သိုၵ်းမၢၼ်ႈတင်း သိုၵ်းတဢၢင်း (TNLA) ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼိူဝ်သဵၼ်ႈတၢင်းလူင်ၵၢၼ်ၵႃႉၶၢႆ မိူင်းမၢၼ်ႈ – မိူင်းၶႄႇ သဵၼ်ႈတၢင်းဝဵင်းၼွင်ၶဵဝ် – ဝဵင်းၵျွၵ်ႉမႄးသေ ႁႅင်းတပ်ႉပႆလိၼ်သိုၵ်းမၢၼ်ႈ ၶဝ်ႈၽႅဝ်ထိုင်လႆႈတီႈပၢႆႉတၢင်းၶဝ်ႈဝဵင်းၼွင်ၶဵဝ် ယၢၼ်ၵႆၵၼ်တင်းဝဵင်းၼွင်ၶဵဝ်မွၵ်ႈ 3 လၵ်းယဝ်ႉ ဝႃႈၼႆ။

သိုၵ်းမၢၼ်ႈၸတ်းငႃးသိုၵ်း 3 ငႃး၊ ၸႂ်ႉႁႅင်းတပ်ႉပႆလိၼ် တပ်ႉမ 11 (အင်းတိုင်) ၊ တပ်ႉမ 55 (ၵၢတ်ႇလေႃႉ) ၸိူဝ်းၼႆႉ ၶဝ်ႈမႃးတၢင်းဝၢၼ်ႈၵၢၼ်ႇၵျီး၊ ဝၢၼ်ႈမၢၵ်ႇၶီႈၼူသေ ၵႂႃႇတၢင်းဝၢၼ်ႈၼမ်ႉသွင်ႁူး ၶဝ်ႈတၢင်းတပ်ႉ ၵွင်ႈလူင် (ဒတရ) 606 သဵၼ်ႈၼိုင်ႈ၊ တပ်ႉၵွင်ႈလူင် ဝၢၼ်ႈတွင်းၶမ်း ဢၼ်ပၵ်းယူႇဝႆႉတီႈဝၢၼ်ႈၼွင်လႅင် ၼၼ်ႉ လုၵ်ႉတၢင်းဝၢၼ်ႈသူၺ်ႇပျီႇ ၺုၼ်ႉၼၼ်ႉသေ ၵႂႃႇတၢင်းၶူဝ်ၵိုတ်ႈၼၼ်ႉသဵၼ်ႈၼိုင်ႈ ၶဝ်ၸႂ်ႉၶိူင်ႈၵွင်ႈလူင်လႄႈ တရူၼ်ႊၸိူဝ်းၼႆႉ ၶဝ်ႈလူမ်ႇတိုၵ်း တပ်ႉသိုၵ်းတဢၢင်း (TNLA) မႃး ၼႆယဝ်ႉ။

ယၢမ်းလဵဝ် သိုၵ်းတဢၢင်းလႄႈ ၸုမ်းသိုၵ်းဢူၺ်းလီႁူမ်ႈတင်း သိုၵ်းထၼူႉ (DPLA) ၸိူဝ်းယူႇၼႂ်းပိုၼ်ႉတီႈ ၸႄႈဝဵင်းၼွင်ၶဵဝ် ဢမ်ႇမီးႁႅင်းသိုၵ်း၊ ႁႅင်းၶိူင်ႈၵွင်ႈၵၢင်ႇပဵင်းပေႃး ပိူဝ်ႈတႃႇႁႅၼ်းသိုၵ်းလေႃႇတိုၵ်းၶိုၼ်း တပ်ႉသိုၵ်းမၢၼ်ႈယဝ်ႉလႄႈ လႆႈပဵၼ်ၾၢႆႇႁပ်ႉတိုၵ်းသေ ထွႆဢွၵ်ႇပၼ်သိုၵ်းမၢၼ်ႈယူႇ ၵမ်းလွႆးလွႆးယဝ်ႉၼႆ ၵူၼ်းၼႂ်းပိုၼ်ႉတီႈ ၸႄႈဝဵင်းၼွင်ၶဵဝ် ၵေႃႉလႆႈငိူင်ႉဝႄႈပၢင်တိုၵ်း ၵႂႃႇသွၼ်ႈယူႇၼႂ်းၸႄႈဝဵင်းၵျွၵ်ႉမႄး လၢတ်ႈၼႄၼင်ႇၼႆ။

“သိုၵ်းလွႆၶဝ်ၼႆႉ ဢမ်ႇပေႃးမီးၼႂ်းပိုၼ်ႉတီႈတႄႉတႄႉယဝ်ႉ။ ဢၼ်မီးယူႇၼႂ်းပိုၼ်ႉတီႈပၢင်တိုၵ်းၼႆႉ ၵမ်ႈၼမ်ပဵၼ်သိုၵ်းထၼူႉၵူၺ်း။ သဵင်မၢၵ်ႇလူင်ၵျၢမ်းၼႃႇ ၸူဝ်ႈၶၢဝ်းၼႆႉ။ မိူဝ်ႈႁဝ်းပၢႆႈမႃးၼႆႉ ႁၼ်သိုၵ်းလွႆၶဝ် လၢႆႈၶူဝ်းၵူၼ်းႁိူၼ်းႁႄ လႅၼ်ႈပၢႆႈသိုၵ်းမၢၼ်ႈ ၸွမ်းၼႂ်းသူၼ်ၶဝ်ႈၵၢပ်ႇၼၼ်ႉယူႇ။ ၸွမ်းပွၵ်ႉၸၢၼ်းလႄႈ ဝၢၼ်ႈပၢင်ႇသပ်ႉပေႇ ၸိူဝ်းၼႆႉတႄႉ သိုၵ်းမၢၼ်ႈၽႅဝ်ဝႆႉယဝ်ႉ။ ၾၢႆႇတၢင်းၵၢတ်ႇၼွင်ၶဵဝ်ၼၼ်ႉ ၸုမ်းလႂ်ၸုတ်ႇတႄႉဢမ်ႇႁူႉ။ ႁၼ်ၾႆးမႆႈဝႆႉ”။

မိူဝ်ႈဝႃး ဝၼ်းတီႈ 13/07/2025 ယၢမ်းႁူဝ်ၶမ်ႈ 5 မူင်း ၼႆႉၵေႃႈ ၶျွင်ႊ Channel ၶွင်ၵူၼ်းၸိူဝ်းၵမ်ႉထႅမ်ႁၼ် လီၼိူဝ်သိုၵ်းမၢၼ်ႈ ပိုၼ်ၽၢဝ်ႇဢွၵ်ႇဝႆႉၼႂ်း  Telegram ဝႃႈ – “ၾၢႆႇသိုၵ်းမၢၼ်ႈ ယိုတ်းၵုမ်းလႆႈၶိုၼ်းဝၢၼ်ႈ ၸိူဝ်းမီးဝႆႉ ၾၢႆႇၸၢၼ်းဝဵင်းၼွင်ၶဵဝ်ၼၼ်ႉတင်းသဵင်ႈသေ ႁွတ်ႈဝႆႉတီႈႁိမ်းၶူဝ်ၵိုတ်ႈယဝ်ႉ”- ဝႃႈၼႆ။

မိူဝ်ႈဝၼ်းတီႈ 11 ၼၼ်ႉၵေႃႈ သိုၵ်းမၢၼ်ႈၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းပွၵ်ႉၵၢတ်ႇ ဝဵင်းၼွင်ၶဵဝ်လႄႈ ႁိူၼ်းၵူၼ်းမိူင်း လူႉၵွႆၵႂႃႇၸွမ်းထႅင်ႈတင်းၼမ် ၼႆယဝ်ႉ။

လႆႈႁူႉဝႃႈ သိုၵ်းမၢၼ်ႈ ပႆႇၶဝ်ႈထိုင်လႆႈ ၼႂ်းဝဵင်းၼွင်ၶဵဝ်သေတႃႉ ယၢမ်းလဵဝ် ပဵၼ်ပၢင်တိုၵ်းၵၼ်ဝႆႉတင်း သိုၵ်းတဢၢင်း TNLA ၸွမ်းဝၢၼ်ႈၵုင်းၸၢမ်၊ ၵျွၵ်ႉတေႃႇ၊ ၵျွၵ်ႉၵျၢမ်း ၸိူဝ်း ၼၼ်ႉယူႇသေ ပိူဝ်ႈတႃႇတေ ယိုတ်းၵုမ်းဢဝ်လႆႈၶိုၼ်း ဝဵင်းၼွင်ၶဵဝ်ၼၼ်ႉ သိုၵ်းမၢၼ်ႈ ထႅမ်ႁႅင်းသိုၵ်း ၼပ်ႉႁူဝ်ႁဵင်ၶဝ်ႈလေႃႇတိုၵ်း တပ်ႉသိုၵ်းတဢၢင်းမႃးၶိုၼ်း ႁိုင်ၵႂႃႇမွၵ်ႈၶၢဝ်းတၢင်း 5 လိူၼ်ယဝ်ႉလႄႈ တႄႇႁူဝ်လိူၼ်ၵျူႊလၢႆႊၼႆႉမႃး တင်းသွင်ၾၢႆႇ ၸင်ႇလႆႈယိုဝ်းၵၼ်ၶိုၼ်းႁၢဝ်ႈႁႅင်း ၼႆယဝ်ႉ။

ၾၢႆႇၼိုင်ႈၵေႃႈ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၸွမ်းၼႂ်းဝဵင်းၼႂ်းပွၵ်ႉၼႂ်းယွမ်ႇၸိူဝ်းမႃး သိုၵ်းတဢၢင်းလႄႈ တင်းၸုမ်းသိုၵ်းထၼူႉ DPLA  ၶဝ်ယူႇသဝ်း ၼႂ်းၸႄႈဝဵင်းမိူင်းၵုတ်ႈ၊ ဝဵင်းၵျွၵ်ႉမႄး၊ ဝဵင်းသီႇပေႃႉ ၸိူဝ်းၼႆႉ ႁၢဝ်ႈႁႅင်းသေ ၵူၼ်းမိူင်းၸိူဝ်းယူႇဝႆႉ ၼႂ်းပိုၼ်ႉတီႈၼႃႈတီႈသိုၵ်းတဢၢင်း TNLA ၵုမ်းၵမ်ဝႆႉၼၼ်ႉ လႆႈမၢတ်ႇၸဵပ်းလူႉတၢႆၵႂႃႇၸွမ်းတင်းၼမ် ၼႆယဝ်ႉ။

ယၢမ်းလဵဝ် သဵၼ်ႈတၢင်း ႁူၺ်ႈၵိုတ်ႈ ၼႂ်းၵႄႈၵၢင်ဝဵင်းၵျွၵ်ႉမႄး – ဝဵင်းၼွင်ၶဵဝ်ၼႆႉ ၺႃးဢိုတ်းဝႆႉ ဢမ်ႇပၼ်ရူတ်ႉၵႃး လတ်းၵႂႃႇမႃး တႄႇၸဵမ်မိူဝ်ႈဝၼ်းတီႈ 10/07/2025 ၼၼ်ႉမႃး ႁၢၼ်ႉတေႃႇထိုင်ဝၼ်းမိူဝ်ႈၼႆႉသေ ၶူဝ်ၵိုတ်ႈၼၼ်ႉၵေႃႈ လႆႈလူႉၵွႆၵႂႃႇဝႆႉ ပဵၼ်ၸုမ်းလႂ်ယႃႉလႅဝ်တႄႉ ဢမ်ႇလႆႈႁူႉၼႆ ၵူၼ်းၼႂ်းပိုၼ်ႉတီႈ ၵေႃႉယူႇဝၢၼ်ႈၼွင်ပိင် လၢတ်ႈၼႄၼင်ႇၼႆ။

“ငႃးသိုၵ်းမၢၼ်ႈ ဢၼ်ၶိုၼ်ႈမႃးတၢင်းၶူဝ်ၵိုတ်ႈၼၼ်ႉ ဢဝ်တရူၼ်ႊႁႄ ယိုဝ်းသႂ်ႇတၢင်း ဝၢၼ်ႈၼွင်ပိင်ၼၼ်ႉ။ ၶူဝ်ၼႂ်းၵိုတ်ႈၼၼ်ႉၵေႃႈ ၺႃးယႃႉၵွႆဝႆႉယဝ်ႉ။ ဢွၼ်တၢင်းၼႆႉ မၢၼ်ႈၶဝ်ထၢင်ႇဝႃႈ တီႈဝၢၼ်ႈၼွင်ပဵတ်း မီးပလွင်ႈၶဝ်ယူႇၼႆႁႄ ဢဝ်တရူၼ်ႊမႃးပွႆႇသႂ်ႇ 3 လုၵ်ႈ။ ၵူၼ်းဝၢၼ်ႈၸိူဝ်းၼၼ်ႉၵေႃႈ လႆႈငိူင်ႉဝႆႉ ၸူဝ်ႈၶၢဝ်းယဝ်ႉ”။

ယွၼ်ႉသိုၵ်းမၢၼ်ႈတင်း သိုၵ်းတဢၢင်း ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းၸႄႈဝဵင်းၼွင်ၶဵဝ်လႄႈ ၵူၼ်းမိူင်းၸိူဝ်းယူႇၼႂ်းပိုၼ်ႉတီႈ ဝဵင်းၼွင်ၶဵဝ် ဢွၼ်ၵၼ်ငိူင်ႉဝႄႈပၢႆႈဢွၵ်ႇမိူဝ်းယူႇသဝ်း ၼႂ်းၸႄႈဝဵင်းၵျွၵ်ႉမႄး ၵမ်ႈၼမ် ဝႃႈၼႆ။

ၵဵဝ်ႇလူၺ်ႈ ပၢင်တိုၵ်းသိုၵ်းမၢၼ်ႈတင်း သိုၵ်းတဢၢင်း ၼႂ်းၸႄႈဝဵင်းၼွင်ၶဵဝ်ၼႆႉသေ ၾၢႆႇႁွင်ႈၵၢၼ်ပိုၼ်ၽၢဝ်ႇ TNLA တႄႉ ယင်းပႆႇ ဢွၵ်ႇမႃးယိုၼ်ယၼ်သင်ဝႆႉ။

တႅမ်ႈ – ၽူၺ်းၼုမ်ႇ