ဝၼ်းတီႈ 03/07/2025 ယၢမ်းႁူဝ်ၶမ်ႈ ၾူၼ်တူၵ်းႁၢဝ်ႈႁႅင်းသေ ၼမ်ႉၼွင်းလူၼ်ႉ ၾၢႆၵိုင်ႉၵၢင်ႉၵူၼ်ႇပင်း လုပ်ႇထူမ်ႈသႂ်ႇဝၢၼ်ႈပွင်ႊပွင်ႊလႄႈ ဝၢၼ်ႈသျီး ၵူၼ်းမိူင်းလႆလွင်ႈၵႂႃႇၸွမ်းၼမ်ႉ 3 ၵေႃႉသေ ၸူမ်ၼမ်ႉတၢႆ တီႈဝဵင်းလၢဝ်ႇၵၢႆး (လဝ်ႉၵႆႇ) ၼႂ်းၼႃႈတီႈသိုၵ်းၵဝ်ႈၵၢင်ႉၵုမ်းၵမ် ၸိုင်ႈတႆးပွတ်းႁွင်ႇ။

ၵူၼ်းမိူင်းၸိူဝ်း လွင်ႈၵႂႃႇၸွမ်းၼမ်ႉသၢမ်ၵေႃႉၼၼ်ႉ ပဵၼ်သွင်ၵေႃႉၽူဝ်မေးလႄႈ လုၵ်ႈဢွၼ်ႇသႅၼ်း ဢႃယုမွၵ်ႈ 8 ၶူပ်ႇ ၵေႃႉၼိုင်ႈ လွင်ႈပႃးၵႂႃႇၸွမ်းၼမ်ႉၸႅဝ်ႈၵူၺ်းဢမ်ႇၵႃး ၼမ်ႉၼွင်းမႃးလုပ်ႇသႂ်ႇႁိူၼ်းၵူၼ်းမိူင်းလႄႈ တိူၵ်ႇႁႆႈလွၵ်းၼႃး ၼႂ်းဝၢၼ်ႈသီႇၵေႃႈ ၵူၼ်ႇပင်းလူႉၵွႆၵႂႃႇၸွမ်းထႅင်ႈၼႆ ႁွင်ႈၵၢၼ် ၾၢႆႇပိုၼ်ၽၢဝ်ႇၶၢဝ်ႇငၢဝ်း တပ်ႉသိုၵ်းၵဝ်ႈၵၢင်ႉၶဝ် ဢွၵ်ႇဝႆႉၼင်ႇၼႆ။

ၵူၼ်းၼႂ်းပိုၼ်ႉတီႈ ဝဵင်းလၢဝ်ႇၵၢႆး ၵေႃႉၼိုင်ႈ လၢတ်ႈဝႃႈ -“ႁိူၼ်းၶဝ်ၼၼ်ႉ သၢင်ႈဝႆႉႁိမ်းၾင်ႇၵႄးၼမ်ႉသေ ၺႃးပိုၼ်ႉတီႈတႅမ်ႇဝႆႉလႄႈ ႁဵတ်းႁႂ်ႈၼမ်ႉလုပ်ႇဢဝ်ၵႂႃႇလႆႈ။ ယွင်ၼမ်ႉ (ၾၢႆ) ဢၼ်ၵဵပ်းၼမ်ႉဝႆႉၼၼ်ႉၵေႃႈ ဢမ်ႇပေႉႁပ်ႉလႆႈႁႅင်းၼမ်ႉႁႄ တႅၵ်ႇၵႂႃႇၼၼ်ႉၼႃႇ။ ၸင်ႇဝႃႈၼမ်ႉၵိုင်ႉၵၢင်ႉၼွင်းၸႅဝ်ႈႁႅင်း”– ဝႃႈၼႆ။

ယၢမ်းလဵဝ် ၾၢႆႇၸဝ်ႈၼႃႈတီႈၶဝ် တေႃႉဢဝ်ၶၢပ်ႈတူဝ်တၢႆၼၼ်ႉ ၵႂႃႇဝႆႉတီႈႁူင်းယႃလူင် ဝဵင်းလၢဝ်ႇၵၢႆး။ ၾၢႆႇၸဝ်ႈၼႃႈတီႈ ၼႂ်းတပ်ႉသိုၵ်းၵဝ်ႈၵၢင်ႉၶဝ် ပိုၼ်ၽၢဝ်ႇဝႆႉဝႃႈ ၼမ်ႉၸၢင်ႈၼွင်းလုပ်ႇထူမ်ႈ ႁိူၼ်းယေးလႄႈ တိူၵ်ႇႁႆႈလွၵ်းၼႃး ၼႂ်းၸႄႈဝဵင်းလၢဝ်ႇၵၢႆးထႅင်ႈၼႆ ႁႂ်ႈၵူၼ်းမိူင်းၾၢင်ႉၽေးၼမ်ႉၵၼ်သေ ယူႇသဝ်းၵႂႃႇ ဝႃႈၼႆ။

ယွၼ်ႉၾူၼ်တူၵ်းႁႅင်းၵေႃႈပိူင်ၼိုင်ႈ၊ ယွၼ်ႉၾၢႆႇမိူင်းၶႄႇ ပိုတ်ႇၽၵ်းတူၾၢႆ ပွႆႇၼမ်ႉလူင်းမႃးၼႂ်းၵႄးၼမ်ႉၶူင်းၵေႃႈ ပိူင်ၼိုင်ႈလႄႈ ႁဵတ်းႁႂ်ႈၼမ်ႉၼွင်းႁႅင်း လုပ်ႇထူမ်ႈထိုင်ၸွမ်းပွၵ်ႉၸွမ်းယွမ်ႇ ၼႂ်းၸႄႈဝဵင်းလၢဝ်ႇၵၢႆး ၵူၺ်းဢမ်ႇၵႃး လုပ်ႇၼွင်းထူမ်ႈပႃး ႁိူၼ်းယေးၵူၼ်းၼႂ်းၸႄႈဝဵင်းမူႇၸေႊ၊ ၵျိၼ်ႊသၢၼ်ႊၵျေႃႉ ၸဵမ်ၸိူဝ်းၼႆႉသေ ထိုင်တီႈပေႃးလႆႈဢိုတ်းသဵၼ်ႈတၢင်းလူင်လႄႈ ၵဵတ်ႉလၢၼ်ႇဝႆႉ ၸူဝ်ႈၶၢဝ်း ၼႆယဝ်ႉ။

တႅမ်ႈ – ၽူၺ်းၼုမ်ႇ