူၵ်ႇ၊ မိူင်းမွၼ်းလႄႈ မိူင်းတႆး ၸိူဝ်းၼႆႉ ယဝ်ႉၵေႃႈ ႁဵတ်းႁႂ်ႈၾူၼ်တူၵ်းဢမ်ႇထၢတ်ႇ ၸွမ်းၼႂ်းပိုၼ်ႉတီႈ ယဝ်ႉၵေႃႈ ၾူၼ်လူင် တေၸၢင်ႈတူၵ်းႁႅင်းထႅင်ႈၼႆ – ၼႂ်းလိၵ်ႈပိုၼ်ၽၢဝ်ႇ ၾၢႆႇၾိင်ႈၾႃႉရႃႇသီႇ ဢွၵ်ႇဝႆႉၼင်ႇၼႆ။