မိူဝ်ႈၼႆႉဝၼ်းတီႈ 17/7/2025 ယၢမ်းၵၢင်ၼႂ် 8 မူင်း ၸုမ်းပိဝ်ႇသေႃးထီး (ၶွၼ်ႉတဝ်ႉသိုၵ်းမၢၼ်ႈ) ႁွင်ႉဢဝ်သိုၵ်းမၢၼ်ႈ ၶဝ်ႈၼႂ်းဝၢၼ်ႈ တႃႇယႃႇၵုင်း သေလွၵ်ႇငိုတ်ႈ ၵူၼ်းမိူင်းတီႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း ႁဵတ်းႁႂ်ႈၵူၼ်းမိူင်းတိုၼ်ႇသၢၼ်ႈ တူၵ်းၸႂ် ဝႃႈၼႆ ။
သိုၵ်းမၢၼ်ႈ ဢဵၼ်ႁႅင်း 30 ပၢႆ ၶဝ်ႈဝၢၼ်ႈတႃႇယႃႇၵုင်း ၶိုၼ်ႈႁိူၼ်းလူင်းႁိူၼ်းသွၵ်ႈတဝ် တီႉၺွပ်းၵူၼ်းဝၢၼ်ႈ 200 ပၢႆ ၵႂႃႇဝႆႉတီႈႁူင်းႁဵၼ်း ၼႂ်းဝၢၼ်ႈဝႃႈၼႆ ။
ၼၢင်းယိင်းၵူၼ်း ပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈၵိုင်ႉၵၢင်ႉထႅမ်ႁႅင်းသိုၵ်းၶဝ်ႈၼႂ်းဝၢၼ်ႈလႄႈ ဢွၼ်ၵၼ်တူၵ်းၸႂ် ၊ ၶဝ်ၶဝ်ႈတီႉၺွပ်းၵႂႃႇၵူႈၵေႃႉ ၊ ၵူၼ်းဝၢၼ်ႈၵေႃႈ ဢွၼ်ၵၼ်လႆႈပၢႆႈ ၊ ပေႃးၶဝ်ႁၼ်ၵေႃႈ ၶဝ်တီႉၵႂႃႇဝႆႉ တီႈႁူင်းႁဵၼ်း ၼႂ်းဝၢၼ်ႈ ။ လွၵ်ႇငိုတ်ႈ ၵူၼ်းဝၢၼ်ႈဝႃႈ ႁႂ်ႈၵူၼ်းဝၢၼ်ႈ လုမ်းလႃးတူၺ်းလူ ဢဝ်ႁူမ်ႇလူမ်ႈပၼ် ၸုမ်းပိဝ်ႇသေႃးထီး (ၸုမ်းၶွၼ်ႉတဝ်ႉ- ၽူႈပၼ်ၶၢဝ်ႇၶဝ်) ၊ ပေႃးပိဝ်ႇသေႃးထီး ပဵၼ်ၵႂႃႇသေၸိူဝ်ႉသေလွင်ႈ ၵူၼ်းဝၢၼ်ႈတေၺႃးၵိၼ် လွၵ်ႇငိုတ်ႈလၢတ်ႈၵႂႃႇၼင်ႇၼႆ ၊ ၵူၼ်းဝၢၼ်ႈတၵ်းတေလႆႈထွမ်ႇၵႂၢမ်း ၸုမ်းပိဝ်ႇသေႃးထီး – ဝႃႈၼႆပႃး”- ဝႃႈၼႆ ။
ၽွင်းသိုၵ်းမၢၼ်ႈ ထႅမ်ႁႅင်းသိုၵ်းမႃးၼၼ်ႉ မႃးတင်းၵႃး 3 လမ်း ၊ မႃးဢဝ်ရူတ်ႉၵႃးၵူၼ်းပိုၼ်ႉတီႈၸႂ်ႉ၊ ႁွင်ႉဢဝ်ၵူၼ်းမိူင်းလဵၵ်ႉယႂ်ႇၼုမ်ႇထဝ်ႈၵႂႃႇၶင်တီႈႁူင်းႁဵၼ်း။ ၵူၼ်းၼုမ်ႇဢၼ်ၶဝ်ႈပႃးၼႂ်းသႅၼ်းပၢၼ်ႁၢပ်ႇၵၢၼ်သိုၵ်းတႄႉ ၸဵမ်ယိင်း ၸဵမ်ၸၢႆး ဢွၼ်ၵၼ်ပၢႆႈမူတ်းယဝ်ႉ ။ ဢမ်ႇႁတ်းယူႇၼႂ်းဝၢၼ်ႈၼႂ်းသူၼ်ယဝ်ႉ ဝႃႈၼႆ။
ၼၢင်းယိင်းဢႃယု 40 လၢတ်ႈၽူႈတွႆႇႁွၵ်ႈဝႃႈ -“ဢွၼ်ၵၼ်တူၵ်းၸႂ်သမ်ႉပေႃး ဢမ်ႇၸၢင်ႈလၢတ်ႈ ၵႂၢမ်းသင်ယဝ်ႉ ၊ ၶဝ်ၵိုင်ႉၵၢင်ႉၶဝ်ႈဝၢၼ်ႈမႃး ပႃးတင်းၵွင်ႈၵၢင်ႇၸေးမိုဝ်းၵၼ်ႁေ။ ၵူၼ်းဝၢၼ်ႈ တႄႉပေႃးၵူဝ်ၵေႃႈလိူဝ်သေႁႆႈဢမ်ႇၸၢင်ႈႁဵတ်းႁိုဝ်။ ထၢင်ႇဝႃႈၶဝ်မႃးတီႉ ၵူၼ်းတႃႇၵႂႃႇၾိုၵ်း ၵၢၼ်သိုၵ်းၼႆၼၼ်ႉၼႃႇ။ ၵတ်ႉၵႃႈၶဝ်ဢမ်ႇႁဵတ်းႁၢႆႉတေႃႇၵူၼ်းဝၢၼ်ႈ ”- ဝႃႈၼႆ။
မိူၼ်ၼႆၼင်ႇၵဝ်ႇမိူဝ်ႈဝၼ်းတီႈ 15/7/2025 သိုၵ်းမၢၼ်ႈ ဢဵၼ်ႁႅင်း 50 ပၢႆ ၶဝ်ႈမႃးတူင်ႉၼိုင်ၼႂ်းဝၢၼ်ႈတပိၼ်ႇပျေႃႇဢၼ်မီးၾၢႆႇႁွင်ႇ ဝဵင်းယႂႃႇငၢၼ်ႇသေ သိုပ်ႇၶိုၼ်ႈၵႂႃႇတၢင်းဝၢၼ်ႈတၽၢၼ်းပိၼ်ႇ ၊ ဝၢၼ်ႈလွႆငိုၼ်းၸိူဝ်းၼႆႉထႅင်ႈ – ၵူၼ်းပိုၼ်ႉတီႈလၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ