ဝၼ်းတီႈ 08/07/2025 ၼႆႉ သိုၵ်းမၢၼ်ႈ ပိုၼ်ၽၢဝ်ႇဢွၵ်ႇဝႃႈ လႆႈႁပ်ႉလိၵ်ႈပွင်ႇလႅင်း ဢၼ်ၸွမ်ၸိုင်ႈမိူင်း ဢမေႊရိၵၼ်ႊ ၻူဝ်ႊၼေႃႊ ထရမ်ႉ သူင်ႇယိုၼ်ႈမႃး လွင်ႈတႃႇၵဵပ်းၶွၼ်ႇၽိူမ်ႉၼၼ်ႉယဝ်ႉသေ တေႁၢင်ႈႁႅၼ်းဢုပ်ႇဢူဝ်းငူပ်ႉငီႉၵၼ်ၵႂႃႇ ၼႆယဝ်ႉ။
ၸွမ်သိုၵ်းၸေႃႇမိၼ်းထုၼ်း ၽူႈၶၢၼ်ပၢၵ်ႇ တပ်ႉသိုၵ်းမၢၼ်ႈ မွၵ်ႇလၢတ်ႈဝႃႈ -“ႁဝ်းၶႃႈ လႆႈႁပ်ႉလိၵ်ႈ ဢၼ်ပွင်ႇလႅင်းမႃးၼၼ်ႉလီငၢမ်းယဝ်ႉ။ ၵဵဝ်ႇၵပ်းလူၺ်ႈလိၵ်ႈၼႆႉသေ တွၼ်ႈတႃႇမိူင်းမၢၼ်ႈၼႆႉ ပဵၼ်လွင်ႈလီသုတ်း ၶဝ်ႈပႃးၼႂ်းၶၵ်ႉၵၢၼ်တႃႇတေလႆႈငူပ်ႉငီႉၵၼ်ၵႂႃႇ မၢႆၼိုင်ႈယဝ်ႉ။ တေၶိုၼ်းႁၢင်ႈႁႅၼ်းၶေႃႈမုလ်းသေ ပွင်ႇလႅင်းပၼ်ၵႂႃႇ။ တွၼ်ႈမၢႆသွင်တႄႉ မုင်ႈမွင်းဝႃႈ တေလႆႈၶေႃႈတွပ်ႇလီ တႃႇတင်းသွင်ၸိုင်ႈမိူင်းယူႇ”- ဝႃႈၼႆ။
ၼႂ်းလိၵ်ႈပွင်ႇလႅင်း ဢၼ်လူင်ပွင်ၸိုင်ႈမိူင်းဢမေႊရိၵၼ်ႊ သူင်ႇယိုၼ်ႈမႃးၼၼ်ႉ ပႃးဝႆႉဝႃႈ သင်မိူင်းႁူမ်ႈတုမ် (မိူင်းမၢၼ်ႈ) တေသူင်ႇၶူဝ်းၵုၼ်ႇ ၶဝ်ႈၵႂႃႇၼႂ်းမိူင်းဢမေႊရိၵၼ်ႊၸိုင် ၾၢႆႇလူင်ပွင်ၸိုင်ႈ တေၵဵပ်းၶွၼ်ႇၽိူမ်ႉၵႂႃႇ တႃႇ 40 % သေ မုင်ႈမွင်းဝႃႈ မိူင်းမၢၼ်ႈတေႁူမ်ႈမိုဝ်းၸွမ်းယူႇ။ လိူဝ်ၼၼ်ႉ ၶႂ်ႈႁႂ်ႈမိူင်းႁူမ်ႈတုမ် ၸွႆႈတူၺ်းထိုင်လူတ်းယွၼ်ႇပၼ် ၵႃႈၶၼ် ၶွၼ်ႇၶူဝ်းၵုၼ်ႇ ဢၼ်တေလုၵ်ႉမိူင်းဢမေႊရိၵၼ်ႊ သူင်ႇၶဝ်ႈၸူးမိူင်းမၢၼ်ႈၼၼ်ႉယူႇ ၼႆယဝ်ႉ။
လူင်ပွင်ၸိုင်ႈမိူင်းဢမေႊရိၵၼ်ႊ ၸွမ်ၸိုင်ႈထရမ်ႉၼႆႉ ပိုၼ်ၽၢဝ်ႇဢွၵ်ႇ တႃႇၽိူမ်ႉၵဵပ်းၵႃႈၶွၼ်ႇၶူဝ်းၵုၼ်ႇ ၼႂ်းလုမ်ႈၾႃႉ ၼွၵ်ႈလိူဝ် မိူင်းမၢၼ်ႈယဝ်ႉ မိူင်းလၢဝ်း၊ မိူင်းထႆး၊ မိူင်းၵမ်ႇပူးၶျႃး၊ မိူင်းမလေးသျႃး၊ မိူင်းဢိၼ်ႊတူဝ်ႊၼီႊသျႃး ၸဵမ်ၸိူဝ်းၼႆႉ။ တင်းမူတ်း ၸိုင်ႈမိူင်း ၸိူဝ်းၺႃးဢမေႊရိၵၼ်ႊ ယွၼ်းၵဵပ်းၵႃႈ ၶွၼ်ႇၶူဝ်းၵုၼ်ႇၼမ်ၶိုၼ်ႈၼႆႉ မီးၵႂႃႇ 14 ၸိုင်ႈမိူင်း ၼႆယဝ်ႉ။
မိူဝ်ႈပီၵၢၼ်ငိုၼ်း 2022-2023 ၼႆႉ မိူင်းမၢၼ်ႈ သူင်ႇၶူဝ်းၵုၼ်ႇၵႃႉၶၢႆ ၶဝ်ႈၵႂႃႇၼႂ်းမိူင်းဢမေႊရိၵၼ်ႊ တႃႇငိုၼ်းတေႃႊလႃႊ 700 လၢၼ်ႉပၢႆ။ ပီၵၢၼ်ငိုၼ်း 2024-2025 ၼႆႉ မီးၵႂႃႇတႃႇငိုၼ်းတေႃႊလႃႊ 588 လၢၼ်ႉ ၼႆယဝ်ႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ