ဝၼ်းတီႈ 02/07/2025 ယၢမ်းဝၢႆးဝၼ်း သိုၵ်းမၢၼ်ႈ ၸတ်းပၢင်ၵုမ်ဢုပ်ႇဢူဝ်း တႃႇၸတ်းပွင်ႁႂ်ႈပၢႆးမၢၵ်ႈ မီးၸိုင်ႈမိူင်းၶိုၼ်ႈယႂ်ႇ တီႈႁူင်းႁေႃးလူင် လုမ်းႁူဝ်ပဝ်ႈ ၶွင်ႇသီႇၾၢႆႇၵုမ်းၵမ်ၸိုင်ႈမိူင်း ဝဵင်းၼေႇပျီႇတေႃႇ။
ၼႂ်းပၢင်ၵုမ်ၼၼ်ႉ ဢုပ်ႇဢူဝ်းၵၼ်ၵႂႃႇ လွင်ႈယေးငိုၼ်းလုမ်ႈၾႃႉ ပိုၼ်ၽၢဝ်ႇဢွၵ်ႇ လွင်ႈလၢမ်းၶၢတ်ႈၼိူဝ် ပၢႆးမၢၵ်ႈမီးမိူင်းမၢၼ်ႈ GDP ၸၢင်ႈတူၵ်းၵႂႃႇ ထိုင် 2.5 ပီႊလီႊယၼ်ႊၼၼ်ႉ ဝႃႈၼႆ။
ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇၵႂႃႇၶဝ်ႈႁူမ်ႈၸွမ်းသေ မွၵ်ႇလၢတ်ႈၵႂႃႇ လွင်ႈယေးငိုၼ်းလုမ်ႈၾႃႉ ၼပ်ႉသွၼ်ႇၼိူဝ်ၵၢၼ်ပၢႆးမၢၵ်ႈမီး ၼႂ်းမိူင်းႁူမ်ႈတုမ် (မိူင်းမၢၼ်ႈ) တူၵ်းလူင်းၵႂႃႇထိုင် မၢႆလူပ်းဢၼ်ဝႃႈၼႆႉ မၼ်းၽိတ်းပိူင်ႈဝႆႉ။ ၾၢႆႇယေးငိုၼ်းလုမ်ႈၾႃႉ ဢမ်ႇဢဝ်ၶေႃႈမုလ်းၸေးၸုမ်ႇၵုမ်ႇထူၼ်ႈသေ ၼပ်ႉသွၼ်ႇလီလီ။ ယၢမ်းလဵဝ် ပဵၼ်ၽွင်းၶတ်းၸႂ်ႁႂ်ႈၵၢၼ်မၢၵ်ႈမီးမိူင်းႁူမ်ႈတုမ် ၶိုၼ်ႈယႂ်ႇ ႁဵတ်းႁႂ်ႈ GDP ဝၢၼ်ႈမိူင်း ၶိုၼ်ႈသုင်မႃးလိူဝ်ၵဝ်ႇယူႇ ဝႃႈၼႆ။
ၸွမ်းၼင်ႇ ၶေႃႈမုလ်းၼႂ်းၶၵ်ႉၵၢၼ်ပၢႆးမၢၵ်ႈမီး မိူင်းမၢၼ်ႈ ဢၼ်သိုၵ်းမၢၼ်ႈ ပိုၼ်ၽၢဝ်ႇဝႆႉၼၼ်ႉ ပီၵၢၼ်ငိုၼ်း 2024-2025 ၼႆႉ GDP မိူင်းမၢၼ်ႈ မီးယူႇ 76.4 ပီႊလီႊယၼ်ႊတေႃႊလႃႊ ပီၵၢၼ်ငိုၼ်း 2025-2026 သမ်ႉ ယိူင်းဝႆႉဝႃႈ တေၶတ်းၸႂ်သၢင်ႈႁႂ်ႈၶိုၼ်ႈမႃးထိုင် 81.6 ပီႊလီႊယၼ်ႊတေႃႊလႃႊ ဝႃႈၼႆ။
မိၼ်းဢွင်ႇလၢႆႇ လၢတ်ႈၵႂႃႇထႅင်ႈဝႃႈ -“ၽွင်းတိုၵ်ႉၶတ်းၸႂ်ႁဵတ်းသၢင်ႈႁႂ်ႈၵၢၼ်မၢၵ်ႈမီး ၼႂ်းမိူင်းႁူမ်ႈတုမ် ၶိုၼ်ႈသုင်မႃးထႅင်ႈ 5.2 ပီႊလီႊယၼ်ႊတေႃႊလႃႊယူႇၼႆႉ ယေးငိုၼ်းလုမ်ႈၾႃႉသမ်ႉ ဢွၵ်ႇၶေႃႈပိုၼ်ၽၢဝ်ႇ လၢမ်းၶၢတ်ႈဝႃႈ ပၢႆးမၢၵ်ႈမီးၸၢင်ႈတူၵ်းၵႂႃႇထိုင် မၢႆလူပ်း 2.5 ဝၢၵ်ႈ (%) ၼႆၼၼ်ႉ ဢမ်ႇမႅၼ်ႈ။ ယုမ်ႇယမ်ဝႃႈ ၵူၼ်းၸိူဝ်းယူႇၼႂ်းမိူင်းတင်းသဵင်ႈ တေၶတ်း ၸႂ်ႁဵတ်းသၢင်ႈ ႁႂ်ႈၶၵ်ႉၵၢၼ်မၢၵ်ႈမီးၼႂ်းမိူင်း GDP တိူဝ်းၼမ်မႃး ထႅင်ႈယူႇ”- ဝႃႈၼႆ။
GDP ဢၼ်ဝႃႈၼႆႉ ပဵၼ်တူဝ်ၼပ်ႉဢၼ်တႅၵ်ႈၼိူင်းၼိူဝ်ၵၢၼ်မၢၵ်ႈမီး ၸိုင်ႈမိူင်းၼိုင်ႈမိူင်းၼၼ်ႉသေ ၸႂ်ႉတိုဝ်းၼပ်ႉသွၼ်ၵႃႈၶၼ် ၵၢၼ်ႁဵတ်းဢွၵ်ႇၶူဝ်းၵုၼ်ႇၼႂ်းမိူင်း သူင်ႇဢွၵ်ႇ ၶၢႆၼွၵ်ႈမိူင်းလႄႈ ၼပ်ႉဢဝ်ငိုၼ်း ၶဝ်ႈဝၢၼ်ႈမိူင်းတင်းသဵင်ႈ မႃးႁူမ်ႈၵၼ်ၼၼ်ႉယဝ်ႉ။
မိူဝ်ႈပူၼ်ႉမႃး လိူၼ်ၵျုၼ်ႊ ဝူင်ႈတီႈသွင်ၼၼ်ႉ ယေးငိုၼ်းလုမ်ႈၾႃႉ ပိုၼ်ၽၢဝ်ႇၽိုၼ်လိၵ်ႈႁၢႆးငၢၼ်းၵႂႃႇဝႃႈ ယွၼ်ႉမိူင်းႁူမ်ႈတုမ် ႁူပ်ႉၽေးၽႅၼ်ႇလိၼ်ဝႆႁၢဝ်ႈႁႅင်း တင်းႁႅင်း 7.7 မႅၵ်ႊၼီႊၵျုတ်ႉသေ ပၢႆးမၢၵ်ႈမီးမိူင်းႁူမ်ႈတုမ် ပီၵၢၼ်ငိုၼ်း 2025-2026 ၼႆႉ ၸၢင်ႈတူၵ်းလူင်းၵႂႃႇထိုင် 2.5 ဝၢၵ်ႈ (%) ၼႆယဝ်ႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ