တႄႇဢဝ် ဝၼ်းတီႈ 14/07/2025 ၼႆႉမႃး ၸိုင်ႈမိူင်း 19 မိူင်း ပႃးၸဵမ်မိူင်းဢမေႊရိၵၼ်ႊ၊ မိူင်းပရဵင်ႊတဵင်ႊ၊ မိူင်းၵျပၼ်ႊလႄႈ မိူင်းဢိၼ်ႊတီႊယိူဝ်ႊ ၸိူဝ်းၼႆႉ ဢဝ်ဢဵၼ်ႁႅင်းသိုၵ်း 35,000 ပၢႆသေ ႁူမ်ႈၵၼ်ၾိုၵ်းၽွၼ်ႉၵၢၼ်သိုၵ်းယႂ်ႇလူင် တီႈမိူင်းဢေႃးသတြေးလီးယိူဝ်း ဝႃႈၼႆ။

ပၢင်ႁူမ်ႈၵၼ်ၾိုၵ်းၽွၼ်ႉၵၢၼ်သိုၵ်းပွၵ်ႈၼႆႉ ပဵၼ်ပွၵ်ႈၵမ်း 11 ၊ ပၼ်ၸိုဝ်ႈဝႆႉဝႃႈ Talisman Sabre။ ၼႂ်းၶၢဝ်းတၢင်း 3 ဝူင်ႈၼႆႉ တေၾိုၵ်းၽွၼ်ႉၵၢၼ်သိုၵ်းၵႂႃႇ တူဝ်ႈၵုၼ်ဢေႃးသတြေးလီးယိူဝ်း ပတ်းပိုၼ်ႉ၊ တေမီးပႃးၽႅၼ်ၵၢၼ်တိုၵ်း ၼႂ်းၼမ်ႉလႄႈ သဵၼ်ႈတၢင်းၵၢင်ႁၢဝ် ၸိူဝ်းၼႆႉ။

တီႈၼႂ်းပၢင်ၾိုၵ်းၽွၼ်ႉ ၵၢၼ်သိုၵ်းပွၵ်ႈၼႆႉ မိူင်းပႃႊပူႊဝႃႊၼိဝ်ႊၵီႊၼီႊ (ဢၼ်ပဵၼ်မိူင်းယူႇႁိမ်းၸမ် ဢေႃးသတြေးလီးယိူဝ်း) ၵေႃႈ ၶဝ်ႈၾိုၵ်ႉၽွၼ်ႉၵၢၼ်သိုၵ်းၸွမ်း ပဵၼ်ပွၵ်ႈၵမ်းႁႅၵ်ႈ။ ယူႇတီႈ မိူင်းဢေႃးသတြေးလီးယိူဝ်း လႆႈၸၢမ်းပိုတ်းယိုဝ်း မၢၵ်ႇၼူၾႆး ႁၢႆႊမႃႊ ဢၼ်သိုဝ်ႉမႃးတီႈ မိူင်းဢမေႊရိၵၼ်ႊၼၼ်ႉ ပဵၼ်ပွၵ်ႈၵမ်းႁႅၵ်ႈ။

မိူဝ်ႈၽွင်း မိူင်းၶႄႇ တိူဝ်းတူင်ႉၼိုင်ၵၢၼ်သိုၵ်း ၼႂ်းတူင်ႇတၢင်ႇပိုၼ်ႉတီႈယူႇၼၼ်ႉ ဢေႃးသတြေးလီးယိူဝ်း ၸင်ႇသိုဝ်ႉဢဝ်ပိူင်မၢၵ်ႇၼူၾႆး (ဒုံးကျည်စနစ်) တီႈမိူင်းဢမေႊရိၵၼ်ႊ။ ပိူင်မၢၵ်ႇၼူၾႆး ဢၼ်ၼႆႉ ယိုဝ်းလႆႈပဝ်ႉမၢႆ ဢၼ်မီးတၢင်းၵႆ 400 ၵီႊလူဝ်ႊမီႊတိူဝ်ႊၼၼ်ႉ လႆႈလီလီ။ မိူင်းယူႊၶရဵၼ်ႊၵေႃႈ သင်ႇသိုဝ်ႉ ဝႆႉတင်းၼမ် ၼႆယဝ်ႉ။

ၽူႈၵွၼ်းသိုၵ်း ၾၢႆႇႁူမ်ႈၵၼ်ၾိုၵ်းၽွၼ်ႉၵၢၼ်သိုၵ်း ၼႂ်းမိူင်းဢေႃးသတြေးလီးယိူဝ်း ၸွမ်သိုၵ်း ၵျႅတ်ႊသ တိၼ်ႊၵျူင်ႊ လၢတ်ႈဝႃႈ – ၼင်ႇႁိုဝ် ၼႂ်းပိုၼ်ႉတီႈဢိၼ်ႇတူဝ်ႇ – ပၸိၾိၵ်ႉ တေမီးလွင်ႈ ၵတ်းယဵၼ်ၼိမ်တဵင်ႈၼၼ်ႉ လႆႈႁဵတ်းသၢင်ႈ ၸွမ်းၼင်ႇပၵ်းပိူင်မၢႆမီႈၵူႈမိူင်းမိူင်းမီးဝႆႉၼၼ်ႉယူႇ – ဝႃႈၼႆ။

ၸွမ်ၽွင်းလူင် မိူင်းဢေႃးသတြေးလီးယိူဝ်း လၢတ်ႈဝႃႈ – မိူင်းၶႄႇ လႅပ်ႈတေပွႆႇႁိူဝ်းၸွပ်ႇၶၢဝ်ႇ ပႂ်ႉတူၺ်းၸွမ်းလွင်ႈလၢႆၸိုင်ႈမိူင်း ႁူမ်ႈၵၼ်ၾိုၵ်းၽွၼ်ႉၵၢၼ်သိုၵ်းၼႆႉယူႇ – ဝႃႈၼႆ။