ၵူၼ်းၵိၼ်ငိုၼ်းလိူၼ်လိုဝ်ႈၵၢၼ်ပိၼ်ႇသိၼ်ႇ (ပင်စင်) ၸိူဝ်းယူႇတၢင်းသူၼ်မွၵ်ႇဢွင်ႇသၢၼ်း တီႈပၢင်ႇလဵၼ်ႈ ႁႅင်းၵၢင်ဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ သိုၵ်းမၢၼ်ႈၸႂ်ႉၶၢႆႉၵႂႃႇယူႇတီႈ  ႁိူၼ်းမိၼ်းၵျၢၼ်ႇၸိတ်ႉ  ( မင်းကျန်စစ် အိမ်ယာ) ဢၼ်မီးၼႂ်း ဝဵင်းဢေးတႃႇယႃႇ တင်းမူတ်းဝႃႈၼႆ။

 လိူၼ်ၾႅပ်ႊပိဝ်ႊရီႊ ဝၼ်းတီႈ 19 ပူၼ်ႉမႃး သိုၵ်းမၢၼ်ႈလႄႈ လူင်ပွင်ၸိုင်ႈမိူင်းတႆး တႂ်ႈသိုၵ်းမၢၼ်ႈ ဢုပ်ႇဢူဝ်းၵၼ် တႃႇႁႂ်ႈ ႁၢၼ်ႉတၢင်းၶၢႆလႄႈ ႁွင်ႈႁိူၼ်းဢၼ်မီးႁိမ်း ႁူင်းလဵၼ်ႈဢဵၼ်ႁႅင်းၼၼ်ႉၶၢႆႉ ဢွင်ႈတီႈဢၼ်တမ်းဝၢင်းဝႆႉ ၼႆယဝ်ႉ ။

 ၼႂ်းႁၢၼ်ႉတၢင်းၶၢႆ160 ႁၢၼ်ႉၼၼ်ႉ ႁၢၼ်ႉၶၢႆၶိူင်ႈၵႃးတင်းသဵင်ႈ တေလႆႈ ၶၢႆႉၵႂႃႇတီႈ ၾၢႆႇဢွၵ်ႇ ဝဵင်းတူၼ်ႈတီး 4 လၵ်းတင်းသဵင်ႈ ၊ ႁၢၼ်ႉတၢင်းၵိၼ်လႄႈ ႁၢၼ်ႉၶဝ်ႈမုၼ်း ၸိူဝ်းၼၼ်ႉသမ်ႉ တေလႆႈ ၶၢႆႉၵႂႃႇယူႇတီႈတၢင်းႁွင်ႈႁၢၼ်ႉႁူင်းၾႆးမိၼ် သေ တွၼ်ႈတႃႇ ၵူၼ်းၵိၼ်ငိုၼ်းလိူၼ် ပိၼ်ႇသိၼ်ႇၼၼ်ႉသမ်ႉ ၸႂ်ႉၶၢႆႉၵႂႃႇတီႈ ႁိူၼ်းမိၼ်းၵျၢၼ်ႇၸိတ်ႉ( မင်းကျန်စစ် အိမ်ယာ) ဢမ်ႇၼၼ် ႁႂ်ႈၵႂႃႇသိုဝ်ႉလွၵ်းလိၼ်သေ ယူႇတီႈဝဵင်းဢေးတႃႇယႃႇ ဝႃႈၼႆ။

လႆႈႁူႉဝႃႈ ႁွင်ႈႁိူၼ်း မိၼ်းၵျၢၼ်ၸိတ်ႉ ဢၼ်ၵူၼ်း ၵိၼ်ငိုၼ်းလိူၼ်ပိၼ်ႇသိၼ်ႇၶဝ်တေလႆႈၶၢႆႉၵႂႃႇ ယူႇၼၼ်ႉ ၼိုင်ႈလိူၼ်ၼႆႉတေလႆႈပၼ် ၵႃႈၶၢတ်ႈႁွင်ႈ 3 မိုၼ်ႇပျႃး ၊ ၵဵဝ်ၵပ်းႁွင်ႈႁိူၼ်းၼႆႉဢမ်ႇမီးလၵ်းထၢၼ်သင်လႄႈ ႁဵတ်းႁႂ်ႈ ၵူၼ်းၵိၼ်ငိုၼ်းလိူၼ်ပိၼ်ႇသိၼ်ႇ ဢမ်ႇၶႂ်ႈၶၢႆႉပၼ်  ယၢပ်ႇၽိုတ်ႇဝႆႉၼႆယဝ်ႉ  ။

ၵူၼ်းၵိၼ်ငိုၼ်းလိုဝ်ႈ/ပေႃးၵၢၼ်ပိၼ်သိၼ်ၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“ၶႂ်ႈလႆႈလွင်ႈၽဵင်ႇပဵင်းၵူၺ်း ၊ ပေႃးၸႂ်ႉၶၢႆႉၵေႃႈ ၶႂ်ႈႁႂ်ႈၶၢႆႉယူႇၼႂ်းဝဵင်းၵူၺ်း။ယွၼ်ႉဝႃႈ ၵူၼ်းၵိၼ်ငိုၼ်းပိၼ်ႇသိၼ်ႇၼႆႉ ပဵၼ်ၵူၼ်းထဝ်ႈၵမ်ႈၼမ်။ သမ်ႉၸႂ်ႉၵႂႃႇယူႇတီႈၸွၵ်ႉ တီႈၵႆၼႆႉ မိူၼ်တင်းၶႂ်ႈပၢၵ်ႈပႅတ်ႈၵၼ်ၵူၺ်း” – ဝႃႈၼႆ။

လႆႈႁူႉဝႃႈ – ႁွင်ႈတီႈႁူင်းလဵၼ်ႈဢဵၼ်ႁႅင်းတၢင်းမူတ်းမီး 160 ႁွင်ႈလႄႈ ၊ ႁၢၼ်ႉၶၢႆ မီးၸမ် 107 ႁၢၼ်ႉ ။ ႁၢၼ်ႉတၢင်းၶၢႆ ဢၼ်မီးႁိမ်းသူၼ်မွၵ်ႇ ဢွင်ႇသၢၼ်းၼၼ်ႉ  မီးႁၢၼ်ႉ ပိုတ်ႇၶိူင်ႈၸၢၵ်ႈရူတ်ႉၶိူင်ႈလႄႈ ႁၢၼ်ႉၶဝ်ႈမုၼ်း ၊ ႁၢၼ်ႉၶိူင်ႈၶွမ်ႊၸိူဝ်းၼႆႉ  ။

ႁွင်ႈႁၢၼ်ႉဢၼ်မီးႁိမ်းႁွမ်းသူၼ်မွၵ်ႇဢွင်ႇသၢၼ်း ၼၼ်ႉၵူၼ်းပိုၼ်ႉတီႈသိုဝ်ႉယူႇ / ၶၢတ်ႈယူႇမႃးမီး 24 ပီပၢႆ ။ တႃႇၶိုၼ်းမႄးၵေႃႇသၢင်ႈ ႁူင်းလဵၼ်ႈဢဵၼ်ႁႅင်းႁႂ်ႈၶႅမ်ႉလိူဝ်ၵဝ်ႇ၊ တႃႇၵေႃႇသၢင်ႈ ဢၢင်ႇလဵၼ်ႈၼမ်ႉၼၼ်ႉ  ႁႂ်ႈႁၢၼ်ႉၶၢႆၶူဝ်းၶၢႆတၢင်းၵိၼ် ၸွမ်းႁိမ်းႁွမ်း ပၢင်ႇလဵၼ်ႈႁႅင်းၼၼ်ႉၶၢႆႉပၢႆႈ ပၼ်တင်းသဵၼ်ႈ ၼႆယဝ်ႉ ။

ၼၢင်းယိင်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၵူၼ်းဢဝ်ပိၼ်ႇသိၼ်ဝႆႉၼၼ်ႉ ၵမ်ႈၼမ် ပဵၼ်ၵူၼ်းထဝ်ႈ ဢမ်ႇလူင်းႁွင်ႈလႆႈလူးၵွၼ်ႇ ၊ ၵူၼ်းၶၢတ်ႈႁွင်ႈ ၸိူဝ်းၼၼ်ႉတူၵ်းလူင်းၵၼ် လႆႈယဝ်ႉ သေတႃႉ တွၼ်ႈတႃႇၵူၼ်းထဝ်ႈ ၸိူဝ်းၵိၼ်ငိုၼ်းလိူၼ်ပိၼ်ႇသိၼ်ၼၼ်ႉ ဢမ်ႇမီး ၽႂ်လၢတ်ႈၸွႆႈသင် ၊ ပေႃးဢမ်ႇၶၢႆႉႁွင်ႈတီႈ မိၼ်းၸၼ်ႇသိတ်ႉၵေႃႈ ဢဝ်လွၵ်းလိၼ် တီႈဢေး တႃႇယႃႇၼၼ်ႉၵူၺ်းယဝ်ႉ ၊ ဢမ်ႇၶၢႆႉၵေႃႈဢမ်ႇလႆႈယဝ်ႉ”- ဝႃႈၼႆ ။

ႁွင်ႈၵၢၼ်ၾၢႆႇလိူမ်ႈလႆႇၸႄႈဝဵင်း သူင်ႇလိၵ်ႈလူင်းမႃးပၼ်ၾၢင်ႉ ႁႂ်ႈႁၢၼ်ႉတၢင်းၶၢႆ ၶၢႆႉၼႆႉ မီး 3 ပွၵ်ႈ ။   မိူဝ်ႈလိူၼ် တီႊသႅမ်ႊပိူဝ်ႊ ဝၼ်းတီႈ 3 ၼိုင်ႈပွၵ်ႈ ၊ ၼႂ်းလိူၼ်ၵျႅၼ်ႊၼိဝ်ႊရီႊ ဝၼ်းတီႈ 5 ၼိုင်ႈပွၵ်ႈ ၊ ၼႂ်းလိူၼ် ၾႅပ်ႉပိဝ်ႊရီႊ ဝၼ်းတီႈ 2 ၼိုင်ႈပွၵ်ႈ ။ ဝၼ်းတီႈ 28 လိူၼ် ၾႅပ်ႉပိဝ်ႊရီႊ ၼႆႉ တေလႆႈၶၢႆႉႁႂ်ႈယဝ်ႉတူဝ်ႈ သင်ဢမ်ႇၶၢႆႉပၼ် တေဢဝ်ဢဵၼ်ႁႅင်းတင်းၶိူင်ႈၸၢၵ်ႈ မႃးၵူၼ်ႇယႃႉ ၼႆယဝ်ႉ ။