ၶၼ်ၼမ်ႉမၼ်းလိပ်းလႄႈ ၼမ်ႉမၼ်းၸိူဝ်ႉၾႆးလုမ်ႈၾႃႉဝၼ်းမိူဝ်ႈၼႆႉပုင်ႈၶိုၼ်ႈသုင်ႁႅင်း ၊ ၼႂ်းဝူင်ႈတေမႃး ႁၢင်လိူၼ်ၵျူႊလၢႆႊၼႆႉ ၶၼ်ၼမ်ႉမၼ်းၸၢၵ်ႈၼႂ်းမိူင်းၸၢင်ႈပုင်ႈၶိုၼ်ႈသုင်ၼႆ သိုၵ်းမၢၼ်ႈယိုတ်းမိူင်းပိုၼ်ၽၢဝ်ႇဝႆႉၼႂ်းၽိုၼ်ၶၢဝ်ႇမျၢၼ်ႇမႃႉဢလိၼ်း ၼင်ႇၼႆ။

ဝၼ်းမိူဝ်ႈၼႆႉ ၶၼ်ၼမ်ႉမၼ်းၼႂ်းမိူင်း တီႈဝဵင်းတႃႈၵုင်ႈ ၼမ်ႉမၼ်း 95 ၼိုင်ႈလိတ်ႉ 3020 ပျႃး ။ ၼမ်ႉမၼ်း 92 ၼိုင်ႈလိတ်ႈ 2965 ပျႃး။

တီႈဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း ၼႂ်းဝၼ်းမိူဝ်ႈၼႆႉၶၼ်ၼမ်ႉမၼ်းရူတ်ႉ သႅၼ်း 95 တႄႉ မီး 3150 ပျႃး ။သႅၼ်း 92 – 3080 ပျႃး လႆႈႁူႉၼင်ႇၼႆ။

ႁူဝ်ပဝ်ႈၸုမ်းၵႃႉၶၢႆၼမ်ႉမၼ်းၸၢၵ်ႈ မိူင်းမၢၼ်ႈ တွၵ်ႊတိူဝ်ႊဝိၼ်းမျိၼ်ႉတွပ်ႇလၢတ်ႈတီႈသိုဝ်ႇၶၢဝ်ႇမၢၼ်ႈ BBC ဝႃႈ ၶၼ်ၼမ်ႉမၼ်းၸၢၵ်ႈမိူင်းမၢၼ်ႈၼႆႉ ဢိင်ၼိူဝ်လွၵ်းၵၢတ်ႇလုမ်ႈၾႃႉသေ ၶိုၼ်ႈဝႆးလူင်းဝႆး ဝႃႈၼႆ။

ၵူၺ်းၵႃႈ ၵူၼ်းသိုဝ်ႉၶၢႆၼမ်ႉမၼ်းၸၢၵ်ႈၶဝ်တႄႉလၢမ်းၶၢတ်ႈဝႆႉဝႃႈ – ယၢမ်းလဵဝ် ၶၼ်ငိုၼ်းလုမ်ႈၾႃႉတူၵ်း၊ သမ်ႉပဵၼ်ၶၢဝ်းၾူၼ်လႄႈ ၼမ်ႉမၼ်းၸၢၵ်ႈဢမ်ႇၶၢႆလီ။ၵွပ်ႈၼႆ သင်ဝႃႈ ၶၼ်ၼမ်ႉမၼ်းတေၶိုၼ်ႈၵေႃႈ တေဢမ်ႇၶိုၼ်ႈၼမ်လိူဝ်ယၢမ်းလဵဝ်ၵႃႈႁိုဝ် – လၢမ်းၶၢတ်ႈၼင်ႇၼႆ။

ၵူၺ်းၵႃႈၶၼ်ၼမ်ႉမၼ်းၸၢၵ်ႈ ပီ 2025 ၼႆႉသုင်လိူဝ် ပီၵၢႆ 2024 – 200 ပျႃး။

သိုၵ်းမၢၼ်ႈယိုတ်းမိူင်းတႄႉလၢတ်ႈဝႃႈ ဢမ်ႇလူဝ်ႇမႆႈၸႂ် ။ တီႈယွင်ၼမ်ႉမၼ်းၸၢၵ်ႈ တႃႈၼမ်ႉတီႇလဝႃႇ ၼၼ်ႉ ၼမ်ႉမၼ်းမီးတဵမ်ယွင် ဝႃႈၼႆ။