မိူဝ်ႈၼႆႉ ဝၼ်းတီႈ 03/07/2025 ယၢမ်းၵၢင်ၶိုၼ်း 12 မူင်း တေႃႇၵၢင်ၼႂ်ၸဝ်ႉမိူင်းၸမ်လႅင်း ၾူၼ်တူၵ်းႁႅင်း ၸွမ်းလႅၼ်လိၼ်တႆး – ၶႄႇ မႄႈၼမ်ႉယၢင်းလႄႈ မႄႈၼမ်ႉၵူၺ်း ၼွင်းႁႅင်း ထူမ်ႈၸွမ်းသဵၼ်ႈတၢင်းပွၵ်ႉယွမ်ႇ ၼႂ်းဝၢၼ်ႈလွၼ်ဢိၼ်ႇ ႁိမ်းၽၵ်းတူၵျိၼ်ႊသၢၼ်ႊၵျေႃႉ (သၢမ်ၸဵင်ႇၶမ်း) ၼႂ်းဝဵင်းပၢင်ႇသၢႆး ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ။

ၸွမ်းလႅၼ်လိၼ်တႆး – ၶႄႇၼႆႉ မီးသၢႆၵႄးၼမ်ႉယၢင်း၊ ၵႄးၼမ်ႉၵူၺ်း ဢၼ်လႆၶဝ်ႈၸူးသၢႆၵႄးၼမ်ႉမၢဝ်းၼၼ်ႉ ပူၼ်ႉမႃးၵူႈပီ ၼမ်ႉၼွင်းႁႅင်းသေတႃႉ ထူမ်ႈၸွမ်းတိူၵ်ႇႁႆႈလွၵ်းၼႃး ၵူၺ်း။ ယၢမ်းလဵဝ်ၼႆႉ ၼမ်ႉထူမ်ႈထိုင် ၼိူဝ်သဵၼ်ႈတၢင်းလူင် ၸွမ်းဝၢၼ်ႈပႃးထႅင်ႈလႄႈ ႁဵတ်းႁႂ်ႈၵူၼ်းမိူင်းႁူပ်ႉလွင်ႈယၢပ်ႇၽိုတ်ႇ တႃႇၵႂႃႇမႃးၵႃႉၶၢႆ ႁႃၵိၼ်လဵင်ႉတွင်ႉၼႆ ၵူၼ်းမိူင်းပိုၼ်ႉတီႈ ၵေႃႉယူႇဝႆႉတီႈလႅၼ်လိၼ်တႆး – ၶႄႇ လၢတ်ႈၼႄၼင်ႇၼႆ။

“ၵူႈပီၼႆႉ ၼမ်ႉထူမ်ႈၸွမ်းတူင်ႈၼႃးထုင်ႉဝၢင်းၵဵင်းယၢင်းတူင်၊ ၵဵင်းယၢင်းလႅင် ၸိူဝ်းၼႆႉၵူၺ်း။ ပွၵ်ႈၼႆႉ ၼမ်ႉထူမ်ႈပႃး ဝၢၼ်ႈလွၼ်ဢိၼ်ႇ ထူမ်ႈပႃးသဵၼ်ႈတၢင်းလူင်ၵျိၼ်ႊသၢၼ်ႊ ၵျေႃႉ။ ယၢမ်းလဵဝ် လႆႈဢိုတ်းသဵၼ်ႈတၢင်းဝႆႉ ဢမ်ႇၸၢင်ႈၵႂႃႇမႃး။ ၶူဝ်းတီႈၵဵတ်ႉလၢၼ်ႇ ၵျိၼ်ႊသၢၼ်ႊၵျေႃႉၵေႃႈ ဢမ်ႇၸၢင်ႈတေႃႉသူင်ႇ ၶဝ်ႈသူင်ႇဢွၵ်ႇယဝ်ႉ။ တီႈဝၢၼ်ႈလွၼ်ဢိၼ်ႇ ၼႆႉ ႁိူၼ်းၵူၼ်းမိူင်းလွင်ႈပႃးၵႂႃႇလင်ၼိုင်ႈ”။

လႆႈႁူႉဝႃႈ မိူဝ်ႈပူၼ်ႉမႃး သွင်ဝူင်ႈၼၼ်ႉ ၾူၼ်တူၵ်းထပ်းၵၼ်လၢႆဝၼ်းယူႇသေတႃႉ ဢမ်ႇႁၢဝ်ႈႁႅင်းပဵင်း မွၵ်ႈၼႆႉလႄႈ ၶိုၼ်းပူၼ်ႉမႃးၼႆႉ ၾူၼ်တူၵ်းႁႅင်းသေ ၾၢႆႇၼိုင်ႈၵေႃႈ မိူင်းၶႄႇ ၶဝ် ပိုတ်ႇၽၵ်းတူၾၢႆၼမ်ႉ လႆလူင်းမႃးပႃးလႄႈ ႁဵတ်းႁႂ်ႈၼမ်ႉၵိုင်ႉၵၢင်ႉထူမ်ႈႁၢဝ်ႈႁႅင်း ဝႃႈၼႆ။

ၵူၼ်းၼႂ်းပိုၼ်ႉတီႈ ဝၢၼ်ႈလွၼ်ဢိၼ်ႇ လၢတ်ႈၼႄဝႃႈ -“ယွၼ်ႉမႃးႁဵတ်း တႃႈရူတ်ႉသူၺ်ႇလွၼ်ဢိၼ်ႇလႄႈ ၼမ်ႉၸင်ႇလႆႈထူမ်ႈၼႂ်းဝၢၼ်ႈ။ မိူဝ်ႈဢွၼ်တၢင်း ဢွင်ႈတီႈၼၼ်ႉ ပဵၼ်တူင်ႈၼႃး။ ယၢမ်းလဵဝ်သမ်ႉ ဢဝ်သၢႆးဢဝ်လိၼ်မႃးထူမ်သေ ႁဵတ်းတႃႈရူတ်ႉလႄႈ ဢဝ်ပိုၼ်ႉတီႈၼၼ်ႉ သုင်ၵႂႃႇလိူဝ်ဝၢၼ်ႈ။ ၵွပ်ႈၼၼ် ၼမ်ႉၸင်ႇထူမ်ႈဝၢၼ်ႈႁႅင်း”- ဝႃႈၼႆ။

ၾၢႆႇၼိုင်ႈၵေႃႈ ဝၢႆးလင် ၽႅၼ်ယၼ်ႇသိုၵ်း 1027 မႃးၼႆႉ ၸုမ်းသိုၵ်းၸၢဝ်းၶိူဝ်းၸိူဝ်းၵုမ်းၵမ်ယူႇ ၼႂ်းၸႄႈတွၼ်ႈမူႇၸေႊ တႅပ်းဢဝ်မႆႉယႂ်ႇမႆႉလူင် ယႃႉပႃႇထိူၼ်ႇ ၶုတ်းဢဝ်ၶမ်းႁိမ်းၾင်ႇမႄႈၼမ်ႉ ၼမ်လူၼ်ႉႁႅင်း ၵူၺ်းဢမ်ႇၵႃး ၼႂ်းတိူၵ်ႇႁႆႈလွၵ်းၼႃးၵေႃႈ ၽုၵ်ႇဢွႆႈ၊ ၽုၵ်ႇၵူၺ်ႈသေ ၸႂ်ႉတိုဝ်းၾုၼ်ႇထၢတ်ႈၼမ်လူၼ်ႉႁႅင်းလႄႈ ထၢတ်ႈလိၼ်ဢမ်ႇမီးႁႅင်းတႃႇလုတ်ႇ ဢဝ်ၼမ်ႉ ၼႆယဝ်ႉ။

တႅမ်ႈ – ၽူၺ်းၼုမ်ႇ