တႄႇႁူဝ်လိူၼ်ၵျူႊလၢႆႊ ပီ 2025 ၼၼ်ႉမႃး တေႃႇထိုင်ဝၼ်းတီႈ 11 ၼႆႉ ယွၼ်ႉၾူၼ်တူၵ်းထပ်းၵၼ်လၢႆဝၼ်းသေ ၾင်ႇမိူင်းၶႄႇ ပိုတ်ႇၾၢႆၼမ်ႉမၢဝ်းလႄႈ ႁဵတ်းႁႂ်ႈၼမ်ႉလုပ်ႇၼွင်းထူမ်ႈ သူၼ်ႁႆႈၼႃးၵူၼ်းထုင်ႉမၢဝ်း ၼႂ်းၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ မီးလွင်ႈလူႉသုမ်းၼပ်ႉႁူဝ်ႁဵင်ဢေႊၶိူဝ်ႊ။

ၸဝ်ႈၼႃး ၼႂ်းၸႄႈဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ -“ဢၼ်ၼမ်ႉထူမ်ႈသေ ယိုင်ႈၶိုၼ်ႈမႃးၼႆႉ မီး 4-5 ဝၼ်းယဝ်ႉ။ ၼမ်ႉၼႆႉ လႆႈဝႃႈယိုင်ႈၶိုၼ်ႈမႃးၼိုင်ႈဝၼ်းၼိုင်ႈဢိတ်း ယိုင်ႈၶိုၼ်ႈမႃးတေႃႇပေႃးထိုင်ၸွမ်း ဝၢၼ်ႈၸိူဝ်းၼႆႉ။ ၼမ်ႉၼႆႉ ၶိုၼ်ႈၽႂ်းႁႅင်းၽႅဝ်လႄႈ ၸဝ်ႈၼႃး မၢင်ၸိူဝ်းယင်းပႆႇလႆႈပၢတ်ႇၶဝ်ႈယဝ်ႉမူတ်း။ ၾင်ႇမိူင်းၶႄႇၼၼ်ႉသမ်ႉ ပေႃးၼမ်ႉ ၼမ်မႃး ၶဝ်သမ်ႉပိုတ်ႇၾၢႆ ပေႃးၾူၼ်ဢမ်ႇတူၵ်းၼမ်ႉဢမ်ႇၼမ်သမ်ႉ ၶဝ်ၵဵပ်းၼမ်ႉဝႆႉၸိူင်ႉၼၼ်ဢိူဝ်ႈ”- ဝႃႈၼႆ။

တူင်ႈၼႃး ဢၼ်ၺႃးၼမ်ႉထူမ်ႈၼမ်သမ်ႉ ၵမ်ႈၼမ် ပဵၼ်ၸွမ်းသၢပ်ႇၼမ်ႉမၢဝ်း ပေႃးၼပ်ႉတူၺ်း ပႃးသူၼ်သေ တေမီးမွၵ်ႈ 4-5 ႁဵင်ဢေႊၶိူဝ်ႊၼႆႉ။ ၼမ်ႉၼႆႉ လုပ်ႇၼွင်းထူမ်ႈမႃး တေမီးမွၵ်ႈ 5 ဝၼ်းၼႆႉယဝ်ႉ။ ယၢမ်းလဵဝ်သမ်ႉ ၾူၼ်တိုၵ်ႉတူၵ်းယူႇလႄႈ ၼမ်ႉၼႆႉ တေၸၢင်ႈယိုင်ႈၶိုၼ်ႈထႅင်ႈယူႇ။ သင်ၼမ်ႉဢမ်ႇ ယွမ်းလူင်းၸိုင် တေၸၢင်ႈႁဵတ်းႁႂ်ႈတူၼ်ႈၶဝ်ႈ၊ ၽၵ်းၶဵဝ် ၸိူဝ်းၼႆႉ ၼဝ်ႈလူႉသုမ်းၼမ် ဝႃႈၼႆ။

“ႁဝ်းၶႃႈ ၸဝ်ႈၼႃးၼႆႉ မီးလွင်ႈလူႉသုမ်းၼမ်ဢေႃႈ မိူဝ်ႈလဵဝ်ၼႆႉ ႁူင်းၶဝ်ႈဢၼ်သုၵ်းယဝ်ႉသေ ပႆႇလႆႈပၢတ်ႇၵေႃႈမီး။ ဢၼ်တိုၵ်ႉမႃးသွမ်ႈယဝ်ႉသေ တူၼ်ႈမၼ်းၼဝ်ႈပႃးၵႂႃႇၸွမ်းၼမ်ႉၵေႃႈမီး။ ၼမ်ႉထူမ်ႈၼႆႉ မီးလၢႆၶိုၼ်းယဝ်ႉ။ ၶူဝ်းသူၼ်ၽၵ်းၶဵဝ် ၸိူဝ်းၼႆႉၵေႃႈ ဢမ်ႇမီးသင်ယဝ်ႉ ပႃးၵႂႃႇၸွမ်းၼမ်ႉမူတ်းယဝ်ႉ။ ၼႃးၶႃႈၵေႃႈပႃးၵႂႃႇ 2 ဢေႊၶိူဝ်ႊဢေႃႈ။ တုၵ်ႉၶတႄႉ ၶႃႈ”- ၸဝ်ႈၼႃး ဝဵင်းၼမ်ႉၶမ်း သိုပ်ႇလၢတ်ႈၼင်ႇၼႆ။

ယွၼ်ႉၼမ်ႉမၢဝ်းလုပ်ႇၼွင်းထူမ်ႈၼႆႉသေ ပေႃးၼပ်ႉတူၺ်းလွင်ႈလူႉသုမ်းၸိုင် 1 ဢေႊၶိူဝ်ႊလၢႆ ဢမ်ႇယွမ်း 10 သႅၼ်ပျႃး ယွၼ်ႉၼၼ်လႄႈ ၸဝ်ႈသူၼ်ႁႆႈၼႃး ၵမ်ႈၽွင်ႈ ယင်းမႆႈၸႂ် ၵူဝ်ဢမ်ႇမီးၶဝ်ႈတႃႇၵိၼ်တႃႇၶၢႆ တႃႇပီၼႃႈ ၼႆယဝ်ႉ။

ၵႃႈတိုၼ်းလၢင်း တႃႇၽုၵ်ႇသွမ်ႈၼႃးၼႆႉ ဢမ်ႇငၢႆႈ မိူၼ်ၼင်ႇ – ၸဵမ်ဢဝ်ၵၢၼ်ထႆ ၊ ၽိူဝ် ၊ ၵႃႈၸိူဝ်ႉၽၼ်း၊ ဝၢၼ်ႇၵႃႈ၊ ထူၺ်ႈၵႃႈ ၊ ၽုၵ်ႈသွမ်ႈ တေႃႇပေႃးလႆႈၶဝ်ႈပိူၵ်ႇမႃးၼႆႉ တေသဵင်ႈတိုၼ်းလၢင်းယူႇ မွၵ်ႈ 10 သႅၼ်ပျႃး တႃႇ 1 ဢေႊၶိူဝ်ႊ ၼႆယဝ်ႉ။

လိူဝ်ၼၼ်ႉ ၵူၼ်းမၢၼ်ႈၵွင်းၼွင်၊ မၢၼ်ႈၵုၼ်ၵႅင်း၊ မၢၼ်ႈသွၼ်း ၸိူဝ်းၼႆႉသမ်ႉ ၽုၵ်ႇသူၼ်ၽၵ်းၵမ်ႈၼမ်လႄႈ ၼၼ်ႉၵေႃႈ မီးလွင်ႈလူႉသုမ်းၼမ်မိူၼ်ၵၼ်။

“ပီၼႃႈမႃးတႄႉ ဢၼ်ႁဝ်းလူဝ်ႇၽုၵ်ႇလူဝ်ႇသွမ်ႈတႄႉ မၼ်းတေယၢပ်ႇၸႂ်ႁႅင်းၵျႃႉ။ ယွၼ်ႉဝႃႈ ၵႃႈႁဝ်းၵေႃႈ ၼဝ်ႈ၊ တူၼ်ႈၶဝ်ႈႁဝ်းၵေႃႈ ၼဝ်ႈယဝ်ႉလႄႈ ၸဝ်ႈၼႃး ၸိူဝ်းၶဝ်ႈၶၢမ်ဝႆႉ ၼႂ်းၼမ်ႉ ပႆႇလႆႈပၢတ်ႇၸိူဝ်းၼၼ်ႉတႄႉ တေႁဵတ်းႁိုဝ်ၵေႃႈ ဢမ်ႇႁူႉယဝ်ႉ။ ယွၼ်ႉဝႃႈ ႁဝ်းၶဝ်ၼႆႉ ပဵၼ်ၵူၼ်းႁဵတ်းသူၼ်ႁႆႈၼႃး ႁႃၵိၼ်ၵူၺ်းၼႃႇၼေႃ”- ၸဝ်ႈၼႃး ဝဵင်ၼမ်ႉၶမ်း သိုပ်ႇလၢတ်ႈၼႄၼင်ႇၼႆထႅင်ႈ။

ၼွၵ်ႈလိူဝ် ၼမ်ႉထူမ်ႈသူၼ်ႁႆႈၼႃးၵူၼ်းမိူင်းယဝ်ႉ မိူၼ်ၼင်ႇ – ၵူၼ်းမၢၼ်ႈၵွင်းၼွင်၊ ႁူဝ်ႁိၼ်၊ ၵုၼ်ၵႅင်း၊ မၢၼ်ႈသွၼ်း၊ ၼွင်ၶမ်း၊ ၼွင်မႃႉတႃႊ ဢၼ်မီးၼႂ်းၸႄႈဝဵင်းၼမ်ႉၶမ်း ၸိူဝ်းၼၼ်ႉၵေႃႈ ထူပ်းတၢင်းယၢပ်ႇ ဢမ်ႇၸၢင်ႈၵႂႃႇမႃး။ ယဝ်ႉၵေႃႈ သူၼ်ႁႆႈၼႃးလႄႈ မူႇဝၢၼ်ႈ ဢၼ်မီးႁိမ်းၾင်ႇၼမ်ႉမၢဝ်း ၸွမ်းလႅၼ်လိၼ် မိူင်းတႆး – မိူင်းၶႄႇ – မိူင်းၶၢင် ၸိူဝ်းၼၼ်ႉ ၵေႃႈ ၼမ်ႉလုပ်ႇထူမ်ႈႁႅင်းဝႆႉမိူၼ်ၵၼ်။

ပူၼ်ႉမႃး မိူဝ်ႈပီ 2016 ၼၼ်ႉၵေႃႈ ယွၼ်ႉၾင်ႇမိူင်းၶႄႇ ပိုတ်ႇၾၢႆၼမ်ႉမၢဝ်းလႄႈ ၼမ်ႉလုပ်ႇၼွင်းထူမ်ႈ မိူၼ်ၼႆႉယဝ်ႉပွၵ်ႈၼိုင်း ၽွင်းၼၼ်ႉၵေႃႈ ၵူၼ်းမိူင်းထူပ်းတၢင်းယၢပ်ႇ တႃႇ ၵၢၼ်ၽုၵ်ႇသွမ်းၵူၺ်းဢမ်ႇၵႃး လွင်ႈၵႂႃႇမႃးၵႃႉၶၢႆ ၸိူဝ်းၼႆႉၵေႃႈ တုမ်ႉတိူဝ်ႉတင်းၼမ် ၼႆယဝ်ႉ။