ဝၢႆးလင် ၸုမ်းယိပ်းၵွင်ႈၵၢင်ႇၸၢဝ်းၶိူဝ်း တပ်ႉသိုၵ်းၵဝ်ႈၵၢင်ႉ (MNDAA) ၊ ရၶႅင်ႇ (AA)၊ တဢၢင်း (TNLA) ၸတ်းၽႅၼ်ယၼ်ႇသိုၵ်း 1027 သေ ဢဝ်ၶေႃႈဢၢင်ႈ တႃႇလိုပ်ႈလမ်းၸုမ်း ၵျႃးၽႅၼ်ႉယဝ်ႉ တႄႇပၢင်တိုၵ်း လိုပ်ႈလမ်းသိုၵ်းမၢၼ်ႈ ယိုတ်းမိူင်း ဢွၵ်ႇၼႂ်းမိူင်းတႆးပွတ်းႁွင်ႇ ၵၢၼ်ပၢႆးမၢၵ်ႈမီးၼႂ်းမိူင်းတႆးပွတ်းႁွင်ႇၵေႃႈ တူၵ်းလူင်းမႃးလိူဝ်ၵဝ်ႇ ၵူၼ်းမိူင်းဢမ်ႇလႆႈ ၼမ်ႉတွၼ်း ၼင်ႇဢၼ်မုင်ႈမွင်းဝႆႉ ၼႆယဝ်ႉ။

ၵူၼ်းၽုၵ်ႇသွမ်ႈသူၼ်ယၢင် ၼႂ်းၸႄႈဝဵင်းၵုၼ်လူင် ၼႃႈတီႈသိုၵ်းၵဝ်ႈၵၢင်ႉၵုမ်းၵမ်ဝႆႉၼၼ်ႉၵေႃႈ ဢမ်ႇလႆႈ ၵႃႈၶၼ်ယၢင် ၸွမ်းၼင်ႇယိူင်းဢၢၼ်းဝႆႉလႄႈ ႁဵတ်းႁႂ်ႈတုမ်ႉတိူဝ်ႉပႃး ၵၢၼ် ႁႃၵိၼ်လဵင်ႉတွင်ႉၵူၼ်းၼႂ်း ပိုၼ်ႉတီႈတႄႉတႄႉၼႆ – ၸဝ်ႈသူၼ်ယၢင်တင် (ရႃႇပႃႇ) လၢတ်ႈၼႄၼင်ႇၼႆ။

“ငိုၼ်းၶဝ်ႈလႄႈငိုၼ်းဢွၵ်ႇၼႆႉ ဢမ်ႇငၢမ်ႇၵၼ်။ ပေႃးၵူၼ်းၼႂ်းၼႃႈႁိူၼ်းၼမ်ၼႆ ငိုၼ်းၶဝ်ႈဢၼ်လႆႈၵူႈ လိူၼ်ၵူႈလိူၼ်ၼႆႉ ဢမ်ႇပေႃးၵိၼ်ဢမ်ႇပေႃးၸႂ်ႉ။ ၼႂ်းၶၢဝ်းယၢမ်းငဝ်းလၢႆး ၵၢၼ်ဝၢၼ်ႈမိူင်း ဢမ်ႇသုၵ်းဢမ်ႇလိပ်းၼႆႉ ယိင်ႈၶႅၼ်းႁႃၵိၼ်ယၢပ်ႇ။ ၶၼ်ၵုၼ်တႃႇသိုဝ်ႉၸႂ်ႉ ၼႂ်းႁိူၼ်းၼႂ်းသိုင်ႇၾႆးၵေႃႈ သမ်ႉၵႃႈၶိုၼ်ႈယူႇ ၵူႈဝၼ်း။ ၼိုင်ႈလိူၼ်ၼိုင်ႈလိူၼ်ၼႆႉ ပေႃး ဢမ်ႇႁႃလႆႈ ငိုၼ်းၶႄႇ ၼိုင်ႈႁဵင်ယႂၼ်ႊၼႆႉ ဢမ်ႇငၢႆႈယဝ်ႉ။ ႁဵတ်းၵၢၼ်ၵေႃႈ ႁိူဝ်ႉႁႅင်းၼႃႇ”။

ၵႃႈၶၼ်ယၢင်တင် (ရႃႇပႃႇ) ၼႆႉ မိူဝ်ႈပူၼ်ႉမႃး ၼႂ်းလိူၼ်ဢေႊပရိူဝ်ႊၼၼ်ႉ ၼိုင်ႈၵိၼ်ႈ (၁ ကျင်) လႆႈငိုၼ်းၶႄႇယူႇ တႃႇ 6 ယႂၼ်ႊ ၵိုင်ႇငိုၼ်းမၢၼ်ႈ တႃႇ 4,000 ပျႃး၊ ၼႂ်းၶၢဝ်းတၢင်း 3 လိူၼ်ၼႆႉသမ်ႉ ၶၼ်ယၢင်တင် ၵူၺ်းလႆႈငိုၼ်းၶႄႇ 4 ယႂၼ်ႊပၢႆ ၵိုင်ႇငိုၼ်းမၢၼ်ႈ 2,500 ပျႃးၵူၺ်း ၼႆယဝ်ႉ။

လႆႈႁူႉဝႃႈ ၵႃႈၶၼ်ယၢင်တင် ၵိုင်ႉၵၢင်ႉဢမ်ႇလႆႈၶၼ်သုင် ၸွမ်းၼင်ႇ ၸဝ်ႈသူၼ်ယိူင်းဢၢၼ်းမုင်ႈမွင်းဝႆႉၼၼ်ႉ ပဵၼ်မႃး ဝၢႆလင် ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ၼႆႉသေ ႁဵတ်းႁႂ်ႈသဵၼ်ႈတႃႈသၢႆတၢင်း တႃႇတေႃႉသူင်ႇၶူဝ်းၵုၼ်ႇယၢပ်ႇၽိုတ်ႇမႃးႁၢဝ်ႈႁႅင်း ၼႆယဝ်ႉ။

ၵၢၼ်ၵႃႉၶၢႆယၢင်တင် (ရႃႇပႃႇ) ၼႆႉ ၶဝ်ႈပႃးၼႂ်းၶၵ်ႉၵၢၼ်ႁႃၵိၼ်လဵင်ႉတွင်ႉ ၵူၼ်းမိူင်းၼႂ်းၸႄႈဝဵင်းသႅၼ်ဝီ၊ ၵုၼ်လူင်၊ ဝဵင်းၼမ်ႉၽႃႈ (ၶျိၼ်ႊသူၺ်ႇႁေႃႇ) လႄႈ ဝဵင်းႁူဝ်ပၢင်ႇ ၸိူဝ်းၼႆႉ။

တႅမ်ႈ – ၽူၺ်းၼုမ်ႇ