ၽွင်းတပ်ႉသိုၵ်းမၢၼ်ႈ လုမ်ႈတိုၵ်းတွင်းၶမ်းယူႇၼၼ်ႉ လူၺ်းယေႇဢူး ၽူႈၶၢၼ်ပၢၵ်ႇ TNLA တွပ်ႇလၢတ်ႈတီႈသိုဝ်ႇၶၢဝ်ႇၵႂႃႇ “ၼွင်ၶဵဝ်ၼႆႉ ႁဵတ်းႁိုဝ်ၵေႃႈ တေဢမ်ႇႁႂ်ႈလႆႈပွႆႇပၼ် ၶိုၼ်းၼႂ်းမိုဝ်း SAC” ဝႃႈၼႆ။

မိူဝ်ႈလဵဝ် ႁိုင်ၵႂႃႇထႅင်ႈဝူင်ႈ ႞ ယဝ်ႉသေ ငဝ်းလၢႆးၵေႃႈ လႅၵ်ႈလၢႆႈမႃးတင်းၼမ်၊ ၾၢႆႇတပ်ႉသိုၵ်းမၢၼ်ႈၼႆႉ ၵွႆႈယူႇၵွႆႈၽိုတ်ႉၸမ်ၶွပ်ႇဝဵင်းမႃးတိၵ်းတိၵ်းလႄႈ ၵူၼ်းမိူင်းၵေႃႈ လႆႈဢွၼ်ငိူင်ႉဝႄႈ ၶၢႆႉယၢင်ႇပၢႆႈဢွၵ်ႇ ဝဵင်းယူႇဢမ်ႇထၢတ်ႇ။

ၼွၵ်ႈလိူဝ် ၸိူဝ်းဢမ်ႇၸၢင်ႈၶၢႆႉပၢႆႈလႃးလႃးသေ လႆႈၸုၼ်ႉတၢႆယူႇသဝ်းၼၼ်ႉ ဢမ်ႇပေႃးၶႂ်ႈၵိုတ်းၽႂ်ယဝ်ႉ။

ပေႃးထိုင်တီႈတပ်ႉသိုၵ်းမၢၼ်ႈ ၶဝ်ႈၽႅဝ်ၵၢင်ဝဵင်းမႃး တေၺႃးႁေႃႈႁိုပ်ႈ ႁွင်ႉႁႃမိပ်ႇငႅၼ်းၼႆ လၢမ်းႁၼ်ၵၼ်သေ ၸင်ႇတၵ်းၵဵၼ်ၶူဝ်းသွင်ႉပၢႆႈသိုဝ်ႈၽႂ်တၢင်းမၼ်းယဝ်ႉ။

ဢမ်ႇၵႃးၵူၺ်း တီႈၼွင်ၶဵဝ်၊ ၵူၼ်းမိူင်းၼႂ်းၵူင်ဝဵင်းၵျွၵ်ႉမႄးၵေႃႈ ထွမ်ႇၶၢဝ်ႇငိၼ်းငၢဝ်း တၢင်းၼွင်ၶဵဝ်သေ ပၢႆႈမူၵ်းသေႃႉသွၼ်ႈၸွမ်းဝၢၼ်ႈၶူင်ႇသၢပ်ႇဝဵင်း တီႈဢမ်ႇၸႂ်ႈၼႃႈလိၼ် TNLA ၵုမ်းၵမ်ၸိူဝ်းၼၼ်ႉယူႇ ႁၢၼ်ႉတေႃႇဝဵင်းပေႃးၶႂ်ႈႁၢမ်းယဝ်ႉ။

ၼႂ်းဝူင်ႈဝၢင်ႈၼႆႉ တေလႆႈႁၼ်ၾၢႆႇတပ်ႉသိုၵ်းမၢၼ်ႈ ဝႆႉၼၵ်းၶိုၼ်ႈလေႃႇၸုမ်းသိုၵ်း TNLA ႁဵတ်းတႄႉ ႁဵတ်းဝႃႈယူႇ။

ၼွင်ၶဵဝ်၊ ၵျွၵ်ႉမႄး၊ မိူင်းၵုတ်ႈ သၢမ်ၼႃႈတီႈၼႆႉ ဝႆႉပဵၼ်ပဝ်ႉမၢႆၶိုၵ်ႉတွၼ်းသေ ပွႆႇမၢၵ်ႇတႅၵ်ႇသႂ်ႇ ၶႂ်ႈဝႃႈၵူႈၶိုၼ်းၵူႈၼႂ်ၸဝ်ႉယဝ်ႉ။

မၢင်ၵမ်း ပွႆႇပႃးၸဵမ် သီႇပေႃႉႁေၵွၼ်ႇ။ ၵူၺ်းႁႂ်ႈလႆႈငိၼ်းၶၢဝ်ႇဝႃႈ မီးသိုၵ်းလွႆလႃႈ ယူႇဢမ်ႇႁိုင်သင် လမ်းလူၺ်းပွႆႇသႂ်ႇလႆႈၵမ်းလဵဝ်ၼႆႉ ပွင်ႇဝႃႈ သၢႆၵၢၼ်ၸွပ်ႇၶဝ် ၸိုမ်းထိုင်လႆႈပိုၼ်ႉတီႈၸွတ်ႇၸေးဝႆႉတၢၼ်ႇတၢၼ်ႇယဝ်ႉ၊ ဝၢႆးသေ တပ်ႉၶဝ်ၶဝ်ႈၶိုၼ်းလႃႈသဵဝ်ႈၼႆႉ ၸင်ႇပဵၼ်မႃးၸိူင်ႉၼႆဢၼ်ဝႃႈၼၼ်ႉ တေၾၢင်ႉႁူႉၵၼ်ယူႇ။

ပေႃးတူၺ်းတီႈၼွင်ၶဵဝ်ၼႆ ၾၢႆႇလုၵ်ႉၽိုၼ်ႉၼႆႉ ဢၼ်ၵိုၵ်းၽႃႁွမ်းၸွမ်း TNLA တေမီး DPLA ထၼူႉလႄႈ PDF မၼ်းတလေး၊ PDF ၸႄႈတွၼ်ႈၵျွၵ်ႉသႄႇၸိူဝ်းၼႆႉ ဢိတ်းဢွတ်း။

ၾၢႆႇ TNLA လုၵ်ႉတၢင်းၼမ်ႉသၼ်ႇ၊ မၢၼ်ႈတူင်ႈ သူင်ႇလူင်းမႃးထႅင်ႈ ႁႅင်းတိုၵ်းႁူၵ်းၸဵတ်းပၢၵ်ႇ ဢၼ်ဝႃႈၼၼ်ႉ ပေႃးႁိဝ်ႈၸင်ႈတင်း သိုၵ်း SAC ပွႆႇၶိုၼ်ႈၵႂႃႇၼၼ်ႉၼႆ တေႃႉတႄႉမီး ႞ ပုၼ်ႈ ၼႂ်းသိပ်းပုၼ်ႈၵူၺ်း။

ႁူမ်ႈဝႃႈ ပဵၼ်သိုၵ်းမႂ်ႇ ဢၼ်တိုၵ်ႉလႆႈသွၼ်ၵၢၼ်သိုၵ်းၵေႃႈယႃႇ ဢဝ်ၼမ်တိူမ်းသေ ပွႆႇတၢႆပွႆႇႁၢႆဢမ်ႇ တၢပ်ႈၼပ်ႉသွၼ်ႇဢီးလူသင်လႄႈ ႁူႉၵႃႈၾၢႆႇၶဝ်တပ်ႉမၢၼ်ႈ ယူႇၾၢႆႇပေႉပုၼ်ႈယဝ်ႉ။

လိူဝ်ၼၼ်ႉ မီးပႃးႁႅင်းႁိူဝ်းမိၼ်ထႅင်ႈ။ ၾၢႆႇ ႞ သမ်ႉ လုၵ်ႉတၢင်းဝၢၼ်ႈၽုၺ်း၊ ထုင်ႉယဵမ်ႈပၢင်ႇလၢႆႇမွၵ်ႇၵုမ်ႈသေ ဢဝ်ၶိူင်ႈလူင်ယိုဝ်းၸွႆႈ၊ ယဝ်ႉၵေႃႈ လုၵ်ႉတၢင်းၵုင်းၸၢမ်၊ ႁူၺ်ႈၵိုတ်ႈသေ ထေႃလူင်းၵႂႃႇၵေႃႈ မီးၼႆလႄႈ တေလႆႈမၢႆထိုင်ဝႃႈ ၶဝ်ဢၢင်ႈၶဝ်ႈယိုတ်းပႃးၸဵမ်ၵျွၵ်ႉမႄးယူႇၼၼ်ႉယဝ်ႉ။

ၵမ်းၼႆႉ ပေႃးၶိုၼ်းၼပ်ႉသၢင်ႈတူၺ်း ၾၢႆႇလုၵ်ႉၽိုၼ်ႉၼႆ TNLA ၼႆႉ တႃႇတေလႆႈႁႅင်းၸွႆႈတီႈ ဢူၺ်းလီမၼ်း MNDAA ၼႆ တေဢမ်ႇပေႃးမီးလႆႈသၢႆငၢႆလီ။

တီႈ AA တႄႉၵေႃႈ တေလႆႈယူႇၵမ်ႈၽွင်ႈ ၸိူင်ႉၼင်ႇမႃးၸွႆႈၵမ်ႉၵႅမ်ပၼ် ဝၼ်းသိုၵ်းထၼူႉ လူင်းပၢင်သွၼ်ၵၢၼ်သိုၵ်း ၼႂ်းလိူၼ်ၵျုၼ်ႊ 24 ဝၼ်း ဢၼ် TNLA ၾိုၵ်းၽွၼ်ႉပၼ် ၼၼ်ႉၶႃႈၼေႃႈ။

ၵူၺ်းၵႃႈ ႁႂ်ႈပေႃးၵမ်ႉမႃႇလႆႈ တပ်ႉသိုၵ်းမၢၼ်ႈ ဢၼ်ပၼ်လႆႈၵွင်ႈၵၢင်ႇၸေးမိုဝ်း တႃႇၵူၼ်းၶဝ်ၶၢၼ်း ၵဵပ်းလႆႈ ႞ လိူၼ်လႂ်ႁႃႈႁဵင်ၼၼ်ႉသႄႈ။

ၼႂ်း PDF ဢၼ်ၽႃႁွမ်းၸွမ်း TNLA သေ ႁႅင်းယႂ်ႇလိူဝ်ပိူၼ်ႈ ပဵၼ်ၸုမ်းမၼ်းတလေး ဢၼ်တေႇၸႃႇၸၢၼ်း (တေဇာစန်း) ယူႇလင်ၵမ်ၵုမ်း၊ တေၸႂ်ယႂ်ႇၸုမ်းၼႆႉၵေႃႈ ပေႃးထၢၼ်ႈဝႃႈ ဢမ်ႇလႆႈပႃးႁႅင်းၵမ်ႉလင် ၶွင် NUG ၼႆ ဢမ်ႇပေႃးၸၢင်ႈပဵၼ်မႃႇႁႅင်းတဝ်ႉၸွႆႈလႆႈတႄႉတႄႉမီးမီး။

ၵူၺ်းၼႃႇ ၼႂ်းၶၢဝ်းၶိဝ်းၼႆႉ တေႇၸႃႇၸၢၼ်း (တေဇာစန်း) တင်း NUG ဢမ်ႇပေႃးၵိၼ်ငႃးၵၼ်လႄႈသင်၊ တၢမ်တူဝ် NUG ၵုမ်ႇႁူဝ်ၶႆႈၸွမ်း လွင်ႈတေမူၼ်ႉမႄး ပိူင်ၶွတ်ႇၽွတ်ႈၸုမ်း ၶဝ်လႄႈသင်၊ ၸဵမ်ပိုင်း ၵွပ်ႈပိူဝ်ႈ PDF မၼ်းတလေးၼႆႉ ဢမ်ႇၸႂ်ႈၸုမ်းတႂ်ႈမိုဝ်း NUG မႃးလႄႈသင်သေၵေႃႈ ပၢင်တိုၵ်းပွၵ်ႈၼႆႉတႄႉ ယူႇတီႈ TNLA ၵႃႈလႆႈၵၼ်ႉၵူၵ်ႉမင်ယူႇႁင်း ၵူၺ်းမၼ်းယဝ်ႉ။

ၵမ်းၼႆႉ ဝၢၵ်ႈဝိၼ်ႇတူၺ်း ပၢင်ၵုမ်ၵိုတ်းတိုၵ်းၼႂ်းၵႄႈ SAC လႄႈ TNLA ဢၼ်မိူင်းၶႄႇ ႁဵတ်းၵႄႇၼင်ႈၵၢင်သေ ႁွင်ႉႁႂ်ႈဢုပ်ႇၵၼ်ၼၼ်ႉၼႆ ၼႂ်းလိူၼ်ဢေႃႊၵတ်ႊသ် တေမႃး ၵႃႈလႆႈၵႂႃႇၺႃးၵၼ်ထႅင်ႈပွၵ်ႈ ႞။

ၸဵမ်ပိုင်းမိူင်းၶႄႇ တူၵ်ႇထိုင် TNLA ႁႂ်ႈလႆႈပွႆႇၶိုၼ်းၼႃႈတီႈ ၸိူဝ်းမီးၸွမ်းသဵၼ်ႈတၢင်းၵႃး မၼ်းတလေး – မူႇၸေႊ၊ ၵူၺ်းၵႃႈ TNLA ဢမ်ႇယွမ်းၽွမ်ႉ။

တီႈ SAC ၵေႃႈ ၶႄႇပူင်ၼၵ်းဝႆႉ တႃႇႁႂ်ႈၸတ်းပဵၼ်ပၢင်လိူၵ်ႈတင်ႈ ၼႂ်းပီၼႆႉ။ တႃႇပဵၼ်လႆႈပၢင်လိူၵ်ႈတင်ႈၼႆႉ SAC ဢမ်ႇၸၢင်ႈႁဵတ်း၊ ယွၼ်ႉပိူဝ်ႈ မၼ်းယိုၼ်ပဵၼ်ၸုမ်းထိင်းသိမ်းမၢၼ်ႈမိူင်း ဢမ်ႇၼၼ် ၸုမ်းပႂ်ႉပႃးလၵ်းမိူင်း 2008။

ပေႃးၶႂ်ႈႁဵတ်းပၢင်လိူၵ်ႈတင်ႈ SAC လူဝ်ႇမွပ်ႈဢႃႇၼႃႇပၼ် တီႈၶွင်ႇသီႇၵႅတ်ႇၶႄႁူမ်ႇလူမ်ႈၸိုင်ႈမိူင်း ဢၼ်ၾၢႆႇမၢၼ်ႈယေႃႈဝႃႈ (ကာလုံ) ၼၼ်ႉ။

မိူဝ်ႈၼႂ်းလိူၼ်ၼႆႉသဵင်ႈ ၸင်ႇတေငၢမ်ႇၸွမ်းပိူင်။ ၸၢမ်းႁႂ်ႈဝႃႈ SAC တေႁဵတ်းပဵၼ်ပၢင်လိူၵ်ႈတင်ႈတႄႉလႃႈ ယူႇတီႈမိူင်းၶႄႇ တၵ်းၸွႆႈၵူႈပႃႈၼႃႈၾၢႆႇ ၼင်ႇၼပ်ႉႁူႉၵၼ် တင်းမိူင်းယဝ်ႉလႄႈ SAC ၵေႃႈ လႅပ်ႈတေဢဝ်သုၼ်ႇလႆႈၼိူဝ်ၼႆႉသေ ပိုတ်းတိုၵ်းတေႃႇ TNLA လူၺ်ႈလၢႆးသိုဝ်ႈ ၸဵမ်လၢႆးဢွမ်ႈ ဢမ်ႇႁၢင်ႉယဝ်ႉ။

မိူၼ်ဝႃႈ ၵွၼ်ႇပႆႇလႆႈဢုပ်ႇၵၢၼ်ငမ်းယဵၼ် ၸွမ်း TNLA ထႅင်ႈပွၵ်ႈတေမႃးၼႆႉ SAC တၵ်းတေတိုၵ်းတႃမီႇတႃၵၢၼ်ႉ တႃႇယိုတ်းလႆႈၶိုၼ်းၼွင်ၶဵဝ်ယူႇ ၼၼ်ႉယဝ်ႉ။

ပေႃးပဵၼ်ၼၼ်တႄႉမႃး ၸွင်ႇၸုမ်းဢူၺ်းလီ ၼႂ်း FPNCC တေဢမ်ႇၸွႆႈၾၢႆႇ TNLA ႁႃႉၼႆ လီလႆႈၶႆႈၸႂ်ယူႇ၊ လၢမ်းၶၢတ်ႈဝႆႉဝႃႈ တေဢမ်ႇၸၢင်ႈၸွႆႈ ယွၼ်ႉမိူင်းၶႄႇ ယႅၵ်ႈသေမိပ်ႇငႅၼ်းဝႆႉၵူႈမူႇၸုမ်းၵူၺ်းဢမ်ႇၵႃး ယွၼ်ႉမီးပႃးလွင်ႈဢမ်ႇၽွင်းလိူဝ်လႆႈ ၵၢၼ်ၼွင်ႇၵဵဝ်ႈၸွမ်းၸုမ်းသိုၵ်းမၢၼ်ႈႁင်းၽႂ်မၼ်း ၼၼ်ႉယဝ်ႉ။

ပေႃးသမ်ႉဝႃႈ ယိုတ်းလႆႈၶိုၼ်းၼွင်ၶဵဝ်ယဝ်ႉတႄႉ တႃႇသိုပ်ႇတၢမ်လၢမ်းငုမ်းငၢမ်းတၢဝ်းပႃး ၵျွၵ်ႉမႄး၊ သီႇပေႃႉၼၼ်ႉၵေႃႈ ႁိုဝ်တေယၢပ်ႇယဝ်ႉသႄႈ။

ၸိူင်ႉၼႆၼႆႉ တိူၵ်ႈတီႈပဵၼ်မႃးတႄႉၵေႃႈ ၵႃႈတေလႆႈၸီႉၼႄးဝႃႈ ယွၼ်ႉၵွပ်ႈၸိူဝ်းၸုမ်းဢူၺ်းလီလုၵ်ႉၽိုၼ်ႉၼင်ႇၵၼ် ဢမ်ႇတူၵ်းလူင်းတမ်းမီးဝႆႉ ၶေႃႈၵိၼ်ၵႅၼ်ႇၵၢၼ်မိူင်းၼႅၼ်ႈ ၼႃ၊ ယွၼ်ႉမဝ်းမိင်း ၸွမ်းလၢႆးၵၢၼ်တိုၵ်း ၽႂ်ပေႉမၼ်းပိူင်ႇၼၼ်ႉယဝ်ႉ ၼႆၵူၺ်းဢေႃႈ။