တႄႇႁူဝ်လိူၼ်ၵျူႊလၢႆႊၼႆႉမႃး သိုၵ်းတဢၢင်းတင်း သိုၵ်းမၢၼ်ႈ ယိုတ်းမိူင်း ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းၸႄႈဝဵင်းၼွင်ၶဵဝ်သေ ၵူၼ်းမိူင်းၼႂ်းပိုၼ်ႉတီႈ လႆႈဢွၵ်ႇယၢၼ်ႁိူၼ်းယေး ပၢႆႈၵႂႃႇယူႇတီႈဢွင်ႈလွတ်ႈၽေးၸူဝ်ႈၶၢဝ်း သဵၼ်ႈတၢင်းၵႂႃႇမႃး လႃႈသဵဝ်ႈ – ဝဵင်းလိူဝ်ႇၵေႃႈ ၺႃးဢိုတ်းဝႆႉ ၸဝ်ႈရူတ်ႉၵႃး ၵူၼ်းမိူင်းၸိူဝ်းမီးၽႅၼ် လူဝ်ႇဢွၵ်ႇၶၢဝ်းတၢင်းၼၼ်ႉ လႆႈဢွမ်ႈၵႂႃႇမႃးၸွမ်းသဵၼ်ႈတၢင်းလတ်းလႄႈ ပဵၼ်ဢၼ်ယၢပ်ႇၽိုတ်ႇလၢႆလၢႆလွင်ႈ။

ယွၼ်ႉသဵၼ်ႈတၢင်းလူင် လႃႈသဵဝ်ႈ – ဝဵင်းလိူဝ်ႇ ဢိုတ်းဝႆႉလႄႈ ၸဝ်ႈရူတ်ႉၵႃးၶဝ် လႆႈၵႂႃႇတၢင်း ဢွမ်ႈ 3 သဵၼ်ႈ။ လုၵ်ႉဝဵင်းလႃႈသဵဝ်ႈ – သီႇပေႃႉ – ၼမ်ႉလၼ်ႈ – ၵျွၵ်ႉၵူႇ – လွၵ်ႉၸွၵ်ႇ – ပင်းတရႃႉ – ယႂႃႇငၢၼ်ႇ – ဝဵင်းလိူဝ်ႇ သဵၼ်ႈၼိုင်ႈ။ လႃႈသဵဝ်ႈ – ၼမ်ႉလၼ်ႈ – မိူင်းၵိုင် – လၢႆးၶႃႈ – ပၢင်လူင် – တူၼ်ႈတီး – ယႂႃႇငၢၼ်ႇ – ဝဵင်းလိူဝ်ႇ သဵၼ်ႈၼိုင်ႈ။ လႃႈသဵဝ်ႈ – မိူင်းယႆ – ၵေးသီး – လၢႆးၶႃႈ – ပၢင်လူင် – တူၼ်ႈတီး – ယႂႃႇငၢၼ်ႇ – ဝဵင်းလိူဝ်ႇ သဵၼ်ႈၼိုင်ႈ ၼႆယဝ်ႉ။

ၸဝ်ႈၵႃး ၵေႃႉႁပ်ႉၸၢင်ႈသူင်ႇၵူၼ်း လႃႈသဵဝ်ႈ – ဝဵင်းလိူဝ်ႇ လၢတ်ႈၼႄဝႃႈ – “ယၢမ်းလဵဝ် သဵၼ်ႈတၢင်း ၼႂ်းၵႄႈၵၢင်ၵျွၵ်ႉၵူႇတင်း ၼမ်ႉလၼ်ႈၼႆႉ ၵႂႃႇယၢပ်ႇႁႅင်း။ သဵၼ်ႈတၢင်းသမ်ႉ ပဵၼ်တၢင်းလိၼ် ဢမ်ႇပႆႇလႆႈသိူဝ်ႇယၢင်။ သမ်ႉပဵၼ်ၶၢဝ်းၾူၼ်သေ ရူတ်ႉၵႃး ၵႂႃႇမႃးၵေႃႈ ၼမ်ႁႅင်း။ ၸဵမ်ၵႃး ဢွၼ်ႇ ၵႃးလူင်ၵႂႃႇသဵၼ်ႈၼႆႉမူတ်းလႄႈ ႁဵတ်းႁႂ်ႈတၢင်းပိူဝ်ႉတၢင်းဢုင်။ မၢင်ပွၵ်ႈ ၵႃးၶမ်ၵၼ်ထိုင် တီႈပေႃးလႆႈ ဢဝ်ၵႃးၸၢၵ်ႈထုၺ်လိၼ် မႃးၸွႆႈလၢၵ်ႈဢွၵ်ႇ၊ မၢင်ပွၵ်ႈ လႆႈၼွၼ်းၶိုၼ်းပႂ်ႉၵေႃႈမီး”- ဝႃႈၼႆ။

ယၢမ်းလဵဝ် ၵႃႈၶၼ် တႃႇဢွၵ်ႇၶၢဝ်းတၢင်းၵႂႃႇ ဝဵင်းလိူဝ်ႇ – လႃႈသဵဝ်ႈၼႆႉ ၼိုင်ႈၵေႃႉလႂ် လႆႈပၼ်ယူႇ ဢေႇသုတ်း 3 သႅၼ်ပျႃး။ ပေႃးလုၵ်ႉတၢင်း ဝဵင်းလႃႈသဵဝ်ႈ မႃးတီႈဝဵင်းသီႇပေႃႉတႄႉ ယင်းတိုၵ်ႉ လတ်းၵႂႃႇမႃးၼိူဝ်သဵၼ်ႈတၢင်းလူင် လႆႈယူႇ။ ၵူၺ်းၵႃႈ ၼႂ်းၸႄႈဝဵင်းၼွင်ၶဵဝ်သမ်ႉ ယွၼ်ႉသိုၵ်းမၢၼ်ႈတင်း သိုၵ်းတဢၢင်း ၶဵင်ႈၶႅင်ၵၢၼ်သိုၵ်းၵၼ်ႁၢဝ်ႈႁႅင်းလႄႈ သဵၼ်ႈတၢင်း ၵျွၵ်ႉမႄး – ၼွင်ၶဵဝ် – ပၢင်ႇဢူႈလူင်ၼၼ်ႉတႄႉ ယင်းပႆႇၵႂႃႇမႃးလႆႈ။ ၾၢႆႇၼိုင်ႈၵေႃႈ ၶူဝ်လူင်ၼႂ်းႁူၺ်ႈၵိုတ်ႈ ၼၼ်ႉၵေႃႈ လူႉၵွႆဝႆႉ ၼႆယဝ်ႉ။

တႅမ်ႈ – ၽူၺ်းၼုမ်ႇ