မိူဝ်ႈဝၼ်းတီႈ 4/5/2026 ယၢမ်းတၢမ်းၶမ်ႈ ၽူႈၵုမ်းတပ်ႉသိုၵ်းမိူင်းဢိၼ်ႊတီႊယိူဝ်ႊ Admiral Dinesh Kumar Tripathi ႁွင်ႉဢဝ်တင်း တူဝ်တႅၼ်းၸုမ်းတပ်ႉသိုၵ်းလႄႈ ႁိူဝ်းသၢင်း ၽေႃးၾၢႆႇတပ်ႉသိုၵ်း မိူင်းဢိၼ်ႊတီႊယိူဝ်ႊ ႁွတ်ႈၽႅဝ်တီႈ တႃႈႁိူဝ်းၼမ်ႉလိုၵ်ႉ (သီလဝါဆိပ်ကမ်း) ပိူဝ်ႈတႃႇႁူမ်ႈမိုဝ်းၵၼ်တင်း သိုၵ်းမၢၼ်ႈယိုတ်းမိူင်းသေ ၾိုၵ်းၵၢၼ်သိုၵ်းၵႂႃႇ ၼႆ ယဝ်ႉ။
ၸွမ်ၸိၵ်းသိုၵ်းမၢၼ်ႈ ၸွမ်သိုၵ်းလူင် ယႄးဝိၼ်းဢူး ၵေႃႉၵႂႃႇႁပ်ႉတွၼ်ႈသေ ႁွင်ႉမႃးႁူပ်ႉထူပ်းႁဵတ်းပၢင်ဢုပ်ႇ ဢူဝ်းၵၼ်ၵႂႃႇ တီႈဝဵင်းလူင်ၼေႇပျီႇတေႃႇ။ ၾၢႆႇတပ်ႉသိုၵ်းမၢၼ်ႈ ၸွမ်သိုၵ်း ၵူဝ်ႇၵူဝ်ႇဢူး ၾၢႆႇၵုမ်းၵမ် တပ်ႉၼမ်ႉ လိၼ် လူမ်း ၊ ၸွမ်သိုၵ်းလူင် ထဵင်ႇဝိၼ်း ၾၢႆႇၵႅတ်ႇၶႄတပ်ႉၼမ်ႉ လႄႈ ၸွမ်သိုၵ်းလူင် ယႄးဝိၼ်းဢူး ဢွၼ်ၼမ်းဢုပ်ႇဢူဝ်းၸွမ်း ၽွင်းတၢင်လူင်မိူင်းဢိၼ်ႊတီႊယိူဝ်ႊ မိူင်းမၢၼ်ႈ H.E. Mr. Abhay Thakur တင်း ၽွင်းတၢင်သိုၵ်းတပ်ႉပႆလိၼ် တပ်ႉၼမ်ႉ မိူင်းဢိၼ်ႊတီႊယိူဝ်း ၵဵဝ်ႇလူၺ်ႈမိူင်းမၢၼ်ႈ Colonel Jaswinder Singh Gill လႄႈ Captain Manoj Kumar Pandey ၵႂႃႇ ၼႆယဝ်ႉ။
ၼႂ်းပၢင်ႁူပ်ႉထူပ်းတပ်ႉသိုၵ်းမၢၼ်ႈ တင်း တပ်ႉသိုၵ်းမိူင်းဢိၼ်ႊတီႊယိူဝ်းၼၼ်ႉ တင်းသွင်ၾၢႆႇ ဢုပ်ႇဢူဝ်းၵၼ်ၵႂႃႇ ၵဵဝ်ႇလူၺ်ႈ ၵၢၼ်ယုၵ်ႉမုၼ်းၼမ်ႉၵတ်ႉ ၾိုၵ်းၵၢၼ်သိုၵ်းႁူမ်ႈၵၼ် ၊ ၽိူမ်ႉလွင်ႈႁူမ်ႇလူမ်ႈ ၵၢၼ်ၼိမ်တဵင်ႈ ၸွမ်းလႅၼ်လိၼ် ၸဵမ်ၸိူဝ်းၼႆႉ ၼႆယဝ်ႉ။
လႆႈႁူႉဝႃႈ ၾၢႆႇတပ်ႉသိုၵ်းမိူင်းဢိၼ်ႊတီႊယိူဝ်း ၼမ်းဢဝ် ႁိူဝ်းသၢင်းၽေႃးၾၢႆႇတပ်ႉၼမ်ႉ သႅၼ်း INS Satpura (F-48) လႄႈ INS Sunayna (P-57) မႃးသွင်လမ်း။ ႁွင်ႉဢဝ်ပႃး ၵူၼ်းသိုၵ်း လႄႈ ၽူႈမီးၸၼ်ႉ မႃးၸွမ်း တႃႇ 527 ၵေႃႉ တေယူႇလိုဝ်ႈတီႈၼႂ်းမိူင်းမၢၼ်ႈ ႁိုင်ၶၢဝ်းတၢင်း 3 ဝၼ်း။ ပေႃးထိုင်ဝၼ်းတီႈ 6/5/2026 ၸင်ႇပွၵ်ႈၶိုၼ်းမိူဝ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ