သိုၵ်းလူင်ပွင်ၸိုင်ႈမၢၼ်ႈ ဢၼ်တူင်ႉၼိုင်တၢင်းပွတ်းတွၼ်ႈ ဢိူင်ႇပၢင်လေႃႉ ၸႄႈဝဵင်းၵျွၵ်ႉမႄးၼၼ်ႉ ႁွင်ႉဢဝ် ၵူၼ်းဝၢၼ်ႈ 16 ၵေႃႉ ၵႂႃႇၸွမ်းၶဝ် ႁိုင် 4 ဝၼ်းသေ ပွႆႇတူဝ်ပၼ်ပွၵ်ႈၶိုၼ်း မိူဝ်ႈဝႃးၼႆႉ ဝႃႈၼႆ။
ဝၼ်းတီႈ 08/08/2018 ယၢမ်းၵၢင်ဝၼ်း 12 မူင်း ၸၢႆးထုၼ်းဝိၼ်း ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းၵျွၵ်ႉမႄး ၵႂႃႇႁူပ်ႉ ၽူႈၵွၼ်းသိုၵ်း တပ်ႉၶမယ 501 တီႈဝၢၼ်ႈပၢင်ၵႅၼ် ဢိူင်ႇႁၢႆးၵုၺ် ၸႄႈဝဵင်းၵျွၵ်ႉမႄးသေ တုၵ်းယွၼ်းႁႂ်ႈပွႆႇပၼ် ၵူၼ်းဝၢၼ်ႈ 16 ၵေႃႉ ဢၼ်ၺႃးႁွင်ႉၵႂႃႇ ၸွမ်းငႃးသိုၵ်းလႄႈ သိုၵ်းၸင်ႇပွႆႇပၼ်ၶိုၼ်း ဝႃႈၼႆ။
ၸၢႆးထုၼ်းဝိၼ်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ သိုၵ်းမၢၼ်ႈ ၶဝ်ၵႂႃႇၺႃးမၢၵ်ႇႁၢင်ႈၵၢင် တၢင်းၶဝ်ႈဝၢၼ်ႈပဵင်းၼိမ်ၼၼ်ႉသေ ၵူၼ်းၶဝ် လႆႈလူႉသုမ်း 2 ၵေႃႉ ၶဝ်ၽိတ်း ၸႂ်သေ ႁွင်ႉၵူၼ်းဝၢၼ်ႈၵႂႃႇၸွမ်းၶဝ် 16 ၵေႃႉ ဢၼ်ႁွင်ႉၵႂႃႇၸွမ်းၶဝ်ၼၼ်ႉ မိူဝ်ႈဝၼ်းတီႈ 5 ။ ဢၼ်ၶဝ် ႁွင်ႉၵူၼ်း ဝၢၼ်ႈၵႂႃႇၼၼ်ႉ ဢမ်ႇၸႂ်ႈဝႃႈ ၶဝ်တီႉၺွပ်း ယွၼ်ႉၵူဝ်ၵူၼ်းဝၢၼ်ႈပႃးၼႂ်းသိုၵ်းလုၵ်ႉၾိုၼ်ႉၼႆသေ ၶဝ်ႁွင်ႉ ၵႂႃႇႁဵတ်း ၼၼ်ၵူၺ်း ၶဝ်တႄႉလၢတ်ႈၼႄႁဝ်းၼင်ႇၼႆ” ဝႃႈၼႆ။
ၵူၼ်းဝၢၼ်ႈဢၼ်ၺႃးသိုၵ်းမၢၼ်ႈ ႁွင်ႉၵႂႃႇၸွမ်းငႃးသိုၵ်းၼၼ်ႉ ပဵၼ်ၵူၼ်းဝၢၼ်ႈၼႂ်းဢိူင်ႇပၢင်လေႃႉ ဝၢၼ်ႈပဵင်းၼိမ် 11 ၵေႃႉ၊ ဝၢၼ်ႈဢႅၵ်ႉၵျီး 5 ၵေႃႉ ႁူမ်ႈၵၼ် တင်းမူတ်း 16 ၵေႃႉ ဝႃႈၼႆ။
သိုၵ်းလူင်ပွင်ၸိုင်ႈမၢၼ်ႈ ၶမယ 501 ဢၼ်ပၵ်းငဝ်ႈတပ်ႉဝဵင်းၵျွၵ်ႉမႄးၼႆႉ ၸဝ်ႈသိုၵ်းလူင် ဢွင်ႇၼၢႆႇထူး ဢွၼ်ဢဵၼ် ႁႅင်းသိုၵ်း မွၵ်ႈ 70 ၵေႃႉသေ တူင်ႉၼိုင်ၵႂႃႇတၢင်းပွတ်း ဢိူင်ႇပၢင်လေႃႉ ဢိူင်ႇႁၢႆးၵုၺ်။ သမ်ႉၵႂႃႇယဵပ်ႇၺႃး မၢၵ်ႇဢၼ် ၸုမ်း ဢမ်ႇႁူႉၾၢႆႇႁၢင်ႈၵၢင်ဝႆႉ။ ႁဵတ်းႁႂ်ႈၵူၼ်းသိုၵ်းၶဝ် လူႉတၢႆ 2 ၵေႃႉ လႄႈ ၸင်ႇၺွပ်းႁွင်ႉဢဝ်ၵူၼ်းဝၢၼ်ႈ 16 ၵေႃႉ ၵႂႃႇၸွမ်းငႃးသိုၵ်းၶဝ် တင်ႈတႄႇဝၼ်းတီႈ 05/08/2018 သေ ပွႆႇၶိုၼ်းဝၼ်းတီႈ 08/08/2018။
Photo FB – SNLD
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ