တႄႇႁၢင်လိူၼ်ၵျုၼ်ႊၼၼ်ႉမႃး တေႃႇႁူဝ်လိူၼ်ၵျူႊလၢႆႊမႃးၼႆႉ သိုၵ်းမၢၼ်ႈတင်း သိုၵ်းတဢၢင်း ပဵၼ်ပၢင်တိုၵ်းၵၼ်ႁၢဝ်ႈႁႅင်း ၾၢႆႇသိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇလူင်သႂ်ႇ ၸွမ်းဝဵင်းၼွင်ၶဵဝ်၊ ဝဵင်းၵျွၵ်ႉမႄး၊ ဝဵင်းသီႇပေႃႉ၊ မိူင်းၵုတ်ႈ ၸိူဝ်းပဵၼ်ၼႂ်းၼႃႈတီႈတပ်ႉသိုၵ်းတဢၢင်း (TNLA) ၵုမ်းၵမ်ဝႆႉၸိူဝ်းၼၼ်ႉ ၸၢၵ်ႇမၢၵ်ႇတိူဝ်ႉၺႃးၵူၼ်းမိူင်း မၢတ်ႇၸဵပ်းလူႉတၢႆၵႂႃႇၸွမ်းတင်းၼမ် ၼႆယဝ်ႉ။

မိူဝ်ႈဝၼ်းတီႈ 04/07/2025 ၼႆႉ သိုၵ်းမၢၼ်ႈတင်း သိုၵ်းတဢၢင်း ပဵၼ်ပၢင်တိုၵ်းၵၼ်ႁၢဝ်ႈႁႅင်း ၸွမ်းဝၢၼ်ႈ ၸိူဝ်းဢိူမ်ႈၸမ်ဝႆႉ ဝၢၼ်ႈၼွင်လႅင်၊ ဝၢၼ်ႈၵျွၵ်ႉတေႃႇ၊ ဝၢၼ်ႈဢုမ်ၶႃး၊ ၵႄႈ ၵၢင်ဝၢၼ်ႈလူင်ၸၢမ်လႄႈ ဝၢၼ်ႈလူင်ယေး၊ ၵႄႈၵၢင်ဝၢၼ်ႈဢုမ်တီးလႄႈ ဝၢၼ်ႈသၢမ်သိူဝ် ၼႂ်းၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ ၸိူဝ်းၼႆႉႁၢဝ်ႈႁႅင်း။

ၾၢႆႇသိုၵ်းမၢၼ်ႈ ၸႂ်ႉႁႅင်းသိုၵ်းတပ်ႉပႆလိၼ်တိုၵ်းၵူၺ်းဢမ်ႇၵႃး ၸႂ်ႉပႃးႁိူဝ်းမိၼ်တိုၵ်း ပွႆႇမၢၵ်ႇသႂ်ႇ 6 လုၵ်ႈ၊ ဢဝ်ၶိူင်ႈၵွင်ႈလူင် ပွႆႇမၢၵ်ႇသႂ်ႇ တႃႇ 112 ၵမ်းလႄႈ ၸႂ်ႉတရူၼ်ႊပွႆႇမၢၵ်ႇသႂ်ႇ တႃႇ 20 လုၵ်ႈၼႆႉ ၾၢႆႇႁွင်ႈၵၢၼ် ပိုၼ်ၽၢဝ်ႇ တပ်ႉသိုၵ်းတဢၢင်း (TNLA) ပိုၼ်ၽၢဝ်ႇဢွၵ်ႇဝႆႉၼင်ႇၼႆ။

ယွၼ်ႉသိုၵ်းမၢၼ်ႈ ၸႂ်ႉႁႅင်းတပ်ႉပႆလိၼ်၊ ႁႅင်းၶိူင်ႈၵွင်ႈၵၢင်ႇၵူႈသႅၼ်းသႅၼ်း လေႃႇတိုၵ်းတပ်ႉသိုၵ်းတဢၢင်းႁၢဝ်ႈႁႅင်းလႄႈ ဢွၼ်ၵၼ်ၼပ်ႉသၢင်ႈဝႃႈ ပဵၼ်ႁိုဝ်ၵေႃႈ သိုၵ်းတဢၢင်း တိုၼ်းတေလႆႈထွႆပၼ် သိုၵ်းမၢၼ်ႈၶိုၼ်းၼႆသေတႃႉ မိူဝ်ႈဝၼ်းတီႈ 5 ၼႆႉ ၾၢႆႇသိုၵ်းတဢၢင်း ပိုၼ်ၽၢဝ်ႇဝႃႈ ပဵၼ်ၶၢဝ်ႇပွမ်ၵူၺ်း၊ ယၢမ်းလဵဝ် သိုၵ်းတဢၢင်း ပႆႇမီးငဝ်းလၢႆးတႃႇတေလႆႈထွႆပၼ်သိုၵ်းမၢၼ်ႈၶိုၼ်းၼႆ – ၽူႈၶၢၼ်ပၢၵ်ႇ သိုၵ်းတဢၢင်း (TNLA) လူၺ်းယေႇဢူး လၢတ်ႈၵႂႃႇၼႂ်းပၢင်သပ်းၸႅင်ႈၶၢဝ်ႇၼင်ႇၼႆ။

“လေႃႇပီႇ (ၵူၼ်းပၼ်ႁႅင်း) သိုၵ်းမၢၼ်ႈတႄႉ ၽႄႈၶၢဝ်ႇဢွၵ်ႇဝႃႈ သိုၵ်းမၢၼ်ႈ တေသိမ်းဢဝ်လႆႈၶိုၼ်း ဝဵင်းၼွင်ၶဵဝ်ယဝ်ႉၼႆယူႇ။ ၼၼ်ႉပဵၼ်ၶၢဝ်ႇပွမ်ၵူၺ်း။ ဢိင်ၼိူဝ် ပိူင်ပဵၼ်ယၢမ်းလဵဝ်သေ ၾၢႆႇႁဝ်းၶႃႈၵေႃႈ ႁၢင်ႈႁႅၼ်းဝႆႉယူႇ။ ပၢင်တိုၵ်းတီႈဝဵင်းၼွင်ၶဵဝ်တႄႉ ပဵၼ်ယူႇၵူႈဝၼ်းယဝ်ႉ။ ၵူၺ်းၵႃႈ ဢမ်ႇမီးငဝ်းလၢႆးလႄႈ ဢမ်ႇပႆႇထိုင်ၸၼ်ႉတီႈ ဢၼ်တႃႇၾၢႆႇႁဝ်းတေလႆႈထွႆဢွၵ်ႇၶိုၼ်း။ ၾၢႆႇႁဝ်းၶႃႈတႄႉ တိုၵ်းၶိုၼ်းယိုဝ်းၶိုၼ်း ၸွမ်းၼင်ႇပွင်ပဵၼ်လႆႈၼၼ်ႉယူႇ”။

ယၢမ်းလဵဝ် ဢွင်ႈတီႈသိုၵ်းမၢၼ်ႈလႄႈ သိုၵ်းတဢၢင်း ပဵၼ်ပၢင်တိုၵ်းၵၼ်ဝႆႉၼႆႉ ၸွမ်းဝၢၼ်ႈၵၢၼ်ႇၵျီး၊ ၺွင်ႇတေႃး၊ သျွၵ်ႉၶျႅၼ်ႇ (ရှောက်ခြံ) ၊ ၵွင်းမၢၵ်ႇလၢင်း၊ သူၺ်ႇတုၼ်း၊ လၵ်ႉပၼ်ႇ ၵူင်း၊ ၵွင်းမၢၵ်ႇမူင်ႈ၊ ဢုမ်တီး၊ ဢုမ်ၶႃး၊ ယေႇမွင်းတၢၼ်း၊ ၵလႃးထူဝ်း၊ ၺၢၼ်ႇတေႃႇ၊ ၵမ်ႉၵေႃႇ၊ သၢမ်သိူဝ်၊ သူၺ်ႇၺွင်ႇပိၼ်ႇ၊ လူင်ဝၢႆ၊ လူင်ၸၢမ်၊ ၼွင်ယေး၊ ၼွင်ဢေႃႈ၊ ၼွင်လႅင်၊ ၼွင်ၽႃလႄႈ မၢၵ်ႇၶီႈၼူ ၸိူဝ်းၼႆႉ။

ယၢမ်းလဵဝ် သိုၵ်းမၢၼ်ႈ ၸႂ်ႉႁႅင်းသိုၵ်းတပ်ႉပႆလိၼ်မွၵ်ႈ 6,000 ၵေႃႉသေ ၶဝ်ႈလေႃႇတိုၵ်း တပ်ႉသိုၵ်းတဢၢင်း ၼႂ်းၸႄႈဝဵင်းၼွင်ၶဵဝ် ထုင်ႉတွင်းၶမ်းၵူၺ်းဢမ်ႇၵႃး ပိူဝ်ႈတႃႇၶဝ်ႈလေႃႇတိုၵ်း ယိုတ်းဢဝ်လႆႈ ဝဵင်းၼွင်ၶဵဝ်ၶိုၼ်းၼၼ်ႉ ၸႂ်ႉတိုဝ်းႁႅင်းသိုၵ်းမွၵ်ႈ 1,000 ၵေႃႉ ၶဝ်ႈတိုၵ်းဝႆႉတၢင်းဝၢၼ်ႈဢုမ်တီး ဝႃႈၼႆ။

ဝၢႆးလင်ပၢင်တိုၵ်း ၽႅၼ်ယၼ်ႇသိုၵ်း 1027 မႃး သိုၵ်းတဢၢင်း (TNLA) ၼႆႉ ပဵၼ်ပၼ်ႁႃၵၼ်တင်း သိုၵ်းၶၢင် (KIA)၊ သိုၵ်းတႆး (SSPP/SSA) ၵူၺ်းဢမ်ႇၵႃး တင်းသိုၵ်းၵဝ်ႈၵၢင်ႉၵေႃႈ ယၢမ်ႈမီးပၼ်ႁႃၵၼ်တီႈ ဝဵင်းၵူတ်ႉၶၢႆထႅင်ႈ ၼႆယဝ်ႉ။

ယၢမ်းလဵဝ် သိုၵ်းတဢၢင်း ၵုမ်းၵမ်ဝႆႉ တႃႇ 12 ဝဵင်း ၼႂ်းမိူင်းတႆးပွတ်းႁွင်ႇသေ မိူဝ်ႈလိူၼ်ဢေႊပရိူဝ်ႊ ပူၼ်ႉမႃးၼႆႉ မိူင်းၶႄႇ ယူႇၵၢင်ႁဵတ်းၶဵဝ်ပၼ်သေ ႁွင်ႉဢဝ်သိုၵ်းတဢၢင်းတင်း သိုၵ်းမၢၼ်ႈ ၵႂႃႇဢုပ်ႇဢူဝ်းၵၼ် ၼႂ်းမိူင်းၶႄႇ ပိူဝ်ႈတႃႇၵႄႈလိတ်ႈပၼ်ႁႃ ပၢင်တိုၵ်းၼႆသေတႃႉ တင်းသွင်ၾၢႆႇ ဢမ်ႇလႆႈၶေႃႈတူၵ်းလူင်းသင်ၵၼ်မႃးလႄႈ ပေႃးထိုင်လိူၼ်ဢေႃးၵတ်ႊသ်မႃး မိူင်းၶႄႇ တေႁွင်ႉဢုပ်ႇၵၼ်ထႅင်ႈၵမ်းၼိုင်ႈ ၼႆယဝ်ႉ။

တႅမ်ႈ – ၽူၺ်းၼုမ်ႇ