တႄႇႁူဝ်လိူၼ်ၵျူႊလၢႆႊမႃးၼႆႉ သိုၵ်းၶျၢင်း CNO/CNDF လႄႈ သိုၵ်းၶျၢင်း CDF-Hualngoram ၶဵင်ႈၶႅင်ၵၢၼ်သိုၵ်းၵၼ်မႃးႁၢဝ်ႈႁႅင်း တီႈဝဵင်းရိၶေႃႊတႃႊ ၸႄႈဝဵင်းၾလမ်း (ဖလမ်းမြို့နယ်) ၸႄႈမိူင်းၶျၢင်း လႅၼ်လိၼ်ၶျၢင်း – ဢိၼ်ႊတီႊယိူဝ်ႊ။
ဝၼ်းတီႈ 05/07/2025 ယၢမ်းၵၢင်ၼႂ် သွင်ၾၢႆႇယိုဝ်းတိုၵ်းၵၼ်ႁၢဝ်ႈႁႅင်း ၵူၼ်းပိုၼ်ႉတီႈ ၸဵမ်ယိင်းၸၢႆး လုၵ်ႈဢွၼ်ႇၵူၼ်းထဝ်ႈ ဢွၼ်ၵၼ်ငိူင်ႉပၢႆႈ ၶၢမ်ႈၶူဝ်လႅၼ်လိၼ်သေ ၵႂႃႇသွၼ်ႈယူႇဝႆႉတီႈဝဵင်းၸူဝ်ႊၶေႃႊထႃး ၸႄႈမိူင်းမီႊၸူဝ်ႊရမ်ႊ မိူင်းဢိၼ်ႊတီႊယိူဝ်ႊ။
ၵူၼ်းမိူင်းၶျၢင်းၵမ်ႈၽွင်ႈသမ်ႉ လတ်းၶၢမ်ႈၵႄးၼမ်ႉ Tio ဢၼ်မီးတီႈလႅၼ်လိၼ်သေ ဢၢၼ်းပၢႆႈၶဝ်ႈ ၼႂ်းလႅၼ်လိၼ်ဢိၼ်ႊတီႊယိူဝ်ႊ ၺႃးၼမ်ႉထွင်းႁႅင်းသေ လွင်ႈလႆၸူမ်ၼမ်ႉ လူႉတၢႆၵႂႃႇၵေႃႈမီး ဝႃႈၼႆ။
ၽွင်းပၢင်တိုၵ်း သိုၵ်းၶျၢင်း 2 ၸုမ်းၼႆႉ မၢၵ်ႇၵွင်ႈတိူဝ်ႉပႃးႁိူၼ်းယေး ၾင်ႇမိူင်းဢိၼ်ႊတီႊယိူဝ်ႊ၊ ထိုင်တီႈၸဝ်ႈၼႃႈတီႈ ဝဵင်းၸူဝ်ႊၶေႃႊထႃး လႆႈပိုၼ်ၽၢဝ်ႇဝႃႈ – ယႃႇဝၢႆႇပၢၵ်ႇၵွင်ႈမႃးတင်း ၼႂ်းၼႃႈတီႈမိူင်းဢိၼ်ႊတီႊယိူဝ်ႊ ၼႆယဝ်ႉ။
မိူဝ်ႈပီ 2023 ပူၼ်ႉမႃး ၼႂ်းပိုၼ်ႉတီႈရိၶေႃႊတႃႊၼၼ်ႉ တပ်ႉသိုၵ်းမၢၼ်ႈတင်း သိုၵ်းၶျၢင်း ယၢမ်ႈပဵၼ်ပၢင်တိုၵ်းၵၼ်ႁၢဝ်ႈႁႅင်း။ ၽွင်းမိူဝ်ႈၼၼ်ႉၵေႃႈ ၵူၼ်းမိူင်းၶျၢင်း ၼပ်ႉႁူဝ်ႁဵင်ၵေႃႉ လႆႈငိူင်ႉပၢႆႈၽေးသိုၵ်း ၵႂႃႇသွၼ်ႈယူႇၼႂ်းၾင်ႇမိူင်းဢိၼ်ႊတီႊယိူဝ်ႊ ႁဵတ်းႁႂ်ႈၵူၼ်းမိူင်းယၢပ်ႇၽိုတ်ႇၵိၼ်းၸႂ် – သိုဝ်ႇၶၢဝ်ႇ Chin World ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ