သိုၵ်းမၢၼ်ႈ သူင်ႇၶႃႈႁၢပ်ႇထၢမ်းၵၢၼ်သိုၵ်း ၼႂ်းႁွင်ႈၵၢၼ်ႁဵတ်းဢွၵ်ႇၶိူင်ႈၵွင်ႈၵၢင်ႇ ၵပၸ (ကပစ) ၵႂႃႇႁဵၼ်းသွၼ်ဢဝ်လၢႆးႁဵတ်းဢွၵ်ႇလၢၵ်ႈၼၢၵ်ႈၶိူင်ႈၵွင်ႈၵၢင်ႇ တီႈၸၼ်ႉၸွမ် Belarusian State University of Informatics and Radioelectronics (BSUIR) မိူင်းပႄႊလႃႊရူပ်ႊ ၼပ်ႉႁူဝ်သိပ်းၵေႃႉမၼ်းၼႆ ၸုမ်းပၵ်းတႃပႂ်ႉတူၺ်း လွင်ႈတူင်ႉၼိုင် ၸုမ်းသိုၵ်းမၢၼ်ႈ Justice For Myanmar ပိုၼ်ၽၢဝ်ႇဢွၵ်ႇဝႆႉ ၽိုၼ်လိၵ်ႈႁၢႆးငၢၼ်းၼင်ႇၼႆ။

ၼႂ်းၽိုၼ်လိၵ်ႈႁၢႆးငၢၼ်းၼၼ်ႉ ပိူင်းၼႄဝႆႉဝႃႈ ၶႃႈႁၢပ်ႇၵၢၼ်သိုၵ်းမၢၼ်ႈၸိူဝ်းၼႆႉ ၵႂႃႇႁဵၼ်းသွၼ်ဢဝ် လၢႆးႁဵတ်းၶိူင်ႈၵွင်ႈၵၢင်ႇ တင်ႈတႄႇ ပီ 2013 ၼၼ်ႉသေ မိူဝ်ႈပီ 2025 လိူၼ် ၵျုၼ်ႊပူၼ်ႉမႃးၼႆႉ ၶိုၼ်းသိုပ်ႇၵႂႃႇႁဵၼ်းသွၼ်တီႈဝဵင်းလူင်မိင်ႉထႅင်ႈ။ ၵွၼ်ႇၵူၼ်းသိုၵ်းၸိူဝ်းၼၼ်ႉ ပႆႇၵႂႃႇႁွတ်ႈထိုင်ဝဵင်းလူင်မိင်ႉၼၼ်ႉ ၸုမ်းၼႆႉလႆႈၶိုၼ်ႈပၢင်သွၼ် ႁဵတ်းၶိူင်ႈၵွင်ႈၵၢင်ႇယဝ်ႉၵႂႃႇၸုပ်ႈၼိုင်ႈ မိူဝ်ႈပီ 2018 ၼႂ်းလိူၼ်ၼူဝ်ႊဝႅမ်ႊပိူဝ်ႊလႄႈ လိူၼ်တီႊသႅမ်ႊပိူဝ်ႊ ဝႃႈၼႆ။

လုၵ်ႈႁဵၼ်း ဢၼ်ၸုမ်းသိုၵ်းမၢၼ်ႈ ပွႆႇၵႂႃႇႁဵၼ်းသွၼ်ၼႆႉ ပဵၼ်ၵူၼ်းၼုမ်ႇၼႂ်းႁူင်းၵၢၼ် ၾၢႆႇႁဵတ်းဢွၵ်ႇ ၶိူင်ႈၵွင်ႈၵၢင်ႇ မၢႆ 20 တီႈငၽႄး (ငဖဲ) တိူင်းဝဵင်းလိူဝ်ႇ (မၼ်းတလေး)၊ ႁူင်း ၵၢၼ် ၾၢႆႇႁဵတ်းၶိူင်ႈၵွင်ႈၵၢင်ႇ မၢႆ 4 ဢၼ်မီးတီႈၵွင်းတပ်ႉ (တပ်ကုန်း) ဝဵင်းၼေႇပျီႇတေႃႇ၊ ႁူင်းၵၢၼ် ၾၢႆႇႁဵတ်းဢွၵ်ႇၶိူင်ႈၵွင်ႈၵၢင်ႇ မၢႆ 10 ဢၼ်မီးတီႈဝဵင်းမိတ်ႉထီႇလႃႇ (မိတ္ထီလာ) ၸဵမ်ၸိူဝ်းၼႆႉ။

လႆႈႁူႉဝႃႈ ၵူၼ်းၼုမ်ႇသိုၵ်းမၢၼ်ႈ ၸိူဝ်းၵႂႃႇႁဵၼ်းသွၼ်တီႈၸၼ်ႉၸွမ် BSUIR ၼၼ်ႉ လႆႈႁဵၼ်းသွၼ်ဢဝ် လွၵ်းလၢႆးပၢႆးၸၢၵ်ႈ (ဢိၼ်ႊၵျိၼ်ႊၼီႊယိူဝ်ႊ) ၾၢႆႇဢွမ်လူမ်း (ရေဒီယိုအီလက်ထရောနစ်အင်ဂျင်နီယာ) ပိူဝ်ႈတႃႇၸႂ်ႉတိုဝ်းၼႂ်း တပ်ႉလူမ်း (တပ်ႉၵၢင်ႁၢဝ်) ၵူၺ်းဢမ်ႇၵႃႈ ႁဵၼ်းသွၼ်ဢဝ်ပႃး လွၵ်းလၢႆးပၢႆးတိုၵ်းပၢႆး သိုၵ်းၵူႈလွင်ႈလွင်ႈလႄႈ ၵၢၼ်ဝၢင်းၽႅၼ်၊ ၾၢႆႇၸတ်းၽႅၼ်လွၵ်းလၢႆးပၢႆးသိုၵ်းလႄႈ ၵၢၼ်ၵပ်းသိုပ်ႇ ၸဵမ်ၸိူဝ်းၼႆႉ။

လိူဝ်ၼၼ်ႉ ၼႂ်းၽိုၼ်လိၵ်ႈႁၢႆးငၢၼ်းၼၼ်ႉ ယင်းပိူင်းၼႄဝႆႉပႃးထႅင်ႈဝႃႈ မိူင်းပႄႊလႃႊရူပ်ႊၶဝ်သူင်ႇပၼ် ပိူင်ၵၢၼ်လၢႆးၸတ်းၽႅၼ် ၾၢႆႇၵႅတ်ႇၶႄတပ်ႉလူမ်း (တပ်ႉၵၢင်ႁၢဝ်) ၸိူဝ်းၼႆႉသေ ၾၢႆႇသိုၵ်းမၢၼ်ႈၵေႃႈ ၸႂ်ႉတိုဝ်းလွၵ်းလၢႆးၼၼ်ႉ တေႃႇသူႈၶိုၼ်းၸုမ်းသိုၵ်းၸၢဝ်းၶိူဝ်းၼႂ်းမိူင်းသေ ႁၢင်ႈႁႅၼ်းတႃႇယႃႉၵွႆတရူၼ်ႊ သိုၵ်းၸၢဝ်းၶိူဝ်းယူႇ ၼႆယဝ်ႉ။

တႅမ်ႈ – ၽူၺ်းၼုမ်ႇ