ယၢမ်းလဵဝ် တီႈလႅၼ်လိၼ်တႆး – ထႆး ၼႂ်းဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်းၼႆႉ လွင်ႈၵူတ်ႇထတ်း တီႉၺွပ်းရူတ်ႉၵႃး ဢမ်ႇမီးဝႂ်ၶွၼ်ႇ (လၢႆႊသိၼ်ႊ) တႄႉ လူတ်းယွမ်းလူင်းၵႂႃႇယဝ်ႉသေတႃႉ ၸွမ်းတၢင်းၶဝ်ႈဢွၵ်ႇဝဵင်းတႄႉ သိုၵ်းမၢၼ်ႈ ယိုတ်းမိူင်းၶဝ် တိုၵ်ႉၵူတ်ႉထတ်းယွၼ်းငိုၼ်းယူႇ။
ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ၼႂ်းဝဵင်းတႄႉ ၶဝ်ဢမ်ႇပေႃးၵူတ်ႇထတ်းယဝ်ႉ။ တေမီးၸွမ်းၶႅပ်ႇဝဵင်းၾၢႆႇၼွၵ်ႈ ၸိူဝ်းၼၼ်ႉၵမ်ႈၼမ်ၵူၺ်း။ မိူၼ်ၸိူင်ႉ ၼင်ႇ တၢင်းၶဝ်ႈဢွၵ်ႇဝဵင်း ၸိူဝ်းၼၼ်ႉၶႃႈ။ ဢၼ်ၼႆႉ ဢမ်ႇပႆႇဝႃႈ ဢမ်ႇမီးဝႂ်လၢႆႊသိၼ်ႊလႃႈ မၢင်ပွၵ်ႈ ဢမ်ႇမီးဝႂ်ၶပ်းၶီႇၵေႃႈ လႆႈသဵင်ႈ 5 မိုၼ်ႇပျႃး ဢမ်ႇၼၼ် ၼိုင်ႈႁဵင်ဝၢတ်ႇ (ငိုၼ်းထႆး) ၸိူဝ်းၼႆႉ။ ဢၼ်ၼႆႉ ၶဝ်ပႂ်ႉဝႆႉ သဵၼ်ႈတၢင်းၵႂႃႇမိူင်းသၢတ်ႇ၊ သဵၼ်ႈတၢင်းၵႂႃႇဝၢင်းႁိူဝ်းမိၼ် တီႈၵဵတ်ႉလၢၼ်ႇႁူၺ်ႈလိၼ်လမ် ၸိူဝ်းၼၼ်ႉ။ ယဝ်ႉၵေႃႈ တီႈၵဵတ်ႉမၢၵ်ႇယၢင်းထႅင်ႈ”- ဝႃႈၼႆ။
ၼွၵ်ႈလိူဝ်တီႈဝဵင်းတႃႈၶီႈလဵၵ်းယဝ်ႉ တီႈဝဵင်းလူင်တူၼ်ႈတီးၼၼ်ႉၵေႃႈ သိုၵ်းမၢၼ်ႈၶဝ် တီႉၺွပ်းရူတ်ႉၵႃး ဢမ်ႇမီးဝႂ်ၶွၼ်ႇယဝ်ႉ။ ယင်းယွၼ်းငိုၼ်း ၵူၼ်းဢၼ်ဢမ်ႇတိုဝ်းမၢၵ်ႇႁူဝ်ရူတ်ႉၶိူင်ႈၸိူဝ်းၼၼ်ႉထႅင်ႈ 1 သႅၼ်။ ဢၼ်ၼႆႉ လႆႈႁၼ်ၵူတ်ႇထတ်းယွၼ်းငိုၼ်းၼႂ်းဝၼ်းတိတ်ႉ၊ ဝၼ်းလိူၼ်မူၼ်း၊ လိူၼ်လပ်း ၸိူဝ်းၼႆႉ – ၵူၼ်းပိုၼ်ႉတီႈ ဝဵင်းတူၼ်ႈတီးလၢတ်ႈ။
တႄႇဢဝ်ၼႂ်းလိူၼ်မေႊ ပီ 2025 ၼႆႉမႃး သိုၵ်းမၢၼ်ႈၸီႉသင်ႇ ႁႂ်ႈတီႉၺွပ်းရူတ်ႉၵႃး ဢၼ်ဢမ်ႇမီးဝႂ်ၶွၼ်ႇ (လၢႆႊသိၼ်ႊ) ၸိူဝ်းၼႆႉမႃး။ မိူၼ်ၼင်ႇ ၼႂ်းမိူင်းတႆးသမ်ႉ တၢင်းဝဵင်းတႃႈၶီႈလဵၵ်း၊ တူၼ်ႈတီး၊ ႁၢႆးဝူဝ်း၊ ယွင်ႁူၺ်ႈ၊ ဢွင်ႇပၢၼ်း၊ လွၵ်ႉၸွၵ်ႇ၊ ႁူဝ်ပူင်း၊ သီႇသႅင်ႇ၊ ပၢင်လွင်း ၸိူဝ်းၼႆႉ သိုၵ်းမၢၼ်ႈၶဝ် ၵူတ်ႇထတ်းႁၢဝ်ႈႁႅင်း ၵူၼ်းမိူင်းၸိူဝ်းၵႂႃႇမႃးၸၢႆႇၵၢတ်ႇ ၺႃးတီႉ ၺွပ်းရူတ်ႉၵႃး တင်းၼမ်တင်းလၢႆၼႆ – ၽူႈၸွႆႈထႅမ် တူင်ႇဝူင်းၵူၼ်းလၢတ်ႈၼႄၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ