ဝၼ်းတီႈ 15/07/2025 ယၢမ်းၵၢင်ၼႂ်ၸဝ်ႉ 1 မူင်း ႁိူဝ်းမိၼ်သိုၵ်းမၢၼ်ႈ ပွၵ်ႇမၢၵ်ႇသႂ်ႇ တီႈထုင်ႉမေႃႇၶျီး ၸႄႈဝဵင်းၽႃသွင်ႇ မိူင်းယၢင်းလႅင် ႁိူဝ်းမိၼ်တိုၵ်းသိုၵ်းမၢၼ်ႈ ပွႆႇမၢၵ်ႇသႂ်ႇ 2 လုၵ်ႈ၊ ၸၢၵ်ႇမၢၵ်ႇတိူဝ်ႉၵူၼ်းမိူင်းမၢတ်ႇၸဵပ်း 5 ၵေႃႉ၊ ပဵၼ်ၼၢင်းယိင်း 4 ၵေႃႉလႄႈ ၵူၼ်းၸၢႆးၵေႃႉၼိုင်ႈ။

မိူၼ်ၼႆ ၼႂ်းဝၼ်းတီႈ 14 ပူၼ်ႉမႃးၼႆႉၵေႃႈ ႁိူဝ်းမိၼ်တိုၵ်းသိုၵ်းမၢၼ်ႈ ပွႆႇမၢၵ်ႇသႂ်ႇ တီႈထုင်ႉမေႃႇၶျီး။ ၵူၼ်းမိူင်းလူႉတၢႆ 5 ၵေႃႉ ပဵၼ်ၼၢင်းယိင်း 4 ၵေႃႉလႄႈ ၵူၼ်းၸၢႆးၵေႃႉၼိုင်ႈ၊ လိူဝ်ၼၼ်ႉ မၢတ်ႇၸဵပ်းထႅင်ႈ 10 ပၢႆ ႁိူၼ်းယေးၵူၼ်းမိူင်း လူႉၵွႆၸွမ်းတင်းၼမ်။

ဝၼ်းတီႈ 14 ၼၼ်ႉ ႁိူဝ်းမိၼ်သိုၵ်းမၢၼ်ႈ ပွႆႇမၢၵ်ႇသႂ်ႇ 2 လုၵ်ႈ၊ တူၵ်းတႅၵ်ႇ ဢွင်ႈတီႈၵူၼ်းၵိုၼ်း ၼိုင်ႈလုၵ်ႈလႄႈ ၼိူဝ်သဵၼ်ႈတၢင်းၵၢင်ဝၢၼ်ႈ ၼိုင်ႈလုၵ်ႈ။ ယွၼ်ႉမီးၵူၼ်းမိူင်းယူႇသဝ်းၼမ်လႄႈ ၵူၼ်းမိူင်းၺႃးၸၢၵ်ႇမၢၵ်ႇသေ လႆႈမၢတ်ႇၸဵပ်းလူႉတၢႆၼမ် ႁိူၼ်းယေးၵူၼ်းမိူင်း လူႉၵွႆထႅင်ႈတင်းၼမ်။

တီႈထုင်ႉမေႃႇၶျီးၼႆႉ ဢမ်ႇမီးပၢင်တိုၵ်းသင်သေတႃႉ ႁိူဝ်းမိၼ်သိုၵ်းမၢၼ်ႈ ၵႆႉပွႆႇမၢၵ်ႇသႂ်ႇ၊ ႁဵတ်းႁႂ်ႈၵူၼ်းမိူင်း တိုၼ်ႇသၢၼ်ႈတူၵ်းၸႂ်၊ ဢွၼ်ၵၼ်မႆႈၸႂ်လွင်ႈႁူမ်ႇလူမ်ႈဝႆႉ။

ပူၼ်ႉမႃး ဝၼ်းတီႈ 9 ၼၼ်ႉၵေႃႈ ႁိူဝ်းမိၼ်သိုၵ်းမၢၼ်ႈ ပွႆႇမၢၵ်ႇသႂ်ႇ တီႈထုင်ႉမေႃႇၶျီး ၵူၼ်းပိုၼ်ႉတီႈ လူႉတၢႆ 5 ၵေႃႉ။ ၼႂ်းလိူၼ်ၼႆႉၵူၺ်း ႁိူဝ်းမိၼ်သိုၵ်းမၢၼ်ႈ ပွႆႇမၢၵ်ႇသႂ်ႇ ဢမ်ႇယွမ်း 8 ၵမ်း၊ ၵူၼ်းမိူင်းလူႉတၢႆ 10 ပၢႆယဝ်ႉ – သိုဝ်ႇၶၢဝ်ႇ Kantarawaddy Times ဢွၵ်ႇဝႆႉၼင်ႇၼႆ။