ဝၼ်းတီႈ 02-04/07/2025 ၼႆႉ ပၢင်ၵုမ်ၶွမ်ႊမတီႊလႅၼ်လိၼ်မိူင်းထႆး – မိူင်းမၢၼ်ႈ (RBC) ပွၵ်ႈၵမ်း (37) မီးတူဝ်တႅၼ်းသိုၵ်းမၢၼ်ႈလႄႈ တပ်ႉသိုၵ်းႁေႃၶမ်းမိူင်းထႆး ၶဝ်ႈႁူမ်ႈဢုပ်ႇ ဢူဝ်းၵႂႃႇၸွမ်း တႃႇၶၢဝ်းတၢင်းသၢမ်ဝၼ်း တီႈဝဵင်းၵဵင်းမႂ်ႇ ၸိုင်ႈထႆး။

ၼႂ်းပၢင်ၵုမ်ၼၼ်ႉ ဢုပ်ႇဢူဝ်းၵၼ်ၵႂႃႇ ၵဵဝ်ႇၵပ်းၵၢၼ်ႁူမ်ႇလူမ်ႈ၊ ပၼ်ႁႃလိူင်ႈၵျႃးၽႅၼ်ႉ ၵၢၼ်လွၵ်ႇလႅၼ် ၵိၼ်ငိုၼ်းၼိူဝ်ဢွၼ်ႊလၢႆႊ၊ ပၼ်ႁႃၵႄးၼမ်ႉၵူၵ်း၊ ၼမ်ႉမႄႈသၢႆ ၸိူဝ်းၼႆႉ။ ၾၢႆႇတပ်ႉသိုၵ်းႁေႃၶမ်းထႆး ပဵၼ်တူဝ်တႅၼ်း ၼႃႈလိၼ်သိုၵ်းမၢႆ (3) ၊ ၾၢႆႇမိူင်းမၢၼ်ႈ ပဵၼ်ၵႅမ်ၸွမ်သိုၵ်းလူင် ဢူးၺုၼ်ႉဝိၼ်းသူၺ်ႇ ၽူႈၵွၼ်း ႁွင်ႈၵၢၼ်ၽႅၼ်ယၼ်ႇသိုၵ်းၶိုၵ်ႉတွၼ်း မၢႆ (4) ဢွၼ်ႁူဝ်ၶဝ်ႈႁူမ်ႈ ဝႃႈၼႆ။

ၽူႈၵွၼ်းတိူင်းသိုၵ်း တပ်ႉၵွင်မၢႆ (3) တပ်ႉသိုၵ်းႁေႃၶမ်းထႆး မွၵ်ႇလၢတ်ႈၵႂႃႇ လွင်ႈတႃႇၵႄႈလိတ်ႈပၼ်ႁႃ ၵၢၼ်ၶုတ်းႁႄႈလိၼ်၊ ၶုတ်းၶမ်း ၾၢႆႇၼိူဝ်ႁူဝ်ၵႄးမႄႈၼမ်ႉၵူၵ်းၼၼ်ႉသေ ပွႆႇသၢၼ်ၵွင်ႉ ဢႃႇသႅၼ်းၼိတ်ႉ လူင်းၼႂ်းၼမ်ႉၵူၵ်းလႄႈ ၼမ်ႉသၢႆၼၼ်ႉ ႁဵတ်းႁႂ်ႈတုမ်ႉတိူဝ်ႉပၢႆးယူႇလီၵူၼ်းမိူင်း ၸိူဝ်းယူႇႁိမ်းၾင်ႇၵႄးၼမ်ႉ ၸႄႈတွၼ်ႈၵဵင်းႁၢႆး၊ ၵဵင်းမႂ်ႇ ၵူၺ်းဢမ်ႇၵႃး တုမ်ႉတိူဝ်ႉပႃး ပိူင်သၢင်ႈသိင်ႇဝႅတ်ႉလွမ်ႉ ၸဵမ်ၸိူဝ်းၼႆႉလႄႈ တင်းသွင်ၸိုင်ႈမိူင်းလႆႈမႆႈၸႂ်လွင်ႈပၢႆးယူႇလီၵူၼ်းမိူင်း၊ ပိူဝ်ႈတႃႇႁူမ်ႈၵၼ်တီႉၺွပ်း ၸုမ်းၵျႃးၽႅၼ်ႉ ၸိူဝ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်းၼိူဝ်ဢွၼ်ႊလၢႆႊ ၸိူဝ်းၼႆႉထႅင်ႈ။  

မိူဝ်ႈပူၼ်ႉမႃး ဝၼ်းတီႈ 5 လိူၼ်ၵျုၼ်ႊၼၼ်ႉ ၵူၼ်းမိူင်းၼႂ်းၸႄႈတွၼ်ႈၵဵင်းႁၢႆး ၸိူဝ်းယူႇႁိမ်းၸမ် ၵႄးမႄႈၼမ်ႉၵူၵ်း ႁူမ်ႈၵၼ် ၼပ်ႉႁူဝ်ႁဵင်ၵေႃႉ ဢွၵ်ႇၼႄၵၢင်ၸႂ် သၢၼ်ၶတ်း ၵၢၼ်ၶုတ်းႁႄႈၶုတ်းၶမ်း တီႈႁူဝ်ၼမ်ႉ ၵႄးၼမ်ႉၵူၵ်းၼၼ်ႉသေ တုၵ်းယွၼ်းႁႂ်ႈလူင်ပွင်ၸိုင်ႈမိူင်းထႆး ၸွႆႈၵႄႈလိတ်ႈပၼ် ႁႂ်ႈဝႆးတီႈသုတ်း။

လိူဝ်ၼၼ်ႉ တုၵ်းယွၼ်းပႃးႁႂ်ႈလူင်ပွင်ၸိုင်ႈမိူင်းထႆး ဢုပ်ႇဢူဝ်းၵၼ်တင်း လူင်ပွင်ၸိုင်ႈမိူင်းၶႄႇ ႁႂ်ႈၸွႆႈၶဝ်ႈၵႄႈလိတ်ႈပၼ်ႁႃ ၵၢၼ်ၶုတ်းႁႄႈၶုတ်းၶမ်း ၼႂ်းၼႃႈတီႈသိုၵ်းမၢၼ်ႈလႄႈ သိုၵ်းဝႃႉ ႁူမ်ႈၵၼ်ၵုမ်းၵမ်ဝႆႉ ၼႂ်းၸိုင်ႈတႆးပွတ်းဢွၵ်ႇၼႆသေ ယိုၼ်ႈလိၵ်ႈဝႆႉပႃး တီႈလုမ်းၽွင်းတၢင်မိူင်းမၢၼ်ႈတင်း မိူင်းၶႄႇ တီႈမိူင်းထႆးဝႆႉ ၼႆယဝ်ႉ။ 

တႅမ်ႈ – ၽူၺ်းၼုမ်ႇ