မိူဝ်ႈၼႆႉ ဝၼ်းတီႈ 08/07/2025 ယၢမ်းၵၢင်ၼႂ်မွၵ်ႈ 9 မူင်း ႁိူဝ်းမိၼ်တိုၵ်း ၶွင်သိုၵ်းမၢၼ်ႈ ပွႆႇမၢၵ်ႇသႂ်ႇ တၢင်းၾၢႆႇပွတ်းတူၵ်း ဝဵင်းမိူင်းၵုတ်ႈ ၼႂ်းတိူင်းဝဵင်းလိူဝ်ႇ (မၼ်းတလေး) မၢၵ်ႇတူၵ်းသႂ်ႇႁိူၼ်းယေးၵူၼ်းမိူင်းလူႉၵွႆ ၸၢၵ်ႇမၢၵ်ႇတိူဝ်ႉၺႃးၵူၼ်းမိူင်းလူႉတၢႆမၢတ်ႇၸဵပ်း ၸွမ်းထႅင်ႈလၢႆၵေႃႉ။
ၵူၼ်းပိုၼ်ႉတီႈ ဝဵင်းမိူင်းၵုတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ယၢမ်းၵၢင်ၼႂ် 8:40 မူင်း သိုၵ်းမၢၼ်ႈ ဢဝ်ႁိူဝ်းမိၼ် မႃးပွႆႇသႂ်ႇတၢင်းၾၢႆႇပွတ်းတူၵ်း ဝဵင်းမိူင်းၵုတ်ႈ 2 လုၵ်ႈ တိူဝ်ႉၺႃးႁိူၼ်းယေး ၵူၼ်းဝၢၼ်ႈ လူႉၵွႆၸွမ်းလၢႆလင်။ လွင်ႈၵူၼ်းမၢတ်ႇၸဵပ်းလူႉတၢႆတႄႉ ပႆႇလႆႈႁူႉႁူဝ်ယွႆႈမၼ်းတႅတ်ႈတေႃးၶႃႈ”- ဝႃႈၼႆ။
ၵဵဝ်ႇၵပ်းလွင်ႈၼႆႉ Mogok Media ဢွၵ်ႇဝႆႉဝႃႈ – သိုၵ်းမၢၼ်ႈၼႆႉ ၸႂ်ႉႁိူဝ်းမိၼ်တိုၵ်း ဢဝ်မၢၵ်ႇဢၼ်မီးၼမ်ႉၼၵ်း 500 ပွၼ်ႊ ပွႆႇသႂ်ႇတၢင်းၾၢႆႇပွတ်းတူၵ်း ဝဵင်းမိူင်းၵုတ်ႈ မၢၵ်ႇတူၵ်းသႂ်ႇႁိူၼ်းယေးၵူၼ်းမိူင်းလူႉၵွႆၸွမ်း လၢႆလင်။ ၸၢၵ်ႇမၢၵ်ႇတိူဝ်ႉၺႃးၵူၼ်းမိူင်းလူႉတၢႆ 3 ၵေႃႉ၊ ဢၼ်မၢတ်ႇၸဵပ်းသမ်ႉ ဢမ်ႇယွမ်း 9 ၵေႃႉ – ဝႃႈၼႆ။
ဢၼ်မၢၵ်ႇတူၵ်းပွၵ်ႈၼႆႉ ပဵၼ်တီႈႁိမ်းႁူင်းႁဵၼ်းၼႆသေတႃႉ လွင်ႈတိူဝ်ႉၺႃးလုၵ်ႈဢွၼ်ႇမၢတ်ႇၸဵပ်းလူႉတၢႆတႄႉ ဢမ်ႇမီး။ ၵူၺ်းၵႃႈ ႁိူၼ်းယေးၵူၼ်းမိူင်းတႄႉ တိူဝ်ႉၺႃးၸၢၵ်ႇမၢၵ်ႉသေ လူႉၵွႆဝႆႉ ဢမ်ႇယွမ်း 10 လင်။ ၼႂ်းၼၼ်ႉ ဢၼ်လူႉၵွႆႁၢဝ်ႈႁႅင်းသမ်ႉ တေမီးမွၵ်ႈ 5 လင် ။
ပူၼ်ႉမႃး မိူဝ်ႈဝၼ်းတီႈ 25/06/2025 ၼၼ်ႉၵေႃႈ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း မႃးပွႆႇမၢၵ်ႇသႂ်ႇတၢင်းၾၢႆႇပွတ်း ဢွၵ်ႇ ဝဵင်းမိူင်းၵုတ်ႈ တိူဝ်ႉၺႃးႁိူၼ်းယေးၵူၼ်းဝၢၼ်ႈလၢႆလင်။ လိူဝ်ၼၼ်ႉ ၸၢၵ်ႇမၢၵ်ႇတိူဝ်ႉၺႃးၵူၼ်း မိူင်းမၢတ်ႇၸဵပ်းၸွမ်း 4 ၵေႃႉ။
ၼွၵ်ႈလိူဝ်ဝဵင်းမိူင်းၵုတ်ႈၼႆႉယဝ်ႉ မိူဝ်ႈၼႆႉ ဝၼ်းတီႈ 8 ယၢမ်းၵၢင်ၼႂ် 9 မူင်း သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းၸႄႈဝဵင်းၵျွၵ်ႉမႄး မၢၵ်ႇတူၵ်းသႂ်ႇႁိူၼ်းယေးၵူၼ်းမိူင်း လူႉၵွႆၸွမ်းလၢႆလင်၊ ၸၢၵ်ႇမၢၵ်ႇတိူဝ်ႉၵူၼ်းမိူင်းလူႉတၢႆ ၵေႃႉၼိုင်ႈၸိုဝ်ႈႁွင်ႉ တေႃႇမိၼ်ႉမိၼ်ႉတၢၼ်း ဢႃယု 56 ပီ မၢတ်ႇၸဵပ်း 4 ၵေႃႉ – ႁွင်ႈၵၢၼ် ပိုၼ်ၽၢဝ်ႇ ၾၢႆႇတပ်ႉသိုၵ်းတဢၢင်း ပိုၼ်ၽၢဝ်ႇဢွၵ်ႇဝႆႉၼင်ႇၼႆ။
ၽူႈတူင်ႉၼိုင်သၢႆသိုၵ်း ၼႂ်းပိုၼ်ႉတီႈ တၢင်းပွတ်းႁွင်ႇ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ယၢမ်းၵၢင်ၼႂ် ႁိူဝ်းမိၼ်သိုၵ်းမၢၼ်ႈ လမ်းၼိုင်ႈ မႃးပွႆႇသႂ်ႇ တီႈငဵင်းၶျၢၼ်းယေးၵူင်း 1 လုၵ်ႈလႄႈ ႁူင်းသဝ်းလူလွမ်ၵူၼ်းထဝ်ႈ 1 လုၵ်ႈ တီႈၼႂ်းပွၵ်ႉတွင်ၼဝ်ႈၼၼ်ႉၶႃႈဢေႃႈ”- ဝႃႈၼႆ။
လႆႈႁူႉဝႃႈ ႁိူဝ်းမိၼ်သိုၵ်းမၢၼ်ႈ ဢၼ်မႃးပၼ်ႇလဵပ်ႈ ၼႂ်းဝၼ်းမိူဝ်ႈၼႆႉ ၶဝ်မႃးပၼ်ႇလဵပ်ႈတူၺ်း တၢင်းဝဵင်းသီႇပေႃႉ၊ ၼမ်ႉသၼ်ႇ၊ မိူင်းငေႃႉ၊ ဝဵင်းၵျွၵ်ႉမႄးလႄႈ မိူင်းၵုတ်ႈ ၸိူဝ်းၼႆႉသေ ယဝ်ႉၵေႃႈ မႃးပွႆႇမၢၵ်ႇၵႂႃႇ တီႈဝဵင်းၵျွၵ်ႉမႄးလႄႈ မိူင်းၵုတ်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ