မိူဝ်ႈဝၼ်းတီႈ 16/07/2025 ယၢမ်းၵၢင်ဝၼ်း 12 မူင်း သိုၵ်းမၢၼ်ႈ ပိုၼ်ၽၢဝ်ႇဢွၵ်ႇဝႃႈ ယိုတ်းၵုမ်းဢဝ်လႆႈ ၸႄႈဝဵင်းၼွင်ၶဵဝ်ၶိုၼ်းတင်းသဵင်ႈ ၼႂ်းမိုဝ်းတပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA ယဝ်ႉ ဝႃႈၼႆ။

တႄႇႁၢင်လိူၼ်ၵျုၼ်ႊမႃး သိုၵ်းတဢၢင်းတင်း သိုၵ်းမၢၼ်ႈ ပဵၼ်ပၢင်တိုၵ်းၵၼ်မႃးၶိုၼ်းႁၢဝ်ႈႁႅင်း ၼႂ်းၸႄႈ ဝဵင်းၼွင်ၶဵဝ်သေ ပိူဝ်ႈတႃႇသိုၵ်းမၢၼ်ႈ တေယိုတ်းၵုမ်းဢဝ်လႆႈ ၶဝ်ႈထိုင် ၶိုၼ်း ၼႂ်းဝဵင်းၼွင်ၶဵဝ်ၼႆႉ ၾၢႆႇသိုၵ်းမၢၼ်ႈ လႆႈၸႂ်ႉၶၢဝ်းယၢမ်းႁိုင် 11 လိူၼ်ပၢႆ။ ပဵၼ်ပၢင်တိုၵ်းၵၼ်တင်း သိုၵ်းတဢၢင်းမွၵ်ႈ 600 ပွၵ်ႈသေ ၾၢႆႇသိုၵ်းတဢၢင်း လူႉတၢႆၵႂႃႇ 171 ၵေႃႉ ၵူၺ်းဢမ်ႇၵႃး ယိုတ်းဢဝ်လႆႈပႃး ၶိူင်ႈၵွင်ႈၵၢင်ႇ ၵူႈမဵဝ်း 166 လဝ်းၼႆ သိုၵ်းမၢၼ်ႈ ပိုၼ်ၽၢဝ်ႇဢွၵ်ႇဝႆႉၼင်ႇၼႆ။

ၵွၼ်ႇသိုၵ်းမၢၼ်ႈယိုတ်းမိူင်း ပႆႇပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႃႈ ယိုတ်းဢဝ်လႆႈၶိုၼ်း ဝဵင်းၼွင်ၶဵဝ် တင်းသဵင်ႈယဝ်ႉၼႆၼၼ်ႉ ၾၢႆႇသိုၵ်းတဢၢင်း TNLA ပိုၼ်ၽၢဝ်ႇဢွၵ်ႇဝႆႉဝႃႈ ႁွင်ႈၵၢၼ် လုမ်းသိုၵ်းတဢၢင်း ဢၼ်တင်ႈပၵ်းသဝ်းဝႆႉ ၼႂ်းဝဵင်းၼွင်ၶဵဝ်ၼၼ်ႉ လႆႈၶၢႆႉဢွၵ်ႇၵႂႃႇဝႆႉ ဢွင်ႈတီႈလွတ်ႈၽေးတင်းသဵင်ႈ ၸူဝ်ႈၶၢဝ်း ၼႆယဝ်ႉ။  

လိူဝ်ၼၼ်ႉ ၾၢႆႇသိုၵ်းတဢၢင်း TNLA ယင်းသိုပ်ႇပိုၼ်ၽၢဝ်ႇဝႆႉဝႃႈ တႄႇလိူၼ်မေႊ တေႃႇထိုင် လိူၼ်ၵျူႊလၢႆႊ 15 ဝၼ်းၼႆႉ ပဵၼ်ပၢင်တိုၵ်းၵၼ်တင်း သိုၵ်းမၢၼ်ႈ ၼႂ်းၸႄႈဝဵင်းၼွင် ၶဵဝ် တႃႇ 319 ပွၵ်ႈ၊ ၼႂ်းၶၢဝ်းတၢင်းပၢင်တိုၵ်းၼႆႉ ၾၢႆႇသိုၵ်းမၢၼ်ႈ ၸႂ်ႉႁိူဝ်းမိၼ် ပွႆႇမၢၵ်ႇသႂ်ႇၼႂ်းၼႃႈတီႈသိုၵ်းတဢၢင်းၵုမ်းၵမ် 106 ပွၵ်ႈ၊ ၸႂ်ႉတရူၼ်ႊပွႆႇမၢၵ်ႇသႂ်ႇ 162 ပွၵ်ႈ၊ ၸႂ်ႉၶိူင်ႈၵွင်ႈလူင် ပွႆႇမၢၵ်ႇသႂ်ႇ 4,692 ပွၵ်ႈ၊ ၸႂ်ႉမၢၵ်ႇငူၼ်ႉၵွင်ႉပွႆႇသႂ်ႇ 186 ပွၵ်ႈသေ တင်းသွင်ၾၢႆႇယင်းတိုၵ်ႉသိုပ်ႇပဵၼ်ပၢင်တိုၵ်းၵၼ်ယူႇ ၼႆယဝ်ႉ။

ၵဵဝ်ႇလူၺ်ႈပၢင်တိုၵ်း သိုၵ်းမၢၼ်ႈတင်း သိုၵ်းတဢၢင်း ၼႂ်းၸႄႈဝဵင်းၼွင်ၶဵဝ်ၼၼ်ႉသေ ၵူၼ်းၼႂ်းပိုၼ်ႉတီႈ ၼႂ်းဝဵင်းၼွင်ၶဵဝ်လၢတ်ႈဝႃႈ – မိူဝ်ႈဝၼ်းတီႈ 15/07/2025 ယၢမ်းႁူဝ်ၶမ်ႈ ၾၢႆႇသိုၵ်းမၢၼ်ႈ ၶဝ်ႈထိုင်လႆႈၼႂ်းဝဵင်းၼွင်ၶဵဝ် ပွၵ်ႉပၢင်ႁၵ်ႉလႄႈ ပွၵ်ႉၵၢတ်ႇ ၸိူဝ်းမီးႁွင်ႈၵၢၼ်လုမ်း၊ ယေးငိုၼ်း (ဘဏ်) ၸိူဝ်းၼႆႉသေတႃႉ တၢင်းၼွၵ်ႈဝဵင်းလႄႈ ၸွမ်းသၢပ်ႇဝဵင်းၼွင်ၶဵဝ်တႄႉ တိုၵ်ႉလႆႈငိၼ်းသဵင်ၵွင်ႈသဵင်မၢၵ်ႇယူႇ ဝႃႈၼႆ။

ၼႂ်းၶၢဝ်းတၢင်းပၢင်တိုၵ်းသိုၵ်းမၢၼ်ႈတင်း သိုၵ်းတဢၢင်း ၼႂ်းၸႄႈဝဵင်းၼွင်ၶဵဝ် တႄႇလိူၼ်မေႊ တေႃႇထိုင် လိူၼ်ၵျူႊလၢႆႊ ဝၼ်းတီႈ 15 ၼႆႉ ၵူၼ်းမိူင်းၼႂ်းၸႄႈဝဵင်းၼွင်ၶဵဝ်၊ ၵျွၵ်ႉမႄး၊ သီႇပေႃႉ၊ မိူင်းၵုတ်ႈလႄႈ မိူင်းငေႃႉ ၸိူဝ်းယူႇဝႆႉ ၼႂ်းၼႃႈတီႈသိုၵ်းတဢၢင်းၵုမ်းၵမ်ၼၼ်ႉ လူႉတၢႆၵႂႃႇယွၼ်ႉမၢၵ်ႇၶိူင်ႈၵွင်ႈၵၢင်ႇ သိုၵ်းမၢၼ်ႈတႃႇ 23 ၵေႃႉ၊ မၢတ်ႇၸဵပ်းၵႂႃႇ 88 ၵေႃႉ၊ ၵျွင်းမုၼ်ၸဝ်ႈ လူႉၵွႆၵႂႃႇ 8 လင်၊ ႁူင်းႁဵၼ်းလူႉၵွႆၵႂႃႇ 8 လင်လႄႈ ႁိူၼ်းၵူၼ်းမိူင်းလူႉၵွႆၵႂႃႇ 220 လင်ၼႆ – ၾၢႆႇသိုၵ်းတဢၢင်း ပိုၼ်ၽၢဝ်ႇဢွၵ်ႇဝႆႉၼင်ႇၼႆ။

မိူဝ်ႈဝၼ်းတီႈ 25/06/2024 ၼၼ်ႉၵေႃႈ ၾၢႆႇသိုၵ်းတဢၢင်း TNLA ၊ သိုၵ်းထၼူႉ DPLA ၊ ၸုမ်းၵႅတ်ႇၶႄၵူၼ်းမိူင်း PDF ၶဝ် ႁူမ်ႈၵၼ် လိုပ်ႈတိုၵ်းသိုၵ်းမၢၼ်ႈသေ ယိုတ်းၵုမ်းဢဝ်လႆႈဝႆႉ ၸႄႈဝဵင်းၼွင်ၶဵဝ် ႁိုင်ၶၢဝ်း တၢင်းပီပၢႆ။ ဝၢႆးလင် ပၢင်တိုၵ်းၽႅၼ် ၵၢၼ်ယၼ်ႇသိုၵ်း 1027 လွပ်ႈသွင်မႃး သိုၵ်းတဢၢင်း ယိုတ်းၵုမ်းဢဝ်လႆႈဝဵင်းၼႂ်းမိူင်းတႆးပွတ်းႁွင်ႇ တႃႇ 12 ဝဵင်း။ ယၢမ်းလဵဝ် ၾၢႆႇသိုၵ်းတဢၢင်း လႆႈထွႆထွၼ်ဢွၵ်ႇပၼ်သိုၵ်းမၢၼ်ႈၶိုၼ်း ၼႂ်းၸႄႈဝဵင်းၼွင်ၶဵဝ်ၼႆႉ ပဵၼ်ပွၵ်ႈၵမ်းဢွၼ်တၢင်းသုတ်း ၼႆယဝ်ႉ။

သိုၵ်းတဢၢင်း လႆႈထွႆဢွၵ်ႇၼႂ်းဝဵင်းၼွင်ၶဵဝ် ပၼ်ၶိုၼ်းသိုၵ်းမၢၼ်ႈၼႆႉ ၾၢႆႇၸုမ်းသိုၵ်းၸၢဝ်းၶိူဝ်း လူႉသုမ်းၵႂႃႇသုၼ်ႇလႆႈ တႃႇတေလွၵ်ႇငိုတ်ႈထိုင်လႆႈ ဝဵင်းပၢင်ႇဢူးလႄႈ သုၼ်ႇလႆႈတႃႇၵပ်းသိုပ်ႇႁႅင်းသိုၵ်းၸၢဝ်းၶိူဝ်း ၸိူဝ်းတူင်ႉၼိုင်ယူႇ ၼႂ်းမိူင်းတႆးပွတ်းၸၢၼ်းၼႆ ၽူႈထတ်းသၢင်ၵၢၼ်မိူင်းလႄႈ လဵပ်ႈႁဵၼ်းလွင်ႈငဝ်းလၢႆးၵၢၼ်သိုၵ်း မိူင်းတႆးပွတ်းႁွင်ႇ ၵေႃႉၼိုင်ႈ ထတ်းသၢင်လၢတ်ႈၼႄဝႆႉၼင်ႇၼႆ။

“ဝဵင်းၼွင်ၶဵဝ်ၼႆႉ လမ်ႇလွင်ႈပိူဝ်ႈတႃႇ ၸုမ်းသိုၵ်းၸၢဝ်းၶိူဝ်းတႄႉတႄႉ။ ပေႃးၵုမ်းလႆႈဝႆႉ ဝဵင်းၼွင်ၶဵဝ်ၼႆၸိုင် ၸၢင်ႈလွၵ်ႇငိုတ်ႈသိုၵ်း မၢၼ်ႈလႆႈထိုင် ဝဵင်းပၢင်ႇဢူး၊ ပႃႉထူး၊ လွၵ်ႉၸွၵ်ႇ ၸဵမ်ၸိူဝ်းၼႆႉ။ ၸၢင်ႈၵပ်းသိုပ်ႇပႃးလႆႈၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းမီးဝႆႉ ၼႂ်းမိူင်းတႆးပွတ်းၸၢၼ်း”။

ပိူဝ်ႈတႃႇ သိုၵ်းမၢၼ်ႈ တေယိုတ်းၵုမ်းဢဝ်လႆႈၶိုၼ်း ဝဵင်းၼွင်ၶဵဝ်ၼႆႉ ၸတ်းငႃးသိုၵ်းၶဝ်ႈမႃးၸွမ်းသဵၼ်ႈ တၢင်းပၢင်ဢူး – ၼွင်ၶဵဝ်၊ တွင်းၶမ်း – ၼွင်ၶဵဝ်သဵၼ်ႈၼိုင်ႈသေ ဢၼ်ၶဝ်ႈထိုင်လႆႈၼႂ်းဝဵင်းၼွင်ၶဵဝ်ယူႇယၢမ်းမိူဝ်ႈလဵဝ်ၼႆႉ ပဵၼ်ငႃးသိုၵ်း ဢၼ်လုၵ်ႉတၢင်းတွင်းၶမ်း ထူဝ်းသိုၵ်းၶိုၼ်ႈမႃး ဝႃႈၼႆ။

ငႃးသိုၵ်းမၢၼ်ႈ ဢၼ်လုၵ်ႉတၢင်းဝဵင်းပၢင်ႇဢူး ထူဝ်းသိုၵ်းၶိုၼ်ႈမႃးတၢင်း ဝဵင်းၼွင်ၶဵဝ်ၼၼ်ႉ တိုၵ်ႉထိုင် ဝႆႉၸိူဝ်းဝၢၼ်ႈသၢမ်သိူဝ်လႄႈ ႁိမ်းႁွမ်းဝၢၼ်ႈၵျွၵ်ႉၵျၢမ်းၼၼ်ႉသေ ပဵၼ်ပၢင်တိုၵ်းၵၼ်ဝႆႉတင်း သိုၵ်းတဢၢင်း TNLA ဝႃႈၼႆ။

တႅမ်ႈ – ၽူၺ်းၼုမ်ႇ