ဝၼ်းတီႈ 15/07/2025 ယၢမ်းၵၢင်ၼႂ် 10 မူင်း 45 မိၼိတ်ႉ ထဝ်ႈယိင်း ၵူၼ်းဝၢၼ်ႈႁူးသူၼ် ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၵႂႃႇပိတ်းၼဵင်ႈသေ ယဵပ်ႇၺႃးမၢၵ်ႇၾင်လိၼ် လူႉတၢႆထင်တီႈ။
ထဝ်ႈယိင်းၼၼ်ႉ ၸိုဝ်ႈႁွင်ႉ ပႃႈဢေးဝုၼ်း ဢႃယု 53 ပီ၊ မီးလုၵ်ႈၸၢႆးၵေႃႉၼိုင်ႈ ဢႃယု 17 ပီ ၊ လုၵ်ႈၸၢႆးမၼ်း ႁဵတ်းၵၢၼ်ဝႆႉ ၼႂ်းႁၢၼ်ႉၶၢႆ ၸိူဝ်ႉၽၼ်းမွၵ်ႇမၢၵ်ႇႁၢၵ်ႈႁူဝ်သေ ယူႇၸွမ်းႁိူၼ်းပေႃႈလဵင်ႉ မႄႈလဵင်ႉဝႆႉ။ ပႃႈဢေးဝုၼ်းတႄႉ ယူႇတီႈဝၢၼ်ႈႁူးသူၼ်သေ ႁဵတ်းၵၢၼ်သူၼ်ႁႃၵိၼ်လဵင်ႉတွင်ႉၸဝ်ႈၵဝ်ႇ။
ၵူၼ်းၸၢႆး ဢႃယု 20 ပၢႆ ယူႇဝဵင်းၵျွၵ်ႉမႄး လၢတ်ႈၽူႈတွႆႇႁွၵ်ႈဝႃႈ – “ဝၼ်းဢၢင်းၵၢၼ်းမိူဝ်ႈဝႃး ပႃႈဝုၼ်း လႄႈ တင်းဢူၺ်းၵေႃႉမၼ်း ၵႂႃႇပိတ်းၼဵင်ႈၸွမ်းၵၼ် တီႈၼႂ်းသူၼ် ႁိမ်းဝၢၼ်ႈႁူးသူၼ်ၼႆႉ၊ ဢူၺ်းၵေႃႉမၼ်း ပိတ်းၾၢႆႇၼိူဝ်၊ ပႃႈဢေးဝုၼ်း သမ်ႉပိတ်းၾၢႆႇတၢင်းတႂ်ႈ ၼႆႉသေ ၵႂႃႇယဵပ်ႇၺႃးမၢၵ်ႇမႅင်း တႅၵ်ႇသႂ်ႇ တၢႆထင်တီႈ။ ဢူၺ်းၵေႃႉမၼ်းတႄႉ ဢမ်ႇတၼ်းပဵၼ်သင်၊ ၸင်ႇၼႅတ်ႈမိူဝ်းႁွင်ႉၵူၼ်းဝၢၼ်ႈမႃးၸွႆႈၵၼ်ဢဝ်တူဝ်တၢႆၼၼ်ႉၼႃႇ” – ဝႃႈၼႆ။
ဢၼ်ပႃႈဢေးဝုၼ်းၵႂႃႇယဵပ်ႇၺႃးမၢၵ်ႇၼၼ်ႉ ပဵၼ်မၢၵ်ႇၽႂ်မႃးႁၢင်ႈၵၢင်ဝႆႉၸဵမ်လႂ်ၼႆတႄႉ ၽႂ်ဢမ်ႇၸၢင်ႈလၢတ်ႈ ဢမ်ႇၸၢင်ႈႁူႉလႆႈတႅတ်ႈတေႃး။
ထုင်ႉႁူးသူၼ်ၼႆႉ ထူပ်းၽေးပၢင်တိုၵ်းမႃးၸဵမ်ပၢၼ်ၵွၼ်ႇပၢၼ်လႂ်။ ၽွင်းပီ 2021 ၼၼ်ႉ သိုၵ်း RCSS လႄႈ SSPP ပိုတ်းယိုဝ်းတိုၵ်းတေႃးၵၼ်တၢင်းထုင်ႉႁူးသူၼ်ႁၢဝ်ႈႁႅင်း။ ၽွင်းၼၼ်ႉၵူၼ်းဝၢၼ်ႈၵူၼ်းသူၼ် လႆႈဢွၼ်ၵၼ်ပၢႆႈၽေးသိုၵ်းတင်းဝၢၼ်ႈ။ ၵမ်ႈၽွင်ႈၵႂႃႇၶၢတ်ႈႁွင်ႈၶၢတ်ႈႁိူၼ်းယူႇၼႂ်းဝဵင်း။ ၵမ်ႈၽွင်ႈပၢႆႈၵႂႃႇယူႇတၢင်ႇတီႈတၢင်ႇဝဵင်း။
ဝၢႆးပၢင်တိုၵ်းယဵၼ် ၵမ်ႈၽွင်ႈ ပွၵ်ႈမိူဝ်းယူႇၶိုၼ်းတီႈဝၢၼ်ႈ ႁဵတ်းၵၢၼ်သူၼ်ၼဵင်ႈ ႁႃၵိၼ်လဵင်ႉတွင်ႉ ။ ယၢမ်းလဵဝ် ယွၼ်ႉၵူၼ်းဝၢၼ်ႈ ယဵပ်ႇၺႃးမၢၵ်ႇ တၢႆထင်တီႈလႄႈ ႁဵတ်းႁႂ်ႈၵူၼ်းမိူင်း မႆႈၸႂ် တႃႇၶဝ်ႈသူၼ်။
ဢိူင်ႇႁူးသူၼ်ၼႆႉ မီးၸဵင်ႇႁွင်ႇဝၼ်းတူၵ်းဝဵင်းၵျွၵ်ႉမႄး။ ၸွမ်းၼင်ႇသဵၼ်ႈမၢႆ လွင်ႈၵဵပ်းသဵၼ်ႈမၢႆႁူဝ်ၵူၼ်း ပီ 2014 တႄႉ ဢိူင်ႇႁူးသူၼ်ၼႆႉ ႁူဝ်ၵူၼ်းမီး 2000 ပၢႆ။
တၢင်းဢိူင်ႇႁူးသူၼ်ၼႆႉ ယၢမ်းလဵဝ် မီးၸုမ်းသိုၵ်းတႆး SSPP လႄႈ သိုၵ်းတဢၢင်း TNLA ယူႇသဝ်းတူင်ႉၼိုင်ယူႇသဝ်းဝႆႉ။ ၼႂ်းလိူၼ်သွင်လိူၼ်ပူၼ်ႉမႃးၼႆႉ သွင်ၸုမ်းယင်းတွၵ်ႉတႅၵ်ႉမီးပၼ်ႁႃၵၼ်ယူႇၵမ်းၼိုင်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ