ၼႂ်းဝၼ်းတီႈ 09/07/2025 ပူၼ်ႉမႃးၼႆႉ ၶူဝ်ၵၢႆႇၶၢမ်ႈမႄႈၼမ်ႉ လင်ၼိုင်ႈ ၼႂ်းမိူင်းဢိၼ်ႊတီႊယိူဝ်ႊ ပွတ်းတူၵ်း ႁၵ်းတူၵ်းၵႂႃႇလႄႈ မီးၵူၼ်းလူႉတၢႆ ဢမ်ႇယွမ်း 9 ၵေႃႉ ဝႃႈၼႆ။

လွင်ႈၼႆႉ ပဵၼ်ၵႂႃႇတီႈထုင်ႉပႃႇတူဝ်ႇတႃႇရႃႇ၊ ၼႂ်းၸႄႈတွၼ်ႈၵူႇၵျႃႇရႅတ်ႉ၊ မိူင်းဢိၼ်ႊတီႊယိူဝ်ႊ။ ပူၼ်ႉမႃးလၢႆဝၼ်းၼႆႉၵေႃႈ ၾူၼ်တူၵ်းဝႆႉႁၢဝ်ႈႁႅင်း မိူၼ်ၵၼ်။

မိူဝ်ႈၽွင်းၶူဝ်ႁၵ်းၵႂႃႇၼၼ်ႉ ရူတ်ႉၵႃး ဢၼ်တိုၵ်ႉလတ်းၶၢမ်ႈၵႂႃႇမႃးတီႈၼိူဝ်ၶူဝ် ယၢတ်ႇတူၵ်းလူင်း ၵႂႃႇၼႂ်းၼမ်ႉတင်းၼမ်၊ လႆႈၸွႆႈထႅမ်ၵူၼ်းဝႆႉ 5 ၵေႃႉ – ၽွင်းလူင်ၾၢႆႇပၢႆးယူႇလီ ၸႄႈတွၼ်ႈၵူႇၵျႃႇရႅတ်ႉ လၢတ်ႈၼင်ႇၼႆ။

ၽူႈမီးပုၼ်ႈၽွၼ်းၶဝ်လၢတ်ႈဝႃႈ – ၶူဝ် ဢၼ်ႁၵ်းၵႂႃႇၼႆႉ လႆႈၵေႃႇသၢင်ႈဝႆႉ ၸဵမ်မိူဝ်ႈပီ 1989 – ဝႃႈၼႆ။

ၵၢၼ်ၵေႃႇသၢင်ႈ ၼႂ်းမိူင်းဢိၼ်ႊတီႊယိူဝ်ႊၼႆႉ ဢမ်ႇပေႃးမႅၼ်ႈ ၸွမ်းၼင်ႇပိူင်ၵၢၼ်လွင်ႈလွတ်ႈၽေး၊ လွင်ႈပဵၼ်ၽေးၵိုင်ႉၵၢင်ႉၸွမ်းသဵၼ်ႈတၢင်းဝႆး၊ ၸွမ်းၶူဝ်ၸိူဝ်းၼႆႉၵေႃႈ မီးၼမ်။

မိူၼ်ၼင်ႇ မိူဝ်ႈပီ 2022 ၼၼ်ႉ ၶူဝ်ၽႅၼ်လင်ၼိုင်ႈ ဢၼ်မီးဢႃယု ၶၢဝ်းတၢင်းၸမ် 100 ပီ တီႈၼႂ်းၸႄႈတွၼ်ႈၵူႇၵျႃႇရႅတ်ႉ ႁၵ်းပုတ်းၵႂႃႇ၊ ၽွင်းၼၼ်ႉ ၵူၼ်းမိူင်းၼပ်ႉႁူဝ်ပၢၵ်ႇၵေႃႉ ယၢတ်ႇတူၵ်းၵႂႃႇ ၼႂ်းၼမ်ႉ၊ မီးၵူၼ်းလူႉတၢႆ 132 ၵေႃႉ ၼႆယဝ်ႉ။