ထဝ်ႈၸၢႆး ၽေႃႇၵျႃးသိၵ်း (Fauja Singh) ၵူၼ်းလႅၼ်ႈမႃႇရတုၼ်ႇ (marathon) ဢႃယုယႂ်ႇလိူဝ်ပိူၼ်ႈသုတ်း ၼႂ်းလုမ်ႈၾႃႉ ပဵၼ်ၽေးၵိုင်ႉၵၢင်ႉ ၺႃးၵႃးၽႃႇသႂ်ႇသေ လူႉတၢႆၵႂႃႇ ၼႂ်းဝၼ်းတီႈ 14/07/2025 ၽွင်းဢႃယုလႆႈ 114 ပီ။
ၸုမ်းပလိၵ်ႈမိူင်းဢိၼ်ႊတီႊယိူဝ်ႊၶဝ် လၢတ်ႈဝႃႈ – မိူဝ်ႈၽွင်းမၼ်းၸၢႆးတိုၵ်ႉပႆလတ်း ၶၢမ်ႈတၢင်း ဢၼ်မီးၼႂ်းဝၢၼ်ႈၵိူတ်ႇမၼ်းၸၢႆး ၼႂ်းၸႄႈတွၼ်ႈပၢၼ်ႇၵျၢပ်ႈ (Punjab) ၊ မိူင်း ဢိၼ်ႊတီႊယိူဝ်ႊ ပွတ်းတူၵ်းၼၼ်ႉ ၺႃးရူတ်ႉၵႃးလမ်းၼိုင်ႈ ၽႃႇသႂ်ႇ။ မၼ်းၸၢႆး မၢတ်ႇၸဵပ်းတီႈၵွၵ်းႁူဝ်လႄႈ လုပ်ႇၶီႈၶၢင်ႈသေ လႆႈလူႉတၢႆၵႂႃႇ မိူဝ်ႈၽွင်းသူင်ႇယူတ်းယႃတူဝ် တီႈႁူင်းယႃ။ ယၢမ်းလဵဝ် ပလိၵ်ႈၶဝ် တိုၵ်ႉၵူတ်ႇထတ်းသွၵ်ႈႁႃ ရူတ်ႉၵႃးၼၼ်ႉယူႇ – ဝႃႈၼႆ။
ၽေႃႇၵျႃးသိၵ်း (Fauja Singh) ၼႆႉ ၵိူတ်ႇမိူဝ်ႈပီ 1911 တီႈမူႇဝၢၼ်ႈဢၼ်ၼိုင်ႈ ၊ ၼႂ်းမိူင်းဢိၼ်ႊတီႊယိူဝ်ႊ။ ၵူၺ်းၵႃႈ ဝၢႆးလင် မေးၼၢင်းလႄႈ လုၵ်ႈၸၢႆးမၼ်း လူႉတၢႆၵႂႃႇၼၼ်ႉ မၼ်းၸၢႆးလႆႈၶၢႆႉ ၵႂႃႇယူႇသဝ်းတီႈ မိူင်းၾရင်ႇသဵတ်ႈ။ ၽွင်းဢႃယုမၼ်းၸၢႆးလႆႈ 80 ပီပၢႆၼၼ်ႉ လႆႈတႄႇၶဝ်ႈၶေႉၶဵင်ႇ ၼႂ်းပၢင်ပွႆးမႃႇရတုၼ်ႇ ၾၢႆႇလႅၼ်ႈၶေႉၵၼ်။
မၼ်းၸၢႆးယၢမ်ႈၶဝ်ႈၶေႉၶဵင်ႇ ၼႂ်းပၢင်ပွႆးမႃႇရတုၼ်ႇ ၾၢႆႇလႅၼ်ႈၶေႉၵၼ် ဢၼ်လႆႈလႅၼ်ႈတၢင်းၵႆ 26 လၵ်းပၢႆ (26.2 လၵ်း) ၼၼ်ႉမႃး 9 ပွၵ်ႈ။ ၵူၺ်းၵႃႈ ယွၼ်ႉမၼ်းၸၢႆး ဢမ်ႇမီးဝႆႉသဵၼ်ႈဝႂ်ၵိူတ်ႇ (မွေးစာရင်း) လႄႈ ဢမ်ႇလႆႈထုၵ်ႇမၵ်းမၼ်ႈပဵၼ် ၵူၼ်းလႅၼ်ႈဢႃယုယႂ်ႇလိူဝ်ပိူၼ်ႈၼႂ်းလုမ်ႈၾႃႉ တီႈၼႂ်းၵရိၼ်းၼိတ်ႉ (Guinness World Records) – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ