မိူဝ်ႈၼႆႉ ဝၼ်းတီႈ 11/07/2025 ယၢမ်းၵၢင်ၼႂ် 8 မူင်းၶိုင်ႈ ၽူႈတႅၼ်းသၽႃးၵူၼ်းမိူင်း ပႃႇတီႇသၢင်ႇသီႈ USDP ၺႃးၸုမ်းဢမ်ႇႁူႉၾၢႆႇ ယိုဝ်းတၢႆထင်တီႈ ၽွင်းမၼ်းၸၢႆးၵႂႃႇသူၼ် ၾၢႆႇႁွင်ႇဝဵင်းမွၵ်ႇမႆႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။

ၵေႃႉၺႃးယိုဝ်းတၢႆၼႆႉ ၸိုဝ်ႈႁွင်ႉ လုင်းၸၢႆးငဝ်းသႅင်ႁိူင်း ဢႃယုမွၵ်ႈ 62 ပီ ပဵၼ်ႁူဝ်ပဝ်ႈ ပႃႇတီႇသၢင်ႇသီႈ ၼႂ်းၸႄႈဝဵင်းမွၵ်ႇမႆႇ ။ မၼ်းၸၢႆး ၶဝ်ႈလိူၵ်ႈတင်ႈ တီႈယူႇ ၽူႈတႅၼ်းသၽႃးၵူၼ်းမိူင်းမႃး သွင်ၸုပ်ႈ (ပၢၼ်) ၼႆ – ၵူၼ်းပိုၼ်ႉတီႈ ဝဵင်းမွၵ်ႇမႆႇ လၢတ်ႈၼႄၼင်ႇၼႆ။

“ၼႂ်ၼႆႉ လႆႈငိၼ်းၶၢဝ်ႇမၼ်းဝႃႈ တၢႆယဝ်ႉၼႆဢိူဝ်ႈ။ ၺႃးယိုဝ်းတၢႆၼႂ်းသူၼ်ငႃးမၼ်းၼႆ။ သူၼ်မၼ်းၼႆႉ ၵႆၵၼ်တင်းဝဵင်းမွၵ်ႇမႆႇ မွၵ်ႈ 2 လၵ်းၼႆႉ။ ႁိူၼ်းၶဝ်တႄႉ ယူႇၼႂ်းဝဵင်း။ မၼ်း ၵႆႉၵႂႃႇသူၼ်မၼ်းၵူႈၼႂ်ယဝ်ႉ။ ပဵၼ်ၸုမ်းလႂ်ယိုဝ်းၵႂႃႇတႄႉၵေႃႈ ဢမ်ႇႁူႉ”။  

ၼႂ်းပိုၼ်ႉတီႈၸႄႈဝဵင်းမွၵ်ႇမႆႇၼႆႉ မီးဝႆႉသိုၵ်းမၢၼ်ႈလႄႈ ၸုမ်းပျီႇတူႉၸိတ်ႉ ဢိၵ်ႇတင်း သိုၵ်းတႆး RCSS ၊ သိုၵ်းပဢူဝ်း PNLO ၸိူဝ်းၼႆႉ တူင်ႉၼိုင်ၵႂႃႇမႃးယူႇဝႆႉ ၼႆယဝ်ႉ။

ဢိင်ၼိူဝ် လွင်ႈၼႆႉ တီႈ Facebook Page ၶွင်ပႃႇတီႇသၢင်ႇသီႈ USDP တူၼ်ႈတီးၵေႃႈ ပိုၼ်ၽၢဝ်ႇဢွၵ်ႇဝႆႉ လွင်ႈလုင်းၸၢႆးငဝ်းသႅင်ႁိူင်း ၺႃးယိုဝ်းတၢႆ ၽွင်းၵႂႃႇႁဵတ်းၵၢၼ် တီႈၼႂ်းသူၼ်မၼ်းၸၢႆး ဝႃႈၼႆ။

တွၼ်ႈတႃႇ တေလႆႈၶၢဝ်ႇႁူဝ်ယွႆႈတႅတ်ႈတေႃးလႄႈ လွင်ႈတၢင်းဢၼ်ၽူႈတႅၼ်း ၺႃးယိုဝ်းတၢႆ ၼၼ်ႉ ၸုမ်းၶၢဝ်ႇၽူႈတွႆႇႁွၵ်ႈ တိုၵ်ႉၶတ်းၸႂ်သိုပ်ႇလမ်းၶၢဝ်ႇဝႆႉယူႇလႄႈ တေသိုပ်ႇမႃးႁၢႆးငၢၼ်း ၼႄထႅင်ႈယူႇ။

တႅမ်ႈ – ၽူၺ်းၼုမ်ႇ