ၼႂ်းပီ 2026 တေထိုင်ၼႆႉ မိူင်းၵမ်ႇပူးၶျႃး တေတႄႇၸႂ်ႉတိုဝ်းပၵ်းပိူင် ၵူၼ်းမိူင်းၵူႈၵေႃႉ တၵ်းတေလႆႈႁၢပ်ႇထၢမ်းၵၢၼ်သိုၵ်း ဝႃႈၼႆ။
ယွၼ်ႉပၼ်ႁႃ လွင်ႈၶဵင်ႈၶႅင်ၸွမ်းလႅၼ်လိၼ်ထႆး – ၵမ်ႇပူးၶျႃးသေ ယူႇတီႈမိူင်းၵမ်ႇပူးၶျႃး ၸင်ႇလႆႈႁၢင်ႈႁႅၼ်း တေတႄႇၸႂ်ႉတိုဝ်းပၵ်းပိူင်ဢၼ်ၼႆႉၵႂႃႇ ၼႆယဝ်ႉ။
ပၵ်းပိူင် ၵဵဝ်ႇလူၺ်ႈလွင်ႈၵူၼ်းမိူင်းၵမ်ႇပူးၶျႃးၵူႈၵေႃႉ ၼႂ်းၵႄႈဢႃယု 18 – 30 ပီ တၵ်းတေလႆႈ ႁၢပ်ႇထၢမ်းၵၢၼ်သိုၵ်းၼႆၼၼ်ႉ ယူႇတီႈ လုမ်းသၽႃးမၵ်းမၼ်ႈဝႆႉ ၸဵမ်မိူဝ်ႈ ၼႂ်းပီ 2006 ပူၼ်ႉမႃးၼၼ်ႉ။ ၵူၺ်းၵႃႈ ပႆႇလႆႈၸႂ်ႉတိုဝ်း သေပွၵ်ႈ။
ထိုင်မႃးၼႂ်းဝၼ်းတီႈ 14/07/2025 ၼႆႉ ၸွမ်ၽွင်းလူင် မိူင်းၵမ်ႇပူးၶျႃး လၢတ်ႈၵႂႃႇဝႃႈ – ၼႂ်းပီ 2026 တေထိုင်ၼႆႉ တပ်ႉသိုၵ်း မိူင်းၵမ်ႇပူးၶျႃး တေတႄႇႁပ်ႉၵူၼ်းမိူင်း ႁၢပ်ႇထၢမ်းၵၢၼ်သိုၵ်းၵႂႃႇ၊ ၶၢဝ်းယၢမ်းႁၢပ်ႇၵၢၼ်သိုၵ်းသမ်ႉ မိူဝ်ႈဢွၼ်တၢင်း မၵ်းမၼ်ႈဝႆႉ 18 လိူၼ်၊ ယၢမ်းလဵဝ် တေတိူဝ်းထိုင် 24 လိူၼ်။ လိူဝ်ၼၼ်ႉ တေၽိူမ်ႉထႅမ် ၵႃႈၸႂ်ႉၸၢႆႇၾၢႆႇၵၢၼ်သိုၵ်းပႃး ဝႃႈၼႆ။
ၼႂ်းလိူၼ်မေႊ ပူၼ်ႉမႃးၼႆႉ မိူင်းထႆးတင်း မိူင်းၵမ်ႇပူးၶျႃး ၶဵင်ႈၶႅင်ၵၼ်ၸွမ်းလႅၼ်လိၼ်သေ မီးလွင်ႈပိုတ်းယိုဝ်းၵၼ်၊ ၵူၼ်းသိုၵ်း မိူင်းၵမ်ႇပူးၶျႃး လူႉတၢႆၵႂႃႇ ၵေႃႉၼိုင်ႈ။ ဝၢႆးလင် ၼၼ်ႉယဝ်ႉ လွင်ႈၵပ်းသိုပ်ႇၵႄႈၵၢင်သွင်ၸိုင်ႈမိူင်းၵေႃႈ မီးလွင်ႈၶဵင်ႈၶႅင်ၶိုၼ်ႈမႃးႁၢဝ်ႈႁႅင်း။
လွင်ႈမိူင်းၵမ်ႇပူးၶျႃး တိူဝ်းၶႂၢၵ်ႈၵၢၼ်သိုၵ်းလႄႈ ၵၢၼ်ႁူမ်ႇလူမ်ႈၼႆႉ ပဵၼ်တွၼ်ႈတႃႇၵႅတ်ႇၶႄႁႄႉၵင်ႈ ၸိုင်ႈမိူင်းတူဝ်ၵဝ်ႇၵူၺ်း၊ ဢမ်ႇလႆႈယိူင်းဢၢၼ်း တေပူၼ်ႉပႅၼ်ၶဝ်ႈတိုၵ်းမိူင်းလႂ် ဝႃႈၼႆ။
မိူၼ်ၼင်ႇ တီႈမိူင်းထႆးတႄႉ တိုၼ်းၸႂ်ႉတိုဝ်းဝႆႉပၵ်းပိူင် ၵူၼ်းၸၢႆးၵူႈၵေႃႉ တၵ်းတေလႆႈႁၢပ်ႇၵၢၼ်သိုၵ်း။ တေလႆႈၵႂႃႇႁၢပ်ႇၵၢၼ်သိုၵ်းႁိုဝ် ဢမ်ႇလႆႈၵႂႃႇၼႆၼၼ်ႉတႄႉ ၸႂ်ႉတိုဝ်းလွၵ်းလၢႆးၸူၵ်းၶႅပ်းမႄးသေ တႅပ်းတတ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ