ၶူဝ်းၵုၼ်ႇဢၼ် လုၵ်ႉတၢင်း ဝဵင်းၵဵင်းတုင် ၸိုင်ႈတႆးပွတ်းဢွၵ်ႇ ဢၼ်တေတေႃႉမႃး တီႈ ဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ သိုၵ်းမၢၼ်ႈပႂ်ႉတီႉၺွပ်း တီႈၵဵတ်ႉလၢၼ်ႇ ဝဵင်းမိူင်းပွၼ်ႇ ႁဵတ်းႁႂ်ႈ ၸဝ်ႈၵႃးလႄႈၵူၼ်းၵႃႉ ယၢပ်ႇၽိုတ်ႇ ၵိၼ်းၸႂ်ဝႃႈၼႆ ။
တႄႇႁူဝ်လိူၼ်ၵျႃၼ်ႊပူၼ်ႉမႃး ၵႃးတၢင်ႇၵူၼ်းဢၼ်လုၵ်ႉတၢင်း ၵဵင်းတုင် ၶိုၼ်ႈတူၼ်ႈတီး၊ ၵူၼ်းဢၼ်လုၵ်ႉတၢင်းမိူင်းမၢၼ်ႈတူင်ႈပဵင်းၶိုၼ်ႈမႃးမိူင်းတႆးသေဢၢၼ်းတေၵႂႃႇမိူင်းတႆးပွတ်းဢွၵ်ႇၸိူဝ်းၼႆႉ သိုၵ်းမၢၼ်ႈၵူတ်ႇထတ်းတီႈၵဵတ်ႉလၢၼ်ႇ ႁၢဝ်ႈႁႅင်း ။
ၸဝ်ႈၵႃးၵႂႃႇမႃး လၢတ်ႈၽူႈတွႆႇႁွၵ်ႈဝႃႈ -“တလဵဝ် ၶူဝ်းၵုၼ်ႇတင်းတႃႈၶီႈလဵၵ်း – ၵဵင်းတုင် ၼႆႉတႄႉ ဢမ်ႇၸၢင်ႈသူင်ႇ တူၼ်ႈတီး – တႃႈၵုင်ႈ ယဝ်ႉ ၊ ၸွမ်းတၢင်း ၵဵတ်ႉလၢၼ်ႇ ၵူတ်ႇထတ်းႁႅင်းၼႃႇ ၊ တီႈၵဵတ်ႉၶဝ်ႈဢွၵ်ႇ မိူင်းပွၼ်ၶႅၼ်းၵူတ်ႇထတ်းႁႅင်း ၊ ပေႃးပဵၼ်ၵႃးတၢင်ႇၵူၼ်း ဢမ်ႇပၼ်တၢင်ႇၵုၼ်ႇ ၊ တေလႆႈတၢင်ႇၵူၼ်းၵူၺ်းၼႆဢေႃႈ ၊ တီႈၸွမ်းၵႃးၵဵတ်ႉၸိူဝ်းၼႆႉၵေႃႈ ပိူၼ်ႈဢမ်ႇႁပ်ႉသူင်ႇ ၶူဝ်းယဝ်ႉ ”- ဝႃႈၼႆ ။
သိုၵ်းမၢၼ်ႈဢမ်ႇပၼ်ၸဝ်ႈၵႃးတၢင်ႇပႃးၶူဝ်းၵုၼ်ႇလႄႈ ၵႃးလႅင်း ရူတ်ႉသၢႆတၢင်ႇၵူၼ်း ၸိူဝ်းၼႆႉ ဢမ်ႇမီးငိုၼ်းလိူဝ်။ ၾၢႆႇၼိုင်ႈသမ်ႉ လႆႈပၼ်တီႈၵဵတ်ႉ/လၢၼ်ႇလူင်မႃးၸွမ်းသုတ်းသၢႆတၢင်းလႄႈ ပႆႇဝႃႈငိုၼ်းတေလိူဝ် မၢင်ၵမ်း ၵႃႈၼမ်ႉမၼ်းသမ်ႉပေႃးဢမ်ႇၶႂ်ႈၵိုတ်းယဝ်ႉလႄႈ ပဵၼ်ဢၼ်ယၢပ်ႇၽိုတ်ႇၼႆ ၸဝ်ႈၵႃးၵေႃႉၼိုင်ႈလၢတ်ႈၼင်ႇၼႆ။
ၼၢင်းယိင်းၵူၼ်းဢွၵ်ႇၶၢဝ်းတၢင်းၵႂႃႇမႃးလၢတ်ႈၽူႈတွႆႇႁွၵ်ႈဝႃႈ-“ ၸဝ်ႈၵႃးၶဝ် ဢမ်ႇလႆႈတၢင်ႇၵုၼ်ႇၵႂႃႇမႃးလႄႈ ပေႃးပဵၼ်ရူတ်ႉၵႃးသႅၼ်းၵၢင် သႅၼ်းလဵၵ်ႉၼႆ ဢမ်ႇၵႂႃႇမႃးၼမ်ယဝ်ႉ ၊ တေမီးၵႃးလူင် Express ၸိူဝ်းၼႆႉၵူၺ်းယဝ်ႉ ၊ ၵႃႈၵႃးၵေႃႈ ၶိုၼ်ႈထႅင်ႈ 3-4 မိုၼ်ႇ မိူဝ်ႈဢွၼ်တၢင်း 8 မိုၼ်ႇၼႆ တလဵဝ် သႅၼ်သွင် ၊ ၸဝ်ႈၵႃး ဢမ်ႇၸၢင်ႈႁႃႁဵတ်းၵိၼ်သင်ယဝ်ႉ”- ဝႃႈၼႆ ။
ယၢမ်းလဵဝ်တီႈၵဵတ်ႉလၢၼ်ႇ ဢမ်ႇပၼ်တၢင်ႇၵုၼ်ႇၵႂႃႇမႃးလႄႈ ႁဵတ်းႁႂ်ႈၵုၼ်ႇ ဢမ်ႇႁွတ်ႈၶိုတ်းတၼ်းၶၢဝ်းယၢမ်း ၵူၼ်းၵႃႉ ၵေႃႈယၢပ်ႇၽိုတ်ႇတႃႇႁႃၵိၼ်လဵင်ႉတွင်ႉပႃး ဝႃႈၼႆ ။
မႄႈၵႃႉၶၢႆလၢတ်ႈ ၽူႈတွႆႇႁွၵ်ႈဝႃႈ -“တလဵဝ်ၼႆႉ ၸႅတ်ႈႁႅင်းၼႃႇ ၊ ၵူၼ်းဢွၵ်ႇတၢင်းၸိူဝ်းၼႆႉၵေႃႈ ပေႃးႁွတ်ႈတီႈၵဵတ်ႉၼၼ်ႉ လႆႈလူင်းပႆတၢင်း ၊ ထၢမ်ၸေးထၢမ်ၸွတ်ႇ ပေႃးဢမ်ႇမႅၼ်ႈၵေႃႉမၼ်း လႃႇပႃး ၊ ပေႃးဢမ်ႇပၼ်ငိုၼ်းၼႆႉ တေႃႇတေႃႇၵႃးတေလႆႈဢွၵ်ႇ ၊ ႁႃမဵဝ်းယဝ်ႉမဵဝ်း ၼိူဝ်ၵႃး ၊ ၶဝ်ႁၢမ်ႈၸဝ်ႈၵႃးဢွၼ်ႇ ဢမ်ႇပၼ်တၢင်ႇၵုၼ်ႇလႄႈ ၶူဝ်းၵုၼ်ႇဢၼ်ၵႆႉတၢင်ႇၵေႃႈ ဢမ်ႇၸၢင်ႈတၢင်ႇၵႂႃႇမႃး ၊ ဢွၵ်ႇတၢင်းၵေႃႈ လႆႈၵူဝ် ဢမ်ႇမီးလွင်ႈႁူမ်ႇလူမ်ႈ”- ဝႃႈၼႆ။
ယွၼ်ႉသိုၵ်းမၢၼ်ႈ ဢမ်ႇပၼ်တေႃႉသူင်ႇၶူဝ်းၶွင်လႄႈယၢမ်းလဵဝ်ပေႃးမီး ၵႃးလူင် ၵႂႃႇမႃးၸင်ႇသူင်ႇမႃးလႆႈ လႆႈပႂ်ႉၶၢဝ်းယၢမ်းတင်းႁိုင် ဝႃႈၼႆ ။
တႄႇၼႂ်းလိူၼ်ၵျႃၼ်ႊ ဝၼ်းတီႈ 1 မႃး သိုၵ်းမၢၼ်ႈတီႉၺွပ်း ၶူဝ်းၶွင်ဢမ်ႇသၢင်းၶွၼ်ႇ ဢၼ်လုၵ်ႉတၢင်းလႅၼ်လိၼ် ထႆး- မၢၼ်ႈမႃးသေ လွင်ႈၵူတ်ႇထတ်းၶူဝ်းၵုၼ်ႇၵေႃႈၸင်ႇလၢမ်းၽႄႈၸပ်းၵၼ်ၵႂႃႇတေႃႇထိုင်ဝဵင်းလူင်တူၼ်ႈတီး။ ၶူဝ်းၵုၼ်ႇမိူင်းထႆးၵေႃႈၵႃႈၶၼ်ပုင်ႈၶိုၼ်ႈသုင် ။ ၵူၼ်းပိုၼ်ႉတီႈၵူၺ်းပဵၼ်ဢၼ်ယၢပ်ႇၽိုတ်ႇၵူႈၸိူဝ်ႉၵူႈလွင်ႈ လႆႈႁူႉၼင်ႇၼႆ။
ၶူဝ်းၵိၼ်ၶွင်ယမ်ႉ ဢၼ်တေႃႉမႃးတၢင်းမိူင်းထႆး မိူၼ်ၼင်ႇ ၶဝ်ႈသွႆးငေႃး(မႃးမႃႉ) ၼိုင်ႈထူင်ႇ ဢွၼ်ႇတၢင်း 400 ပျႃးၼၼ်ႉယၢမ်းလဵဝ် 1000 ပျႃး ၊ ယႃႈသၢႆႇၶူၼ်ႁူဝ် ၼိုင်ႈတဝ်ႈဢွၼ်တၢင်း 10000 ပျႃးၼၼ်ႉ ယၢမ်းလဵဝ် 15000 ပျႃး ၊ ၽွင်ၼိူဝ်ႉၵႆႇၼိုင်ႈထူင် ဢွၼ်တၢင်း 300 ပျႃးၼၼ်ႉ ယၢမ်းလဵဝ် ပုင်ႈၶိုၼ်ႈထိုင် 800 ပျႃး – ၵူၼ်းၶၢႆႁၢၼ်ႉလၢတ်ႈ ၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ