ဝၼ်းတီႈ 09/07/2025 ၼႆႉ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ တႅမ်ႈလိၵ်ႈတုမ်ႉတွပ်ႇသူင်ႇထိုင် တီႈလူင်ပွင်ၸိုင်ႈမိူင်းဢမေႊရိၵၼ်ႊ ၸွမ်ၸိုင်ႈ ၻူဝ်ႊၼေႃႊ ထရမ်ႉဝႃႈ ႁႂ်ႈလူတ်းပၼ်ၶွၼ်ႇၵႃႉၶၢႆၵုၼ်ႇ တီႈမိူင်းမၢၼ်ႈ တႃႇ 10 ဝၢၵ်ႈ (%) ဢမ်ႇၼၼ် 20 ဝၢၵ်ႈ (%) သေ ၾၢႆႇမိူင်းႁူမ်ႈတုမ် (မိူင်းမၢၼ်ႈ) မီးၵၢင်ၸႂ်ၶႂ်ႈသူင်ႇတူဝ်တႅၼ်း ၵႂႃႇငူပ်ႉငီႉလွင်ႈၶွၼ်ႇၼႆႉ ထိုင်တီႈမိူင်းဢမေႊရိၵၼ်ႊ ၼႆယဝ်ႉ။

လွင်ႈလူင်ပွင်ၸိုင်ႈမိူင်းဢမေႊရိၵၼ်ႊ ပၼ်တၢမ်ႇဢိုတ်းႁပ်း ၼႂ်းၶၵ်ႉၵၢၼ်ပၢႆးမၢၵ်ႈမီးမိူင်းမၢၼ်ႈၼႆႉၵေႃႈ တုမ်ႉတိူဝ်ႉပႃး ၼႂ်းၶၵ်ႉၵၢၼ်ၵႃႉၶၢႆ တင်းသွင်မိူင်းလႄႈ ၶႂ်ႈႁႂ်ႈၾၢႆႇလူင်ပွင်ၸိုင်ႈ မိူင်းဢမေႊရိၵၼ်ႊ လူတ်းယွၼ်ႇပၼ်တူတ်ႈတၢမ်ႇၼႆႉၶိုၼ်း ဝႃႈၼႆ။

လႆႈႁူႉဝႃႈ ၾၢႆႇၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ၶႂ်ႈငူပ်ႉငီႉၵၼ်တင်း လူင်ပွင်ၸိုင်ႈမိူင်းဢမေႊရိၵၼ်ႊ ၶႂ်ႈႁႂ်ႈထရမ်ႉ လူတ်းပၼ်ၵႃႈၶၼ်ၶွၼ်ႇၶူဝ်းၵုၼ်ႇ ဢၼ်မိူင်းမၢၼ်ႈတေတေႃႉသူင်ႇၶဝ်ႈၵႂႃႇၼၼ်ႉ တႃႇ 10 % ထိုင် 20 % သေ ၶူဝ်းၵုၼ်ႇဢၼ်တေလုၵ်ႉတၢင်း မိူင်းဢမေႊရိၵၼ်ႊၶဝ်ႈမႃးၼႂ်းမိူင်းမၢၼ်ႈၼႆႉ ၾၢႆႇမိၼ်းဢွင်ႇလၢႆႇ တေလူတ်းပၼ်ထိုင်ၸၼ်ႉ ယႃႇႁႂ်ႈလႆႈသႂၢင်းၶွၼ်ႇသေ သင်ၵဵပ်းၵေႃႈ တေၵဵပ်းၶွၼ်ႇတႃႇ 10 % ၵူၺ်း ၼႆယဝ်ႉ။

ၸွမ်ၸိုင်ႈ မိူင်းဢမေႊရိၵၼ်ႊၼႆႉ သူင်ႇလိၵ်ႈပွင်ႇလႅင်းမႃးထိုင်မိူင်းမၢၼ်ႈ မိူဝ်ႈဝၼ်းတီႈ 07/07/2025 ၼၼ်ႉဝႃႈ တေတိူဝ်းၽိူမ်ႉၵႃႈၶွၼ်ႇ ၼႂ်းၶၵ်ႉၵၢၼ်ၵႃႉၶၢႆတေႃႇမိူင်းမၢၼ်ႈ တႃႇ 40 ဝၢၵ်ႈ (%)။ ၾၢႆႇလူင်ပွင်ၸိုင်ႈမိူင်းဢမေႊရိၵၼ်ႊ တေတႄႇၽိူမ်ႉၵဵပ်းၶွၼ်ႇၵႂႃႇ ၼႂ်းဝၼ်းတီႈ 01/08/2025 တေမႃးၼႆႉ ဝႃႈၼႆ။

ယၢမ်းလဵဝ် ၾၢႆႇမိၼ်းဢွင်ႇလၢႆႇ သိုၵ်းမၢၼ်ႈယိုတ်းမိူင်း ဢဝ်တိုဝ်ႉတၢင်း ၼႂ်းၶၵ်ႉၵၢၼ်ၶွၼ်ႇၼႆႉသေ ၶတ်းၸႂ်သၢင်ႈ ႁႂ်ႈမီးလွင်ႈၸမ်ၸႂ်ၵၼ်တင်း လူင်ပွင်ၸိုင်ႈမိူင်းဢမေႊရိၵၼ်ႊယူႇ ၼႆယဝ်ႉ။

တႅမ်ႈ – ၽူၺ်းၼုမ်ႇ