ၼၢင်းယိင်းဢႃယု 25 ပီ ၵႂႃႇ KTV ၵိၼ် Happy Water ၼမ်သေ သျွၵ်ႉတၢႆ တီႈဝဵင်းၵႃလီႉ ၸိုင်ႈတႆးပွတ်းၸၢၼ်း ။
ဝၼ်းတီႈ 16/7/2025 ယၢမ်းဝၢႆးဝၼ်း 2 မူင်း ၼၢင်းသႅင်ၶမ်း ဢႃယု 25 ပီ ယူႇပွၵ်ႉ 5 ဝဵင်းၵႃလီႉ ၵႂႃႇ KTV ၵိၼ် Happy Water ၼမ်သေ လႆႈလူႉတၢႆၵႂႃႇဝႃႈၼႆ ။
ၼၢင်းယိင်း ၵူၼ်းဝဵင်းၵႃလီႉလၢတ်ႈၽူႈတွႆႇႁွၵ်ႈဝႃႈ -“ဢၼ်တၢႆတႄႉ တၢႆမိူဝ်ႈဝႃး ၊ မၼ်းၼၢင်းလႄႈ တႆးၵေႃႉမၼ်းၵႂႃႇ KTV ၸဵမ်မိူဝ်ႈ ဝၼ်းတီႈ 15 ၼၼ်ႉ ၊ ၵိၼ်Happy Water ၼမ်သေ လူႉၵႂႃႇ ၊ ဢဝ်ၵႂႃႇသူင်ႇႁူင်းယႃယူႇၵေႃႈ ဢမ်ႇတၼ်းၶိုတ်းၼႆ”- ဝႃႈၼႆ ။
ၼၢင်းသႅင်ၶမ်းလႄႈတႆးၵေႃႉမၼ်းၼၢင်းၵႂႃႇ KTV ၼႂ်းဝၼ်းတီႈ 15/7/2025 ယၢမ်းၵၢင်ၶမ်ႈသေ လႆႈလူႉသဵင်ႈၵႂႃႇဝၼ်းတီႈ 16/7/2025 ယၢမ်းဝၢႆးဝၼ်း 2 မူင်းတီႈႁူင်းယႃ ဝဵင်းၵႃလီႉ ဝႃႈၼႆ ။
ဝၢႆးလင် သိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းမႃးၼႆႉ တီႈၵႃလီႉ ႁၢၼ်ႉ ၵိၼ် ၵျေႃႇ KTV လိူင်ႇၼမ်မႃး မီးၸမ် 10 ႁၢၼ်ႉ ။ မၢင်ႁၢၼ်ႉပိုတ်ႇ 24 ၸူဝ်ႈမူင်း။ ၵူၼ်းႁဵတ်းၵၢၼ်တီႈ ႁၢၼ်ႉ KTV ၵေႃႈပဵၼ်လုၵ်ႈဢွၼ် သႅၼ်းႁုၼ်ႈမႂ်ႇ ဢႃယု လဵၵ်ႉ ၼမ်လိူင်ႇမႃးႁႅင်း ႁဵတ်းႁႂ်ႈ ပေႃႈမႄႈ မႆႈၸႂ်တွၼ်ႈတႃႇမိူဝ်းၼႃႈ လုၵ်ႈလၢင်းၽႂ်မၼ်း ။
ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “ၼႂ်း 1 ပီ 2 ပီ မႃးၼႆႉၵူၺ်း တီႈၵႃလိ KTV ၼမ်ႁႅင်းမႃး ၊ ပေႃးၶဝ်ႈ KTV ၼိုင်ႈၶိုၼ်းၼႆႉသဵင်ႈငိုၼ်း 20-30 သႅၼ် ။ ယႃႈမဝ်းၵမ်ၵေႃႈႁႃသိုဝ်ႉငၢႆႈၼႃႇ ၊ တလဵဝ်ၼႆႉ ပေႃးလႆႈၵႂႃႇႁၢၼ်ႉလဝ်ႈ ႁၢၼ်ႉ KTV ၸင်ႇၶဝ်ဝူၼ်ႉဝႃႈ ၶိုတ်းၵၢပ်ႈၶိုတ်းပၢၼ် ၊ လီမႆႈၸႂ်တွၼ်ႈတႃႇ ၸၢတ်ႈပၢၼ်မိူဝ်းၼႃႈ လုၵ်ႈဢွၼ်ၼႃႇ ”- ဝႃႈၼႆ ။
ၵဵဝ်ႇၵပ်းလွင်ႈၼႆႉ ယူႇတီႈၽူႈတွႆႇႁွၵ်ႈ ၶတ်းၸႂ်ႁႃမၢႆၾူၼ်းတႃႇၵပ်းသိုပ်ႇ တိတ်းတေႃႇၸူးထိုင် ႁၢၼ်ႉတၢင်းၵိၼ်ၼၼ်ႉယူႇၵေႃႈ တေႃႇထိုင်ယၢမ်းလဵဝ်တႄႉ ပႆႇၵပ်းသိုပ်ႇလႆႈ။
ယႃႈ Happy Water ၼႆႉပဵၼ်ၽွင် ၊ ပဵၼ်မဵဝ်းဢၼ်ၵိၼ်တၢင်း Cocktail ၊ ၼမ်ႉ ၊ လဝ်ႈ ၸိူဝ်းၼႆႉ ။ ၼိုင်ႈထူင်ႇ လႆႈၵွၵ်းဢွၼ်ႇ 6 ၵွၵ်း ။ ၼိုင်ႈထူင်ႇၼႆႉ လႆႈပၼ် ငိုၼ်း 2 သႅၼ် ထိုင် 4 သႅၼ် ၊ ပဵၼ်ဢၼ်ႁဵတ်းႁႂ်ႈၵူၼ်းမိုင်မဝ်းလႄႈ ပေႃးၵိၼ်ယဝ်ႉ တေလႆႈတဵၼ်ႈတဵၼ်ႈဝႅၼ်ဝႅၼ် လိူတ်ႈၸင်ႇတေပၼ်ႇ။ ပေႃးၵိၼ်ယဝ်ႉယူႇၼိမ်ၼိမ်တႄႉ လိူတ်ႈတုင်သေ ထိုင်တၢႆၵူၺ်း လႆႈႁူႉၸွမ်းၼင်ႇၼႆ။
ဝၼ်းတီႈ 21/6/2025 ယၢမ်းၵၢင်ၶမ်ႈ လုၵ်ႈဢွၼ်ႇယိင်းဢႃယုပႆႇတဵမ် 18 ၶူပ်ႇၵေႃႉၼိုင်ႈ ၵႂႃႇတီႈႁၢၼ်ႉမူၼ်ႈသိူဝ်းၵိၼ်ၵျေႃႇKTV ဢၼ်မီးတီႈဝၢၼ်ႈလွႆႇၼွႆႉ ၼႂ်းၸႄႈဝဵင်းမိူင်းပၼ်ႇသေ ၵိၼ်ၼမ်ႉ Happy Water ၼမ်ပူၼ်ႉလိူဝ် ၼၼ်ႉၵေႃႈသျွၵ်ႉတၢႆၵႂႃႇ ဝႃႈၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ