မိူဝ်ႈဝၼ်းတီႈ 08/07/2025 ၼႆႉ ၸုမ်းသိုၵ်းဢူၺ်းလီသၢမ်ၸုမ်း (MNDAA ၊ AA ၊ TNLA) ႁူမ်ႈၵၼ်ပိုတ်ႇႁူင်း ယႃလူင်ၵူၼ်းမိူင်း ၼႂ်းၼႃႈတီႈၸုမ်းသိုၵ်းၶဝ်ၵုမ်းၵမ်ဝႆႉ ဢၼ်တႄႇသၢင်ႈမႃး ၼႂ်းလိူၼ်မေႊ တီႈ 105 လၵ်း ႁိမ်းသၢပ်ႇဝဵင်းမူႇၸေႊ ၸိုင်ႈတႆးပွတ်းႁွင်ႇ။

ဝၢႆးလင် ၽႅၼ်ၵၢၼ်ယၼ်ႇသိုၵ်း 1027 ယဝ်ႉသေ ၸုမ်းဢူၺ်းလီသၢမ်ၸုမ်း ႁူမ်ႈၵၼ်ၵုမ်းၵမ်ဝႆႉ တီႈသုၼ်ၵၢၼ်ၵႃႉၶၢႆ 105 လၵ်း မိူဝ်ႈပီ 2023 လိူၼ်တီႊသႅမ်ႊပိူဝ်ႊ။

ၼႂ်းထုင်ႉသုၼ်ၵၢၼ်ၵႃႉၶၢႆ 105 လၵ်းၼႆႉ ၸဵမ်မိူဝ်ႈပၢၼ်သိုၵ်းမၢၼ်ႈ ယိုတ်းမိူင်းၵုမ်းၵမ် ဢမ်ႇယၢမ်ႈမီး ႁူင်းယႃလူင်ၵူၼ်းမိူင်းမႃး။ ႁူင်းယႃလူင်ၵူၼ်းမိူင်း ဢၼ်ပိုတ်ႇပွၵ်ႈၵမ်းၼႆႉ လႆႈဝႃႈ ပဵၼ်ဢွင်ႈတီႈဢၼ် ၵူၼ်းမိူင်းၼႂ်းပိုၼ်ႉတီႈထုင်ႉသုၼ်ၵၢၼ်ၵႃႉၶၢႆၼၼ်ႉ တေလႆႈပိုင်ႈဢိင်ၵႂႃႇ ၼႂ်းၶၵ်ႉတွၼ်ႈၵၢၼ်ပၢႆးယူႇလီၼႆ ၵူၼ်းပိုၼ်ႉတီႈဝဵင်းမူႇၸေႊ လၢတ်ႈၼႄၼင်ႇ ၼႆ။

“မိူဝ်ႈဢွၼ်တၢင်း တီႈ 105 လၵ်းၼႆႉ မီးႁွင်ႈယႃ (ဆေးခန်း) ၵူၺ်း။ ၸုမ်းသိုၵ်းၸိူဝ်းၼႆႉ မႃးသၢင်ႈႁူင်းယႃၼႆႉ ႁိုင်ယူႇမွၵ်ႈ 3 လိူၼ်ၼႆႉ။ ဢွၼ်တၢင်းတႄႉ ပေႃးၶႂ်ႈယႃတူဝ် ႁႂ်ႈပေႃးၶႅမ်ႉၼႆ လႆႈၵႂႃႇယႃတၢင်းမူႇၸေႊ၊ ၼမ်ႉၶမ်းၸိူဝ်းၼႆႉ”။

ယၢမ်းလဵဝ် တီႈႁူင်းယႃလူင်ၵူၼ်းမိူင်း ဢၼ်ၸုမ်းသိုၵ်းဢူၺ်းလီသၢမ်ၸုမ်း ႁူမ်ႈၵၼ်ပိုတ်ႇဝႆႉ တီႈသုၼ်ၵၢၼ်ၵႃႉၶၢႆ 105 လၵ်းၼႆႉ မီးမေႃယႃ ၸိူဝ်းဢွၵ်ႇၼႂ်းႁွင်ႈၵၢၼ်ၾၢႆႇယူႇလီ တႂ်ႈသိုၵ်းမၢၼ်ႈၵုမ်းၵမ်ၼၼ်ႉသေ ႁဵတ်း CDM ဝႆႉၼၼ်ႉ ၵႂႃႇၶဝ်ႈႁၢပ်ႇၵၢၼ် ပႂ်ႉယူတ်းယႃပၼ်ၵူၼ်းမိူင်းယူႇ ၼႆယဝ်ႉ။

တႅမ်ႈ – ၽူၺ်းၼုမ်ႇ