ၵူၼ်းၸၢႆးၼုမ်ႇ ဢႃယု 21 ပီ ဝဵင်းဢေးတႃႇယႃႇ ဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း ဢမ်ႇပႆႇပႃးၼႂ်းသဵၼ်ႈမၢႆ ဢမ်ႇမီးလိၵ်ႈသင်တီႈတပ်ႉသိုၵ်းပွင်ႇၶၢဝ်ႇမႃးသေတႃႉ ၵၢင်ႉၵႄႇၼႂ်းပွၵ်ႉယွမ်ႇ  တဵၵ်းၸႂ်ႉၵႂႃႇႁၢပ်ႇၵၢၼ်သိုၵ်း။

ၼႂ်းႁၢင်လိူၼ်ၵျႃၼ်ႊၼႆႉ တီႈၼႂ်းဝဵင်းဢေးတႃႇယႃႇ  ၵၢင်ႉၵႄႇႁွင်ႉၵူၼ်းမိူင်း ၸူၵ်းၶႅပ်းမႄး တႃႇႁၢပ်ႇၵၢၼ်သိုၵ်းတွၼ်ႈတႃႇၸုပ်ႈတီႈ 15 ။  ၵူၼ်းၼႂ်းပွၵ်ႉ (က) ၶဵတ်ႈမၢႆ 8 ၸူၵ်းလႆႈၶႅပ်းမႄး 3 ၵေႃႉ။ ၼႂ်းၼၼ်ႉတႃႇၵေႃႉၼိုင်ႈ ဢမ်ႇၶႂ်ႈၵႂႃႇႁၢပ်ႇၵၢၼ်သိုၵ်းၼႆသေ ဢုပ်ႇၵၼ်တင်း ၵၢင်ႉၵႄႇပွၵ်ႉယွမ်ႇ ။ ၵၢင်ႉၵႄႇယွၼ်းငိုၼ်း 60 သႅၼ်ပျႃး။ ဝၢႆးၼၼ်ႉၵၢင်ႉၵႄႇၵႂႃႇႁႃၵူၼ်းၼႂ်းဝၢၼ်ႈတၢင်ႇၵေႃႉၵႂႃႇတႅၼ်းတၢင် – ၵူၼ်းပိုၼ်ႉတီႈလၢတ်ႈၼင်ႇၼႆ။  

ၸၢႆးၼုမ်ႇဢၼ်ယူႇပွၵ်ႉလဵဝ်ၵၼ်တင်း ၸၢႆးၸၢႆးဢႃယု 21 ပီဢၼ်ၺႃးၵၢင်ႉၵႄႇ မႃးႁွင်ႉၵႂႃႇ ႁဵတ်းသိုၵ်း ၼၼ်ႉ လၢတ်ႈၽူႈတွႆႇႁွၵ်ႈဝႃႈ – “ ၼႂ်းဝၼ်းတီႈ 28 ၼၼ်ႉ ၵၢင်ႉၵႄႇမႃးၼႂ်းပွၵ်ႉသေ မႃးႁွင်ႉဢၢႆႈၸၢႆး ဝႃႈ ဢၢႆႈၸၢႆးပွၵ်ႈၶႅပ်းမႄးတႃႇႁၢပ်ႇၵၢၼ်သိုၵ်း။ ၵွပ်ႈၼႆတေလႆႈၵႂႃႇၾိုၵ်းၵၢၼ်သိုၵ်း ၼႆဝႃႇ။ မီးလႂ်လႃႇၶႅပ်းမႄးတႃႇဢၢႆႈၸၢႆးၼႆ ထၢမ်ၵေႃႈသမ်ႉဢမ်ႇတွပ်ႇလႆႈ ဢမ်ႇၼႄလႆႈ။ ၽိူဝ်ႇဢၢႆႈၸၢႆး ၵႂႃႇလႅၵ်ႈမၢႆၾၢင်မၼ်းတီႈတူၼ်ႈတီး( လႅၵ်ႈမၢႆၾၢင် ဢႃယုတဵမ် 18 ပီ )ၼၼ်ႉ ၸင်ႇႁူႉဝႃႈ ဢၢႆႈၸၢႆးပႆႇပႃးၼႂ်းသဵၼ်ႈၸိုဝ်ႈတႃႇႁၢပ်ႇၵၢၼ်သိုၵ်း။ ႁွႆးဝႃႈ ၺႃးၵၢင်ႉၵႄႇလႅၼ်ဝႃႈပွၵ်ႈၶႅပ်းမႄး ”- ဝႃႈၼႆ။

ၸၢႆးၸၢႆး ၼႆႉ ပီၼႆႉဢႃယု ၸင်ႇတေတဵမ် 21 ပီ။ ဢမ်ႇမီးပေႃႈမႄႈ။ လႆႈယူႇၸွမ်းပီႈၼွင်ႉၸိူဝ်ႉၶိူဝ်းဝႆႉ။   ၼႂ်းဝၼ်းတီႈ 6/7/2025 ၵၢင်ႉၵႄႇလႄႈ သိုၵ်းမၢၼ်ႈ မႃးႁွင်ႉတႃႇသူင်ႇၵႂႃႇၾိုၵ်းၵၢၼ်သိုၵ်းတီႈ လွၵ်ႉၸွၵ်ႇ – ပထူး – ၵူၼ်းပိုၼ်ႉတီႈလၢတ်ႈၼင်ႇၼႆ ။

ယၢမ်းလဵဝ်ၼႆႉ ၵူၼ်းဢၼ်ပွၵ်ႈမႄး တႃႇၵႂႃႇၾိုၵ်းၵၢၼ်သိုၵ်းၼႆႉ ပေႃးပၼ်ငိုၼ်းလႆႈတီႈၵၢင်ႉၵႄႇၼႆႉ လွတ်ႈသေ ၵူၼ်းၸိူဝ်း ႁႃၸဝ်ႉၵိၼ်ၶမ်ႈဢမ်ႇပၼ်ငိုၼ်းလႆႈတီႈၵၢင်ႉၵႄႇတႄႉ  မႆႈႁူမႆႈၸႂ် ဢမ်ႇပဵၼ်လပ်းပဵၼ်ၼွၼ်း ။ ဢမ်ႇပႃးသဵၼ်ႈၸိုဝ်ႈၵမ်းၼႆႉၵေႃႈ မိူဝ်ႈလႂ်တေၺႃးႁွင်ႉ ၺႃးၺွပ်းတႃႇၵႂႃႇႁၢပ်ႇၵၢၼ်သိုၵ်းၼႆသေ ယူႇသဝ်းတီႈႁိူၼ်းၸဝ်ႈၵဝ်ႇၵူၺ်းၵေႃႈဢမ်ႇမီးလွင်ႈႁူမ်ႇလူမ်ႈ။

ၵဵဝ်ၵပ်းလွင်ႈၵၢင်ႉၵႄႇၵိၼ်ငိုၼ်းတီႈ ၵူၼ်းမိူင်းၸိူဝ်းပႃးသဵၼ်ႈၸိုဝ်ႈႁၢပ်ႇထၢမ်းၵၢၼ်သိုၵ်းၼႆႉသေ ၼႂ်းဝၼ်းတီႈ 3 လိူၼ်ၵျူႊလၢႆႊၸွမ်သိုၵ်းဢူးမွင်ႇမွင်ႇဢေး လၢတ်ႈတီႈ ပၢင်ၵုမ် ငဝ်ႈငုၼ်းၾၢႆႇၵဵပ်းသိုၵ်းၵူၼ်းမိူင်း ဢၼ်ၸတ်းႁဵတ်းတီႈလုမ်း ႁွင်ႈၵၢၼ်ၽွင်းလူင်ၾၢႆႇၵႅတ်ႇၶႄ တီႈၼေႇပျီႇတေႃႇ လၢတ်ႈဝႃႈ သင်ၸိူဝ်ႉဝႃႈ မီးလွင်ႈဢမ်ႇထၢင်ႇထိူမ် ပၼ်ငိုၼ်း ၵိၼ်ငိုၼ်းလွင်ႈႁၢပ်ႇၵၢၼ်သိုၵ်းၼႆႉ ၼႆၸိုင်ႇၸၢင်ႈတိူင်ႇလၢတ်ႈလႆႈ တေဢဝ်လိူင်ႈၼၵ်းၼႃႇၵႂႃႇဝႃႈၼႆ။

ၵူၼ်းဢၼ်ပႃးၼႂ်းသဵၼ်ႈမၢႆ တႃႇႁၢပ်ႇထၢမ်းၵၢၼ်သိုၵ်းပေႃးဢမ်ႇၶႂ်ႈၵႂႃႇႁၢပ်ႇၵၢၼ်သိုၵ်းၼႆႉၸိုင် လႆႈၵႂႃႇငူပ်ႉငီႉၵၼ်တင်း ၵၢင်ႉၵႄႇ ဝၢၼ်ႈၽႂ်မိူင်းမၼ်း။ တႃႇၸၢင်ႈၵူၼ်းၵႂႃႇတႅၼ်းတႃႇႁၢပ်ႇၵၢၼ်သိုၵ်းၼႆႉ လႆႈပၼ်ငိုၼ်း ၼပ်ႉႁူဝ်သိပ်းသႅၼ်ပျႃး တီႈၵၢင်ႉၵႄႇ ။ တႃႇၸၢင်ႈၵူၼ်းၵႂႃႇႁၢပ်ႇၵၢၼ်သိုၵ်း တီႈဝဵင်းတူၼ်ႈတီႈ လႆႈပၼ် 85 သႅၼ်ပျႃး ၊ ဢေးတႃႇယႃႇ 60 သႅၼ် ၊ ႁၢႆးႁူဝ်း 75 သႅၼ် ၊ ပၢင်လူင်- လွႆႇလႅမ် 60 သႅၼ် ၊ ၼမ်ႉၸၢင် 60 သႅၼ် ဝႃႈၼႆ ။

သိုၵ်းမၢၼ်ႈပိုၼ်ႇၽၢဝ်ႇ ၵူၼ်းမိူင်းသႅၼ်းပၢၼ်ၼုမ်ႇ ဢႃယု 18 -35 တေလႆႈႁၢပ်ႇထၢမ်းၵၢၼ်သိုၵ်းၼႆႉ တႄႇမႃးမိူဝ်ႈပီ 2024 သေလိူၼ် February သေ တႄႇၵဵပ်းၵူၼ်းႁၢပ်ႇၾိုၵ်းသိုၵ်းၼႂ်းလိူၼ် March ထိုင်ယၢမ်းလဵဝ် မီးၵႂႃႇ ၸုပ်ႈ 15 ယဝ်ႉ လႆႈႁူႉၼင်ႇၼႆ ။