ပူၼ်ႉမႃး ဝၼ်းတီႈ 13/07/2025 ၼႆႉ ၾၢႆႇမိူင်းဢိၼ်ႊတီႊယိူဝ်ႊ ၸႂ်ႉၶိူင်ႈၵွင်ႈလူင်တင်း ၶိူင်ႈတရူၼ်ႊ UAV သေ ယိုဝ်းပူၼ်ႉလႅၼ်လိၼ်ၶဝ်ႈမႃးထိုင် ၼႂ်းထုင်ႉၼႃႇၵ တိူင်းၸႄႈၵႅင်း။

မိူင်းဢိၼ်ႊတီႊယိူဝ်ႊ ၼႄၶေႃႈဢၢင်ႈဝႃႈ လႆႈယိုဝ်းတိုၵ်းသႂ်ႇတပ်ႉပၢင်သဝ်း ၸုမ်းလုၵ်ႉၽိုၼ်ႉ ဢႃႇသမ်ႇ ႁွင်ႉ ၸုမ်းပူတ်းပွႆႇၽွမ်ႉႁူမ်ႈ ဢႃႇသမ်ႇ ULFA ဢၼ်တိုၵ်ႉၶတ်းၸႂ် တႃႇတေ ၽၢတ်ႇ ဢွၵ်ႇမိူင်းဢိၼ်ႊတီႊယိူဝ်ႊ တူင်ႉၼိုင်ယူႇသဝ်းဝႆႉၼၼ်ႉ ဝႃႈၼႆ။

ဝၼ်းၼၼ်ႉ မိူင်းဢိၼ်ႊတီႊယိူဝ်ႊ ယိုဝ်းမၢၵ်ႇလူင်ၶဝ်ႈမႃး ဢမ်ႇယွမ်း 10 လုၵ်ႈ။

မၢၵ်ႇၵွင်ႈလူင်ၼၼ်ႉ တူၵ်းတႅၵ်ႇထိုင် ႁိမ်းႁူင်းႁဵၼ်း ဝၢၼ်ႈယေႃးၵွမ်ႇ (ယောကွမ်ကျေးရွာ) လႄႈ ၼိူဝ်သဵၼ်ႈတၢင်းလူင် ႁိမ်းဝၢၼ်ႈၼႃယၼ်း (နာယန်းကျေးရွာ) လွင်ႈတုမ်ႉတိူဝ်ႉမီးၸိူင်ႉႁိုဝ် ဢၼ်ဝႃႈၼၼ်ႉတႄႉ ပႆႇလႆႈႁူႉၸွမ်း။

တပ်ႉပၢင်သဝ်းၸုမ်းလုၵ်ႉၽိုၼ်ႉ ဢႃႇသမ်ႇ ULFA ၼႆႉ မီးဝႆႉတီႈၼႂ်းၸႄႈဝဵင်းလႁႄႇ (လဟယ်) တင်း ၼၢၼ်းယုၼ်း (နန်းယွန်း) ၼႂ်းထုင်ႉၼႃႇၵ ၽွင်းငမ်းႁင်းၶေႃ ၼႂ်းတိူင်းၸႄႈၵႅင်း။

ဝၢႆးၼၼ်ႉ ၼႂ်းဝၼ်းတီႈ 16 (ဝၼ်းပုတ်ႉ) ၼႆႉသမ်ႉ ၵႅမ်ၸွမ်ၸိၵ်းသိုၵ်းမၢၼ်ႈ ၸူဝ်းဝိၼ်း ႁူပ်ႉထူပ်းတင်း ၸုမ်းတၢင်တူဝ် ၾၢႆႇတပ်ႉသိုၵ်းမိူင်းဢိၼ်ႊတီႊယိူဝ်ႊ တီႈၼေႇပျီႇတေႃႇ။ ၵဵဝ်ႇၵပ်းလွင်ႈ တပ်ႉသိုၵ်းမိူင်းဢိၼ်ႊတီႊယိူဝ်ႊ ယိုဝ်းမၢၵ်ႇလူင်ၶၢမ်ႈပူၼ်ႉလႅၼ်လိၼ်ၸိုင်ႈမိူင်းမႃးၼႆႉတႄႉ ဢမ်ႇႁၼ်ပိုၼ်ၽၢဝ်ႇဝႆႉပဵၼ်တၢင်းၵၢၼ် – သိုဝ်ႇၶၢဝ်ႇ The Irrawaddy ဢွၵ်ႇဝႆႉၼင်ႇၼႆ။