ၼႂ်းၵၢင်လိူၼ်ၵျူႊလၢႆႊ ပီ 2025 ၼႆႉမႃး ၾူၼ်တူၵ်းႁႅင်းသေ ၼမ်ႉလုပ်ႇၼွင်းထူမ်ႈသဵၼ်ႈတႃႈသၢႆတၢင်း တီႈၸႄႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း ၵူၼ်းမိူင်းမႆႈၸႂ် ၵူဝ်ၶူဝ်လူင်မႄႈၼမ်ႉၵူၵ်း ဢၼ်ၵၢႆႇၸူး ဝႆႉဝဵင်းတႃႈၶီႈလဵၵ်း – မိူင်းသၢတ်ႇၼၼ်ႉ လူႉၵွႆၶိုၼ်း ၼႆယဝ်ႉ။

ၵူၼ်းပိုၼ်ႉတီႈ ဝဵင်းမိူင်းသၢတ်ႇ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃးမိူဝ်ႈသိုၼ်းၼႆႉ ၼမ်ႉထူမ်ႈႁႅင်းၼႃႇ။ ႁဵတ်းႁႂ်ႈသဵၼ်ႈတၢင်း ၶူဝ်ၸိူဝ်းၼႆႉ လူႉၵွႆ။ ၼႂ်းၵႄႈတႃႈၶီႈလဵၵ်း – မိူင်းသၢတ်ႇၼႆႉ မၼ်းတေယၢပ်ႇယွၼ်ႉၶူဝ် ၼႆႉၵူၺ်းၼင်ႇၵဝ်ႇ သဵၼ်ႈတၢင်းၼႆႉ မၼ်းယၢပ်ႇသေတႃႉ ၵႂႃႇမႃးလွႆးလွႆးၵေႃႈယင်းလႆႈယူႇ ပေႃးပဵၼ်ၶူဝ် လူႉၵွႆတႄႉ ယၢပ်ႇဢေႃႈ။ ၶူဝ်ဢၼ်လူႉ ၵွႆၵႂႃႇမိူဝ်ႈပီၵၢႆၼၼ်ႉၵေႃႈ တိုၵ်ႉလႆႈမႆႈၸႂ်ဝႆႉ ပေႃးၼမ်ႉၼွင်းထႅင်ႈ တေၸၢင်ႈလူႉၵွႆႁိုဝ်ၼႆဢေႃႈ”- ဝႃႈၼႆ။

မိူၼ်ၼၼ်ၼင်ႇၵဝ်ႇ တီႈဝဵင်းမိူင်းပၼ်ႇၵေႃႈ ၾူၼ်တူၵ်းႁႅင်း ၼမ်ႉႁူၺ်ႈၼမ်ႉလွႆ လႆၼွင်းထူမ်ႈသဵၼ်ႈတၢင်း ႁဵတ်းႁႂ်ႈလွႆၵူၼ်ႇလိၼ်ယၢတ်ႇလႄႈ ၼႆႉၵေႃႈၵူၼ်းမိူင်းဢွၼ်ၵၼ်ထူပ်းတၢင်းယၢပ်ႇ မိူၼ်ၵၼ်။

ၽူႈၸွႆႈထႅမ်တူင်ႇဝူင်းၵူၼ်း ဝဵင်းမိူင်းပၼ်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပီၼႆႉ လွင်ႈၼမ်ႉထူမ်ႈ ပဵၼ်ၸဝ်ႉလိူဝ်ပီၵၢႆ မိူဝ်ႈဝႃးတင်းမိူဝ်ႈသိုၼ်းၼၼ်ႉ မွၵ်ႈၵၢင်ၼႂ် 2 မူင်းၼႆႉ ၼမ်ႉထူမ်ႈၽႅဝ်ၵၢင်ဝဵင်းၸိူဝ်းၼႆႉ ဢေႃႈ။ ပဵၼ်ၼမ်ႉႁူၺ်ႈၼမ်ႉလွႆလႆမႃးၶႃႈ။ ပီၼႆႉ ၼမ်ႉထူမ်ႈၸဝ်ႉလႄႈ ႁဝ်းၶႃႈလႆႈသတိဝႆႉႁင်းၽႂ်မၼ်း။ ယဝ်ႉၵေႃႈ ၸဵမ်မိူဝ်ႈပၢၼ်လႂ်ယဝ်ႉ ၼႂ်း ၵႄႈလၢင်းၶိူဝ်း – မိူင်းပၼ်ႇၼႆႉ မၼ်းပဵၼ်ႁူၺ်ႈပဵၼ်လွႆၼမ်လႄႈ လွႆၵူၼ်ႇ လိၼ်ၵူၼ်ႇ ၸိူဝ်းၼႆႉၵႆႉပဵၼ်ၼမ်။ ပေႃးမႃးၼႂ်းသဵၼ်ႈတၢင်းၾၢႆႇမိူင်းပၼ်ႇၼႆႉ မီးလွင်ႈလူႉသုမ်း ၼမ်သေတႃႉၵေႃႈ လွင်ႈၵမ်ႉထႅမ်ၼႆႉသမ်ႉ ဢမ်ႇၶိုတ်းဢမ်ႇၸမ်မိူၼ်မိူင်းပိူၼ်ႈ။ မိူင်းပၼ်ႇၼႆႉ ၶႂ်ႈဝႃႈတူၵ်း လိုၼ်းသေတၢင်ႇဝဵင်းဢေႃႈ”- ဝႃႈၼႆ။

ၼႂ်းၶၢဝ်းယၢမ်းလဵဝ်ၵၼ်ၵူၺ်းၼင်ႇၵဝ်ႇ တီႈဝဵင်းမိူင်းၼၢႆးၵေႃႈ ၼမ်ႉၼွင်းထူမ်ႈတူင်ႈၼႃးၵူၼ်းမိူင်း ႁဵတ်းႁႂ်ႈၸဝ်ႈၼႃး လူႉသုမ်းတိုၼ်းလၢင်း ၵၢၼ်ၽုၵ်ႇသွမ်ႈ ၵမ်ႈၽွင်ႈ ယင်းဢမ်ႇၸၢင်ႈသိုပ်ႇႁဵတ်းၼႃး ၵေႃႈမီး။

ၸဝ်ႈသူၼ်ႁႆႈၼႃး တီႈဝဵင်းမိူင်းၼၢႆး လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈလူႉသုမ်းၼႆႉ မီးၼမ်ဢေႃႈ။ တႄႇဢဝ်မိူဝ်ႈပီၵၢႆၼၼ်ႉမႃး ၼမ်ႉထူမ်ႈၼႃးယဝ်ႉၼႆၵေႃႈ ႁဝ်းၸဝ်ႈၼႃးၼႆႉ ဢမ်ႇလႆႈၶဝ်ႈ ယွၼ်ႉဢမ်ႇလႆႈၶဝ်ႈ လႄႈ ၽိူင်းဢမ်ႇမီး။ ႁဵတ်းၼႆသေ တေၽုၵ်ႇမီႇႁေႃၵေႃႈ လႆႈႁႃသိုဝ်ႉၽိူင်းဢဝ်ထႅင်ႈ။ ပီၼႆႉၾူၼ်တူၵ်း ၸဝ်ႉလႄႈ မီႇႁေႃၵမ်ႈၽွင်ႈၵေႃႈ ယမ်းၾူၼ်။ ၸိူဝ်းသွမ်ႈထူဝ်ႇၼဝ်ႈၵေႃႈ ဢၢင်ႈဝႃႈၸႂ်ယႂ်ႇထူဝ်ႇၼဝ်ႈၼႆသေ ၺႃးၾူၼ် ဢဝ်ၼဝ်ႈပႅတ်ႈၼႂ်းၼႃးထႅင်ႈ။ မိူဝ်ႈလဵဝ် တေသွမ်ႈၼႃးၶိုၼ်းၼႆ ၼမ်ႉသမ်ႉဢမ်ႇပဵၼ်ၸႂ် မိူဝ်ႈလူဝ်ႇၼမ်ႉသမ်ႉ ဢမ်ႇမီး ၼမ်ႉဢမ်ႇမႃး ပေႃးဢမ်ႇလူဝ်ႇသမ်ႉ ၼမ်ႉၼမ် ႁဵတ်းၼႆသေ ၽႂ်ၵေႃႈဢမ်ႇ ႁတ်းသွမ်ႈ ပေႃးသွမ်ႈၵေႃႈသမ်ႉတေသုမ်းၼၼ်ႉၼႃႇ”- ဝႃႈၼႆ။

ၽွင်းၼမ်ႉလုပ်ႇၼွင်းထူမ်ႈၼႆႉ ဢမ်ႇၸႂ်ႈဝႃႈ ထူပ်းတၢင်းယၢပ်ႇၽိုတ်ႇ ၼႂ်းၵၢၼ်ၽုၵ်ႇသွမ်ႈ၊ ၵၢၼ်ၵပ်းသိုပ်ႇၵႂႃႇမႃးလႄႈ ပၢႆးမၢၵ်ႈမီး ၸိူဝ်းၼႆႉၵူၺ်း ၽွင်းၼမ်ႉထူမ်ႈၼမ်ႉၼွင်းယူႇၼႆႉ ယင်းလႆႈမႆႈၸႂ်ပႃး လွင်ႈလွတ်ႈၽေး တီႈယူႇလႄႈ ပၢႆးယူႇလီ ၸိူဝ်းၼႆႉထႅင်ႈလူးၵွၼ်ႇ။

“ၾၢႆႇပၢႆးယူႇလီၵေႃႈ ပေႃးၼမ်ႉထူမ်ႈမႃး တိူဝ်ႉၺႃးၼမ်ႉၼႆ တေပဵၼ်ဝတ်း ၊ ၼၢဝ် ၊ ဢႆ ၸိူင်ႉၼႆၵေႃႈမီး။ လွင်ႈၸိူဝ်းၼႆႉ လႆႈဝႆႉသတိၼႃႇ။ ထႅင်ႈလွင်ႈၼိုင်ႈၵေႃႈ မိူဝ်ႈၽွင်းႁဝ်းၶႃႈ ၸွႆႈၵၼ် တေႃႉၶူဝ်းၶၢႆႉၶူဝ်းၸိူဝ်းၼႆႉ လႆႈတိူဝ်ႉမၢတ်ႇၸဵပ်းသေ ထိုင်တီႈလႆႈယဵပ်ႉၵေႃႈမီး ၸိူဝ်းၼႆႉႁဝ်းၶႃႈ ယၢမ်ႈႁၼ်ယၢမ်ႈပဵၼ်မႃးၶႃႈယဝ်ႉ”- ၽူႈၸွႆႈထႅမ်တူင်ႇဝူင်းၵူၼ်း ဝဵင်းမိူင်းပၼ်ႇ သိုပ်ႇလၢတ်ႈၼႄၼင်ႇၼႆ။

ၵဵဝ်ႇလူၺ်ႈလွင်ႈၼႆႉ ယူႇတီႈ ၽူႈတူင်ႉၼိုင် ၵၢၼ်သိင်ႇဝႅတ်ႉလွမ်ႉတႄႉ လၢတ်ႈဝႃႈ ပဵၼ်ယွၼ်ႉၵၢၼ်တႅပ်း တူၼ်ႈမႆႉ ယႃႉပႃႇထိူၼ်ႇ ၶုတ်းႁႄႈၶူဝ်းတိုၼ်းၼႂ်းလိၼ်လိူင်ႇၼမ်လႄႈ ၸင်ႇပဵၼ်မႃး ဝႃႈၼႆ။

ၸၢႆးၶိူဝ်းသႅင် ၽူႈၸုမ်းႁၵ်ႉသႃသိင်ႇဝႅတ်ႉလွမ်ႉ ၸိုင်ႈတႆး လၢတ်ႈတီႈၽူႈတွႆႇႁွၵ်ႈဝႃႈ – “ပေႃးတႅပ်းမႆႉသေ သမ်ႉႁႃႁၼ်မႅၼ်ႈ မေႃႇႁႄႈမီးတီႈလႂ်ၼႆ ၶိုၼ်းဢွၼ်ၵၼ်ၶုတ်း။ ၵွပ်ႈပိူဝ်ႈဝႃႈ ႁဝ်းတႅပ်းမႆႉၼမ်ႁႅင်းလႄႈ ပႃႇၼႆႉ လႆႈလူႉမႃး။ ပေႃးဝႃႈပႃႇလူႉယဝ်ႉၼႆၵေႃႈ ၼမ်ႉတေလူႉၸွမ်းထႅင်ႈ ပေႃးၼမ်ႉလူႉယဝ်ႉၵေႃႈ ထၢတ်ႈသီႇပိူင်ၼႆႉ မၼ်းၵေႃႈတေလူႉ ၸွမ်းၼၼ်ႉယဝ်ႉ။ ပေႃးတႄႇဢဝ်ၸိူင်ႉၼၼ်မႃးၵေႃႈ ႁဝ်းႁၼ်ဝႃႈ သၽႃႇဝၾိင်းတိုၼ်းၼႆႉ မၼ်းလူႉယဝ်ႉ”- ဝႃႈၼႆ။

ၼႂ်းမိူင်းတႆးၼႆႉ ၵၢၼ်ၶုတ်ႈႁႄႈလိူင်ႇၼမ် မိူၼ်ၼင်ႇ တီႈဝဵင်းမိူင်းပွၵ်ႉ၊ ၼမ်ႉတူႈ၊ မိူင်းယႆ၊ သီႇပေႃႉ၊ မိူင်းၵိုင်၊ လၢႆးၶႃႈ၊ ပၢင်လူင်၊ မိူင်းသၢတ်ႇလႄႈ ဝဵင်းတႃႈၶီႈလဵၵ်း ၸိူဝ်းၼႆႉ မီးၵၢၼ်ၶုတ်းႁႄႈလိၼ်၊ ထၢၼ်ႇႁိၼ်လႄႈ ၶုတ်းၶမ်း ၸိူဝ်းၼႆႉသေ ယႃႉပႃႇမႆႉ တင်းၼမ်။

ဢမ်ႇၵွမ်ႉၵႃႈ ၼႂ်းမိူင်းတႆးပွတ်းၸၢၼ်းတင်း ပွတ်းဢွၵ်ႇၶူင်းၸိူဝ်းၼႆႉၵူၺ်း တၢင်းပွတ်းႁွင်ႇ ထုင်ႉမၢဝ်း ၸိူဝ်းၼၼ်ႉၵေႃႈ ထူပ်းၽေးၼမ်ႉလုပ်ႇၼွင်းထူမ်ႈႁၢဝ်ႈႁႅင်း ၸဝ်ႈၼႃးလူႉသုမ်း ဢမ်ႇယွမ်း 4 ႁဵင် ဢေႊၶိူဝ်ႊ။

ယွၼ်ႉၼၼ် တႃႇလွတ်ႈၽေး လွင်ႈၼမ်ႉထူမ်ႈၼၼ်ႉ ၵူၼ်းမိူင်းတႄႉ ဢွၼ်ၵၼ်မုင်ႈမွင်း ႁႂ်ႈလူင်ပွင်ၸိုင်ႈ မႄးၶုတ်ႈႁွင်ႈၼမ်ႉ ၸွမ်းသဵၼ်ႈတႃႈသၢႆတၢင်းသေ ၶိုၼ်းႁၵ်ႉသႃထိူၼ်ႇပႃႇ ယႃႇႁႂ်ႈၸဝ်ႈၵၢၼ်ပၢႆးမၢၵ်ႈမီးၶဝ် မႃးၶုတ်ႈႁႄႈ ယႃႉပႃႇထိူၼ်ႇမိူၼ်မိူဝ်ႈလဵဝ်ၼႆႉထႅင်ႈ။